വനിതാ ഫോട്ടോഗ്രാഫർമാരുടെ കണ്ണിലൂടെ ബഹ്റൈനെ വരച്ചുകാട്ടി ഐ.എൽ.എ; 'ഇമേജ് ഇൻ' ഫോട്ടോഗ്രാഫി അവാർഡുകൾ വിതരണം ചെയ്തു
പ്രദീപ് പുറവങ്കര
മനാമ: ഇന്ത്യൻ ലേഡീസ് അസോസിയേഷൻ (ഐ.എൽ.എ) തങ്ങളുടെ പ്ലാറ്റിനം ജൂബിലി (70-ാം വാർഷികം) ആഘോഷങ്ങളുടെ ഭാഗമായി സംഘടിപ്പിച്ച 'ഇമേജ് ഇൻ' (IMAGEin) ബഹ്റൈൻ വനിതാ ഫോട്ടോഗ്രാഫി മത്സരത്തിലെ വിജയികളെ പ്രഖ്യാപിച്ചു. കമ്മ്യൂണിറ്റിയിൽ നിന്ന് വൻ പങ്കാളിത്തം ലഭിച്ച ഈ മത്സരത്തിൽ 150 മത്സരാർത്ഥികളിൽ നിന്നായി ഇരുനൂറിലധികം മനോഹരമായ ചിത്രങ്ങളാണ് ലഭിച്ചത്.
ഐ.എൽ.എ ക്ലബ് ഹൗസിൽ നടന്ന മികച്ച ചിത്രങ്ങളുടെ പ്രദർശന ചടങ്ങിൽ പ്രശസ്ത ബഹ്റൈനി ചലച്ചിത്ര നിർമ്മാതാവ് ബസ്സാം അൽ തവാദി മുഖ്യാതിഥിയായിരുന്നു. മത്സരത്തിൽ കാവ്യ സരിൻ ഒന്നാം സമ്മാനമായ 500 യു.എസ് ഡോളറും കാനൻ വ്ലോഗിങ് ക്യാമറയും സ്വന്തമാക്കി. നജീബ ടി രണ്ടാം സ്ഥാനവും (300 യു.എസ് ഡോളറും കാനൻ ഫോട്ടോ പ്രിന്ററും), മനാഹിൽ സൊഹൈൽ മൂന്നാം സ്ഥാനവും (200 യു.എസ് ഡോളറും കാനൻ കളർ പ്രിന്ററും) നേടി. പ്രത്യേക പരാമർശം അർഹിച്ച മറ്റ് ചിത്രങ്ങളും ചടങ്ങിൽ പ്രദർശിപ്പിച്ചു.
'ഐ ലവ് ബഹ്റൈൻ' എന്ന പ്രമേയത്തെ അടിസ്ഥാനമാക്കിയായിരുന്നു മത്സരം. രാജ്യത്തിന്റെ സദ്ഭാവം, സുരക്ഷിതമായ അന്തരീക്ഷം, പ്രകൃതിഭംഗി എന്നിവ വനിതകളുടെ കാഴ്ച്ചപ്പാടിലൂടെ അടയാളപ്പെടുത്തുകയായിരുന്നു ഇതിന്റെ ലക്ഷ്യം. മനോഹരമായ സൂര്യാസ്തമയങ്ങൾ, തീരദേശ ദൃശ്യങ്ങൾ, പ്രശസ്തമായ ലാൻഡ്മാർക്കുകൾ എന്നിവയെല്ലാം ചിത്രങ്ങളിൽ ഇടംപിടിച്ചു.
ഐ.എൽ.എ അംഗങ്ങളും പ്രശസ്ത ഫോട്ടോഗ്രാഫർമാരുമായ സിതാര തോമസ്, ശിഖ വർമ്മ എന്നിവരാണ് ചിത്രങ്ങളുടെ ആദ്യഘട്ട സ്ക്രീനിങ് നടത്തിയത്. തുടർന്ന് പ്രശസ്ത സിനിമാറ്റോഗ്രാഫറും സംവിധായകനുമായ അജിത് നായർ, വെരാനോ ക്രിയേറ്റീവ്സ് സ്ഥാപക സമ്മർ അമീൻ, മാർക്കറ്റിങ് സ്ട്രാറ്റജിസ്റ്റ് ഫാത്തിമ ആർ. അൽഷൈഖ് എന്നിവരടങ്ങിയ ജൂറിയാണ് വിജയികളെ തിരഞ്ഞെടുത്തത്.
വനിതകളുടെ കാഴ്ച്ചപ്പാടിലൂടെ ബഹ്റൈന്റെ ഭംഗി ആഘോഷിക്കുന്നതിലൂടെ തങ്ങൾ സ്നേഹിക്കുന്ന ഈ രാജ്യത്തിന് നൽകിയ ഉചിതമായ ആദരവാണ് ഈ മത്സരമെന്ന് ഐ.എൽ.എ പ്രസിഡന്റ് സ്മിത ജെൻസൻ പറഞ്ഞു. ബഹ്റൈൻ നൽകുന്ന സമാധാനവും ഐക്യവും രേഖപ്പെടുത്താൻ പ്രവാസി വനിതകൾക്ക് അവസരമൊരുക്കിയ ഐ.എൽ.എയുടെ ശ്രമങ്ങളെ മുഖ്യാതിഥി ബസ്സാം അൽ തവാദി അഭിനന്ദിച്ചു.
ജി.സി.സിയിലെ ഏറ്റവും പഴക്കമേറിയ പ്രവാസി വനിതാ സംഘടനയായ ഐ.എൽ.എ, തങ്ങളുടെ 'സർവീസ് ബിഫോർ സെൽഫ്' (Service Before Self) എന്ന ആപ്തവാക്യത്തിന് കീഴിൽ പ്ലാറ്റിനം ജൂബിലി വർഷത്തിൽ നിരവധി കമ്മ്യൂണിറ്റി പരിപാടികളാണ് സംഘടിപ്പിച്ചു വരുന്നത്.
rgdfgd
