ബഹ്റൈനിൽ ജലവിതരണത്തിന് പകുതിയിലധികം സബ്സിഡി; കണക്കുകൾ പുറത്തുവിട്ട് അതോറിറ്റി
പ്രദീപ് പുറവങ്കര I ബഹ്റൈൻ
മനാമ: ബഹ്റൈനിലെ ഉപഭോക്താക്കൾക്ക് ലഭിക്കുന്ന ജലസേവനത്തിന്റെ പകുതിയിലധികം ചെലവും സർക്കാർ സബ്സിഡിയായി വഹിക്കുന്നതായി ഇലക്ട്രിസിറ്റി ആൻഡ് വാട്ടർ അതോറിറ്റി വ്യക്തമാക്കി. 2024-ലെ കണക്കുകൾ പ്രകാരം ജലവിതരണത്തിന്റെ 52 ശതമാനവും വൈദ്യുതിയുടെ 32 ശതമാനവും സബ്സിഡിയായി സർക്കാർ നൽകി. എംപി മمدൂഹ് അൽ സാലിഹിന്റെ പാർലമെന്ററി ചോദ്യത്തിന് മറുപടിയായാണ് അതോറിറ്റി ഈ വിവരങ്ങൾ നൽകിയത്.
കഴിഞ്ഞ വർഷം വൈദ്യുതി, ജല ഉൽപ്പാദനത്തിനും വിതരണത്തിനുമായി ആകെ 713.1 ദശലക്ഷം ബഹ്റൈൻ ദീനാറാണ് ചെലവായത്. ഇതിൽ വൈദ്യുതി മേഖലയ്ക്കായി 550.8 ദശലക്ഷം ദീനാറും ജലവിതരണത്തിനായി 162.3 ദശലക്ഷം ദീനാറും ചെലവഴിച്ചു. ജലസേവനത്തിന്റെ ആകെ ചെലവിൽ 85.2 ദശലക്ഷം ദീനാർ (52%) സർക്കാർ വഹിച്ചപ്പോൾ, ഉപഭോക്താക്കൾക്ക് 48% മാത്രമേ നൽകേണ്ടി വന്നുള്ളൂ. വൈദ്യുതിയുടെ കാര്യത്തിൽ 175.3 ദശലക്ഷം ദീനാർ സർക്കാർ സബ്സിഡിയായി നൽകിയപ്പോൾ ബാക്കി 68% ഉപഭോക്താക്കൾ വഹിച്ചു.
രാജ്യത്തെ ശൃംഖല വഴി വിതരണം ചെയ്യുന്ന വെള്ളം കുടിക്കാൻ സുരക്ഷിതമാണെന്ന് അതോറിറ്റി ഉറപ്പുനൽകി. ഇത് പൂർണ്ണമായും ശുദ്ധീകരിച്ച വെള്ളമാണെന്നും ഭൂഗർഭജലവുമായി കലർത്തുന്നില്ലെന്നും അറിയിപ്പിൽ പറയുന്നു. ഉപ്പുവെള്ളം ശുദ്ധീകരിച്ചാണ് ഭൂരിഭാഗം ജലവിതരണവും നടത്തുന്നത്. താരിഫ് മാറ്റങ്ങളോ സബ്സിഡി നിരക്കുകളോ ഉൽപ്പാദനച്ചെലവിനെ ബാധിക്കില്ലെന്നും അതോറിറ്റി വ്യക്തമാക്കി.
sdfsf
