സന്നദ്ധസേവകർക്ക് തൊഴിൽ മുൻഗണന: പുതിയ നിർദ്ദേശവുമായി ബഹ്‌റൈൻ എംപിമാർ

പ്രദീപ് പുറവങ്കര I ബഹ്റൈൻ

മനാമ: രാജ്യത്തെ ദേശീയ വൊളന്റിയർ പ്ലാറ്റ്‌ഫോമിൽ രജിസ്റ്റർ ചെയ്ത് പ്രവർത്തിക്കുന്ന ഉദ്യോഗാർത്ഥികൾക്ക് ജോലിയിൽ മുൻഗണന നൽകാൻ ശുപാർശ. “ബഹ്‌റൈൻ ഈസ് വെൽ... ബിക്കോസ് യു ആർ ഇറ്റ്‌സ് പീപ്പിൾ” (Bahrain is Well… Because You Are Its People) എന്ന പ്രചാരണ പരിപാടിയുടെ ഭാഗമായാണ് ഈ നിർദ്ദേശം മുന്നോട്ടുവെച്ചിരിക്കുന്നത്.

ഇറാനിയൻ ആക്രമണങ്ങളെത്തുടർന്നുണ്ടായ നിലവിലെ പ്രത്യേക സാഹചര്യത്തിൽ സന്നദ്ധസേവനം നടത്തുന്നവർക്ക് ഔദ്യോഗിക അംഗീകാര പത്രങ്ങൾ നൽകാനും പദ്ധതി ലക്ഷ്യമിടുന്നു. ഈമാൻ ഷുവൈറ്റർ, മുഹമ്മദ് അൽ ഒലൈവി, അബ്ദുൽ ഹക്കീം അൽ ഷെനോ, അബ്ദുൽ വാഹിദ് ഖരാത്ത, മൊഹ്‌സിൻ അൽ അസ്ബൂൽ എന്നീ അഞ്ച് എംപിമാരാണ് ഈ നിർദ്ദേശം സമർപ്പിച്ചത്. സർക്കാർ സ്ഥാപനങ്ങളിലും സ്വകാര്യ കമ്പനികളിലും ജോലി നൽകുന്ന വേളയിൽ, സന്നദ്ധസേവനം നടത്തിയ തൊഴിലില്ലാത്ത യുവാക്കൾക്ക് മുൻഗണന നൽകണമെന്ന് ഇവർ ആവശ്യപ്പെടുന്നു. പ്രത്യേകിച്ച്, അവർ സേവനം അനുഷ്ഠിച്ച അതേ മേഖലകളിൽ ഒഴിവുകൾ വരുമ്പോൾ പരിഗണന നൽകണമെന്നാണ് ആവശ്യം.

കോവിഡ് കാലത്തെ അനുഭവങ്ങൾ മുൻനിർത്തിയാണ് ഇത്തരമൊരു പദ്ധതി ആരംഭിച്ചത്. പ്രതിസന്ധി ഘട്ടങ്ങളിൽ നടത്തുന്ന സന്നദ്ധസേവനത്തെ കൃത്യമായ തൊഴിൽ അവസരങ്ങളാക്കി മാറ്റുക എന്നതാണ് എംപിമാരുടെ നിർദേശം. സമ്മർദ്ദകരമായ സാഹചര്യങ്ങളിൽ രാജ്യം കാട്ടിയ സേവനത്തിന് ഔദ്യോഗികമായ അംഗീകാരം നൽകുക എന്നതും ഇതിലൂടെ ഉദ്ദേശിക്കുന്നു.

ദേശീയ വൊളന്റിയർ പ്ലാറ്റ്‌ഫോമിലെ വിവരങ്ങൾ അടിസ്ഥാനമാക്കി ഉദ്യോഗാർത്ഥികളുടെ ഹാജർ നില, വൈദഗ്ധ്യം, പ്രവർത്തന മികവ് എന്നിവ വിലയിരുത്തും. ഈ മൂല്യനിർണ്ണയ രേഖകൾ തൊഴിൽ നിയമനങ്ങളിൽ നിർണ്ണായകമായ ഒരു ഘടകമായി മാറ്റാനാണ് എംപിമാർ നിർദ്ദേശിച്ചിരിക്കുന്നത്. സന്നദ്ധസേവനത്തിലൂടെ യുവാക്കൾ ആർജ്ജിച്ച പ്രായോഗിക അറിവ് തൊഴിൽ മേഖലയിൽ അവർക്ക് മുതൽക്കൂട്ടാകുമെന്ന് പാർലമെന്റ് വിലയിരുത്തി.