അപകീർത്തിക്കേസിൽ പ്രതിയെ കോടതി വെറുതെ വിട്ടു; 20 ദിനാർ പിഴ ശിക്ഷ റദ്ദാക്കി

പ്രദീപ് പുറവങ്കര l ബഹ്റൈൻ

മനാമ: പൊതുസ്ഥലത്ത് വെച്ച് അപകീർത്തികരമായി സംസാരിച്ചുവെന്നാരോപിച്ച് ഒരാൾക്കെതിരെ പുറപ്പെടുവിച്ചിരുന്ന ക്രിമിനൽ ഉത്തരവ് ബഹ്‌റൈൻ കോടതി റദ്ദാക്കി. പ്രതിക്കെതിരെയുള്ള ആരോപണങ്ങൾ തെളിയിക്കാൻ മതിയായ തെളിവുകളില്ലെന്ന് നിരീക്ഷിച്ച കോടതി, നേരത്തെ വിധിച്ചിരുന്ന 20 ദിനാർ പിഴ ശിക്ഷയും ഇതോടൊപ്പം ഒഴിവാക്കി. ക്രിമിനൽ നടപടി നിയമത്തിലെ ആർട്ടിക്കിൾ 255 പ്രകാരം ഈ ഉത്തരവ് നിലനിൽക്കാത്തതാണെന്നും അത്തരമൊരു വിധി ഉണ്ടായിട്ടില്ലാത്തതായി കണക്കാക്കണമെന്നും കോടതി വ്യക്തമാക്കി.

ഒരു സ്ത്രീയെയും മകളെയും പൊതുനിരത്തിൽ വെച്ച് ആക്ഷേപിക്കുകയും അവരുടെ അന്തസ്സിനും സൽപ്പേരിനും കളങ്കം വരുത്തുന്ന രീതിയിൽ സംസാരിക്കുകയും ചെയ്തു എന്നതായിരുന്നു പ്രോസിക്യൂഷൻ ഉന്നയിച്ച ആരോപണം. ഇതിനെത്തുടർന്നാണ് 20 ദിനാർ പിഴയടക്കാൻ ക്രിമിനൽ കോടതി ഉത്തരവിട്ടത്. എന്നാൽ, ക്രിമിനൽ നടപടി നിയമത്തിലെ ആർട്ടിക്കിൾ 277 പ്രകാരം പ്രതി കോടതിയിൽ അപ്പീൽ നൽകുകയായിരുന്നു.

താൻ ആരെയും അപമാനിച്ചിട്ടില്ലെന്നും അത്തരമൊരു ഉദ്ദേശ്യം തനിക്കുണ്ടായിരുന്നില്ലെന്നും പ്രതി കോടതിയിൽ ബോധിപ്പിച്ചു. പരാതിക്കാരുടെ പ്രസ്താവനകളല്ലാതെ കേസിൽ മറ്റ് സ്വതന്ത്ര സാക്ഷികളോ തെളിവുകളോ ഇല്ലെന്ന് പ്രതിഭാഗം അഭിഭാഷകൻ അബ്ദുൽ അസീം ഹുബൈൽ വാദിച്ചു. തെളിവായി ഹാജരാക്കിയ വീഡിയോ ദൃശ്യങ്ങളിൽ കുറ്റകരമായ ഒന്നും കണ്ടെത്താൻ സാധിച്ചിട്ടില്ലെന്നും പ്രതിഭാഗം ചൂണ്ടിക്കാട്ടി.

പരാതി നൽകിയവർ തമ്മിലുള്ള കുടുംബബന്ധം അവരുടെ മൊഴികളുടെ വിശ്വാസ്യതയിൽ സംശയമുണ്ടാക്കുന്നതായി കോടതി നിരീക്ഷിച്ചു. മതിയായ തെളിവുകളില്ലാത്ത സാഹചര്യത്തിൽ സംശയത്തിന്റെ ആനുകൂല്യം പ്രതിക്ക് നൽകണമെന്ന തത്വം കോടതി ആവർത്തിച്ചു. വ്യക്തിസ്വാതന്ത്ര്യവും അവകാശങ്ങളും സംരക്ഷിക്കുന്നതിന് നിയമം മുൻഗണന നൽകുന്നുണ്ടെന്നും അതിനാൽ തെളിവില്ലാത്ത പക്ഷം ശിക്ഷാ ഉത്തരവ് നിലനിൽക്കില്ലെന്നും കോടതി വിധിയിൽ വ്യക്തമാക്കി.