ട്രക്ക് ഡ്രൈവർമാർക്ക് പുതിയ മാർഗ നിർദ്ദേശങ്ങളുമായി സൗദി ഗതാഗത വകുപ്പ്
ജിദ്ദ : സൗദിയിൽ ട്രക്ക് ഡ്രൈവർ‍മാർ‍ക്കുള്ള പുതിയ മാർഗ നിർ‍ദ്ദേശങ്ങൾ ഗതാഗത വകുപ്പ് പുറത്തിറക്കി. ഇത് പ്രകാരം ട്രക്ക് ഡ്രൈവർ‍മാർ ആഴ്ചയിൽ അന്‍പത്തിയാറ് മണിക്കൂറിൽ കൂടുതൽ ട്രക്ക് ഓടിക്കാൻ പാടില്ല. എല്ലാ നാലര മണിക്കൂറിലും ഡ്രൈവർ‍മാർ നിർ‍ബന്ധമായി വിശ്രമിക്കണമെന്നും മാർ‍ഗനിർ‍ദ്ദേശത്തിലുണ്ട്.
റോഡ്‌ സുരക്ഷ ഉറപ്പ് വരുത്തുക, വാഹനാപകടങ്ങൾ നിയന്ത്രിക്കുക തുടങ്ങിയ ലക്ഷ്യങ്ങളോടെയാണ് സൗദിയിൽ ട്രക്ക് ഡ്രൈവർമാർക്ക് പുതിയ പ്രവൃത്തി സമയം നിശ്ചയിക്കുന്നത്. ഡ്രൈവർ‍മാർ ദിവസം ചുരുങ്ങിയത് പതിനൊന്ന് മണിക്കൂറും ആഴ്ചയിൽ നാൽ‍പ്പത്തിയെട്ട് മണിക്കൂറും വിശ്രമം എടുക്കണമെന്ന് മാർഗ നിർ‍ദ്ദേശങ്ങളിൽ പറയുന്നു.
തുടർ‍ച്ചയായി ആറു ദിവസത്തിൽ കൂടുതൽ ട്രക്ക് ഓടിക്കാൻ പാടില്ല. നിയമ ലംഘനം ശ്രദ്ധയിൽ പെട്ടാൽ ശക്തമായ നടപടി സ്വീകരിക്കും. നൂതനമായ സാങ്കേതിക സംവിധാനങ്ങൾ ഉപയോഗിച്ച് ട്രക്കുകളുടെ നീക്കങ്ങൾ നിരീക്ഷിക്കും. എല്ലാ ട്രക്കുകളിലും ഘടിപ്പിക്കുന്ന മോണിറ്ററിംഗ് ഡിവൈസുകൾ കണ്‍ട്രോൾ സെന്‍ററുമായി ബന്ധിപ്പിക്കണമെന്നും ഗതാഗത വകുപ്പ് നിർ‍ദ്ദേശിച്ചു.
