ലാലുവിന്‍റെ ‘വിധി’ ഇന്ന്
റാഞ്ചി : കാലിത്തീറ്റ കുംഭകോണവുമായി ബന്ധപ്പെട്ട രണ്ടാമത്തെ കേസിൽ ബിഹാർ മുൻ മുഖ്യമന്ത്രിയും ആർ.ജെ.ഡി അദ്ധ്യക്ഷനുമായ ലാലു പ്രസാദ് യാദവിന് ശിക്ഷ വിധിക്കുന്നത് പ്രത്യേക സി.ബി.ഐ കോടതി ഇന്നത്തേക്ക് മാറ്റി. കേസിൽ ലാലു ഉൾ‍പ്പെടെ 15 പേർ കുറ്റക്കാരാണെന്ന് കോടതി നേരത്തെ കണ്ടെത്തിയിരുന്നു. സി.ബി.ഐ കോടതി മുൻ ബിഹാർ മുഖ്യമന്ത്രി ജഗന്നാഥ് മിശ്രയെ കേസിൽ വെറുതെ വിട്ടിരുന്നു. റാഞ്ചിയിലെ പ്രത്യേക സി.ബി.ഐ കോടതിയാണ് ശിക്ഷ പ്രഖ്യാപിക്കുന്നത് ഇന്നത്തേക്ക് മാറ്റിയത്. നേരത്തെ ജനുവരി മൂന്നിന് പ്രഖ്യാപിക്കാനിരുന്ന വിധി ഇന്നലത്തേക്ക് മാറ്റിവെക്കുകയായിരുന്നു.
അതേസമയം, പ്രായം കണക്കിലെടുത്ത് ലാലുവിന് കുറഞ്ഞ ശിക്ഷ നൽകണമെന്ന് അദ്ദേഹത്തിന്റെ അഭിഭാഷകൻ കോടതിയിൽ ആവശ്യപ്പെട്ടു. എന്നാൽ, പരമാവധി ശിക്ഷ തന്നെ നൽകണമെന്നായിരുന്നു സി.ബി.ഐയുടെ ആവശ്യം. ലാലുവിനെതിരെ സി.ബി.ഐ രജിസ്റ്റർ ചെയ്ത ആറ് കേസുകളിൽ രണ്ടാമത്തേതാണിത്. ലാലു മുഖ്യമന്ത്രിയായിരിക്കെ 1991-94 കാലയളവിൽ ദിയോഗർ ട്രഷറിയിൽ നിന്ന് വ്യാജ ബില്ലുകൾ നൽകി 84.53 ലക്ഷം രൂപ അനധികൃതമായി പിൻവലിച്ച കേസിലാണ് കോടതി നടപടി.
