ഉപരാഷ്ട്രപതി തിരഞ്ഞെടുപ്പിന് കളമൊരുങ്ങി; ജഗ്‌ദീപ് ധൻഖർ രാജിവെച്ചു, സാധ്യതകൾ ഇങ്ങനെ

രഹസ്യബാലറ്റും പാർട്ടി നിലപാടുകളും:

ഉപരാഷ്ട്രപതി തിരഞ്ഞെടുപ്പിൽ രഹസ്യബാലറ്റായതുകൊണ്ട് പാർട്ടി വിപ്പ് ബാധകമല്ല. വ്യക്തിഗത എം.പിമാർക്ക് സ്വന്തം പാർട്ടിയുടെ തിരഞ്ഞെടുപ്പിനെതിരെ വോട്ട് ചെയ്യാൻ സാധിക്കും. കൂടാതെ, സ്ഥാനാർത്ഥികളെ ആശ്രയിച്ച് സഖ്യകക്ഷികൾക്കിടയിൽ ഭിന്നതയുണ്ടാകാനും സാധ്യതയുണ്ട്. 2022-ലെ രാഷ്ട്രപതി തിരഞ്ഞെടുപ്പിൽ പ്രതിപക്ഷം മാർഗരറ്റ് ആൽവയെ സ്ഥാനാർത്ഥിയാക്കിയപ്പോൾ തൃണമൂൽ കോൺഗ്രസ് വിട്ടുനിന്നിരുന്നു. ആ തിരഞ്ഞെടുപ്പിൽ ധൻഖർക്ക് 725 വോട്ടുകളിൽ 528 ആദ്യ മുൻഗണനാ വോട്ടുകൾ ലഭിച്ചപ്പോൾ എതിരാളിക്ക് 182 വോട്ടുകളാണ് ലഭിച്ചത്. 15 എം.പിമാരുടെ വോട്ടുകൾ അസാധുവായിരുന്നു.

സ്ഥാനാർത്ഥി ചർച്ചകൾ സജീവം; തരൂർ സാധ്യതകളിൽ?

ധൻഖറിൻ്റെ രാജിയോടെ ഉപരാഷ്ട്രപതി സ്ഥാനത്തേക്ക് പലരുടെയും പേരുകൾ ഉയർന്നു വരുന്നുണ്ട്. സംസ്ഥാന കോൺഗ്രസുമായി അഭിപ്രായ ഭിന്നതയുള്ള കോൺഗ്രസ് എം.പി ശശി തരൂരിനെ ഉപരാഷ്ട്രപതി സ്ഥാനത്തേക്ക് പരിഗണിച്ചേക്കാമെന്നതാണ് ഇതിൽ പ്രധാനപ്പെട്ട ഒരു പ്രചാരണം. താൻ കോൺഗ്രസ് വിട്ട് ബി.ജെ.പിയിൽ ചേരില്ലെന്ന് തരൂർ പലതവണ ആവർത്തിച്ച് പറഞ്ഞിട്ടുണ്ടെങ്കിലും, സമീപകാലത്തായി മോദിയെ പിന്തുണച്ച് അദ്ദേഹം നടത്തിയ പ്രസ്താവനകളും മറ്റും അദ്ദേഹത്തിന്റെ ബി.ജെ.പി സ്നേഹം വെളിവാക്കുന്നതാണെന്നാണ് രാഷ്ട്രീയ നിരീക്ഷകർ കാണുന്നത്.

തരൂർ കുറച്ചുകാലമായി കോൺഗ്രസ് നേതൃത്വവുമായി അഭിപ്രായഭിന്നതകളിലായിരുന്നു. മോദി സർക്കാരിന്റെ വിവിധ പരിപാടികളോട്, പ്രത്യേകിച്ച് പഹൽഗാം ഭീകരാക്രമണത്തിന് ശേഷമുള്ള പാകിസ്ഥാനെതിരായ ആഗോള ഇടപെടലുകളിലും ഓപ്പറേഷൻ സിന്ദൂരിലും, അദ്ദേഹം സഹകരിച്ചിരുന്നു. എങ്കിലും, രാജ്യസഭയുടെ പ്രവർത്തനത്തിൽ പ്രധാന പങ്കുവഹിക്കുന്ന ഇത്രയും നിർണായകമായ ഭരണഘടനാ പദവിയിലേക്ക് ബി.ജെ.പി പാർട്ടിക്ക് പുറത്തുള്ള ഒരാളെ തിരഞ്ഞെടുക്കുമോ എന്ന് കണ്ടറിയണം. തിരഞ്ഞെടുപ്പ് കമ്മീഷൻ തിരഞ്ഞെടുപ്പ് നടപടികൾ ആരംഭിച്ചാൽ മാത്രമേ പാർട്ടികൾ സ്ഥാനാർത്ഥികളെ തേടിത്തുടങ്ങൂ. ഭരണഘടന അനുസരിച്ച്, ഉപരാഷ്ട്രപതിയുടെ ഓഫീസിലെ ഒഴിവ് വൈകാതെ തന്നെ നികത്തണം. പുതിയ ഉപരാഷ്ട്രപതിക്ക് സ്ഥാനമേറ്റെടുക്കുന്ന തീയതി മുതൽ അഞ്ച് വർഷത്തെ മുഴുവൻ കാലാവധി ലഭിക്കും.

aa