എം.പിയുടെ ഒപ്പ് വ്യാജമായി നിർമ്മിച്ചു; പാർലമെന്റ് ഓഫീസ് ജീവനക്കാരിക്ക് തടവുശിക്ഷ
പ്രദീപ് പുറവങ്കര
മനാമ: ബഹ്റൈൻ പാർലമെന്റ് അംഗത്തിന്റെ (MP) ഒപ്പ് വ്യാജമായി രേഖപ്പെടുത്തി ഔദ്യോഗിക രേഖ നിർമ്മിച്ച കേസിൽ ഓഫീസ് ജീവനക്കാരിയെ ഫസ്റ്റ് ഹൈ ക്രിമിനൽ കോടതി ശിക്ഷിച്ചു. ഒരു വർഷം തടവിനാണ് കോടതി ഉത്തരവിട്ടത്. എന്നാൽ ശിക്ഷ മൂന്ന് വർഷത്തേക്ക് സസ്പെൻഡ് ചെയ്തിട്ടുണ്ട്. വ്യാജമായി നിർമ്മിച്ച രേഖ കണ്ടുകെട്ടാനും കോടതി നിർദ്ദേശിച്ചു.
പാർലമെന്റ് ഓഫീസിലെ സെക്കൻഡ്മെന്റ് (അന്യത്ര സേവനം) അവസാനിപ്പിക്കുന്നതിനുള്ള ഫോമിലാണ് ജീവനക്കാരി എം.പിയുടെ ഒപ്പ് വ്യാജമായി ഇട്ടത്. എം.പിയുടെ അറിവോ സമ്മതമോ ഇല്ലാതെയായിരുന്നു ഈ നടപടി. കൗൺസിൽ ഓഫ് റെപ്രസന്റേറ്റീവ്സിൽ നിന്ന് സെക്കൻഡ്മെന്റ് റദ്ദാക്കിയതുമായി ബന്ധപ്പെട്ട ഔദ്യോഗിക അറിയിപ്പ് ലഭിച്ചപ്പോഴാണ് തന്റെ ഒപ്പ് വ്യാജമാണെന്ന് എം.പി തിരിച്ചറിഞ്ഞത്.
തുടർന്ന് നടത്തിയ ഫോറൻസിക് പരിശോധനയിൽ ഒപ്പ് വ്യാജമാണെന്നും ഫോമിലെ മറ്റ് വിവരങ്ങൾ പൂരിപ്പിച്ചത് ജീവനക്കാരിയാണെന്നും കൈയക്ഷര വിദഗ്ദ്ധർ സ്ഥിരീകരിച്ചു. തന്റെ പരാതി എം.പി പിൻവലിച്ച സാഹചര്യത്തിലാണ് കോടതി ശിക്ഷാ കാലാവധിയിൽ ഇളവ് നൽകിയത്. ശിക്ഷാ കാലയളവിൽ സമാനമായ കുറ്റകൃത്യങ്ങൾ ആവർത്തിച്ചാൽ പ്രതി തടവ് അനുഭവിക്കേണ്ടി വരും.
sest
