അടിയന്തര പാതകളിൽ അതിക്രമിച്ചു കയറുന്നവർക്ക് പൂട്ടിടാൻ ബഹ്റൈൻ; സ്മാർട്ട് ട്രാഫിക് സംവിധാനത്തിന് ശുപാർശ
പ്രദീപ് പുറവങ്കര
മനാമ: ഗതാഗതക്കുരുക്കുള്ള സമയങ്ങളിൽ ഹൈവേകളിലെ മഞ്ഞ വര മറികടന്ന് എമർജൻസി ലൈനിലൂടെ വാഹനമോടിക്കുന്നവർക്കെതിരെ കർശന നടപടി വേണമെന്ന പ്രമേയം ബഹ്റൈൻ പാർലമെന്റിൽ സമർപ്പിച്ചു. എം.പി ഡോ. മുനീർ സരൂർ സമർപ്പിച്ച അടിയന്തര പ്രമേയത്തിൽ, ആർട്ടിഫിഷ്യൽ ഇന്റലിജൻസ് (AI) ഉൾപ്പെടെയുള്ള ആധുനിക സാങ്കേതികവിദ്യ ഉപയോഗിച്ച് ഇത്തരം നിയമലംഘനങ്ങൾ തടയണമെന്ന് ആവശ്യപ്പെടുന്നു.
മഞ്ഞ വരയ്ക്കപ്പുറമുള്ള പാത പല ഡ്രൈവർമാരും അധികമായി ലഭിക്കുന്ന റോഡ് സൗകര്യമായാണ് കാണുന്നതെന്ന് ഡോ. സരൂർ ചൂണ്ടിക്കാട്ടി. ഇത് ആംബുലൻസുകൾ, സിവിൽ ഡിഫൻസ് വാഹനങ്ങൾ, പോലീസ് പട്രോളിംഗ് എന്നിവയുടെ യാത്ര തടസ്സപ്പെടുത്തുകയും മനുഷ്യജീവൻ അപകടത്തിലാക്കുകയും ചെയ്യുന്നു. നിലവിലെ പിഴകൾ കൊണ്ട് മാത്രം ഈ പ്രവണത തടയാനാകുന്നില്ലെന്നും സ്മാർട്ട് ക്യാമറകളും മികച്ച റോഡ് ഡിസൈനും ഇതിനായി വേണമെന്നും അദ്ദേഹം പറഞ്ഞു.
കഴിഞ്ഞ മാർച്ച് മാസത്തിലെ കണക്കുകൾ പ്രകാരം നാഷണൽ ആംബുലൻസ് വിഭാഗം മാത്രം 4,498 കോളുകൾക്കാണ് മറുപടി നൽകിയത്. ഇതിൽ 323 റോഡപകടങ്ങളും ഉൾപ്പെടുന്നു. സിവിൽ ഡിഫൻസ് 1,674 റിപ്പോർട്ടുകൾ കൈകാര്യം ചെയ്തു. ഓരോ നിമിഷവും വിലപ്പെട്ടതാണെന്നിരിക്കെ, എമർജൻസി ലൈനിലെ തടസ്സങ്ങൾ രക്ഷാപ്രവർത്തനത്തെ സാരമായി ബാധിക്കുന്നുണ്ടെന്ന് കണക്കുകൾ വ്യക്തമാക്കുന്നു.
കൂടാതെ, മൈഗവ് (MyGov) ആപ്പ് വഴി മാർച്ചിൽ 1,906 റിപ്പോർട്ടുകളാണ് ലഭിച്ചത്. ഇതിൽ സൈബർ ക്രൈം വിഭാഗത്തിലാണ് ഏറ്റവും കൂടുതൽ കേസുകൾ (892) റിപ്പോർട്ട് ചെയ്തത്. അഴിമതി വിരുദ്ധ വിഭാഗം, സാമ്പത്തിക കുറ്റകൃത്യങ്ങൾ തടയുന്ന വിഭാഗം എന്നിവയ്ക്കും ആപ്പ് വഴി പരാതികൾ ലഭിച്ചിട്ടുണ്ട്. ജനങ്ങളുടെ സുരക്ഷ ഉറപ്പാക്കാൻ ഡിജിറ്റൽ സംവിധാനങ്ങൾ കൂടുതൽ ശക്തമാക്കാനാണ് അധികൃതർ ലക്ഷ്യമിടുന്നത്.
dfgdfg
