യുഎഇയിലെ വാഹനാപകടങ്ങളിൽ ഭൂരിഭാഗവും ചെറുകിട വാഹനങ്ങൾ മൂലം; കഴിഞ്ഞ വർഷം നടന്നത് 6,014 അപകടങ്ങൾ
പ്രദീപ് പുറവങ്കര I ഗൾഫ്
യുഎഇയിൽ കഴിഞ്ഞ വർഷം റിപ്പോർട്ട് ചെയ്ത വാഹനാപകടങ്ങളിൽ ഏറ്റവും കൂടുതൽ ഉൾപ്പെട്ടത് ചെറുകിട വാഹനങ്ങളാണെന്ന് (Light Vehicles) ആഭ്യന്തര മന്ത്രാലയം പുറത്തുവിട്ട കണക്കുകൾ വ്യക്തമാക്കുന്നു. ആകെ റിപ്പോർട്ട് ചെയ്ത 6,014 അപകടങ്ങളിൽ 3,834 എണ്ണവും ഇത്തരം വാഹനങ്ങൾ മൂലമാണ് ഉണ്ടായത്. 1,224 അപകടങ്ങളുമായി മോട്ടോർ സൈക്കിളുകൾ രണ്ടാം സ്ഥാനത്തും 325 അപകടങ്ങളുമായി വലിയ ട്രക്കുകൾ മൂന്നാം സ്ഥാനത്തുമുണ്ട്.
സൈക്കിളുകൾ (158), വലിയ ബസുകൾ (131), ഇലക്ട്രിക് സ്കൂട്ടറുകൾ (120), ചെറിയ ബസുകൾ (115), ഇ-ബൈക്കുകൾ (62) എന്നിങ്ങനെയാണ് മറ്റ് വാഹനങ്ങൾ ഉൾപ്പെട്ട അപകടങ്ങളുടെ കണക്ക്. ആകെ നടന്ന അപകടങ്ങളിൽ 4,085 എണ്ണം വാഹനങ്ങൾ തമ്മിൽ കൂട്ടിയിടിച്ചും, 1,102 എണ്ണം കാൽനടയാത്രക്കാരെ ഇടിച്ചും, 800 എണ്ണം വാഹനങ്ങൾ മറിഞ്ഞും ഉണ്ടായവയാണ്. പെട്ടെന്ന് ദിശ മാറുന്നതും (Sudden Swerving) ഡ്രൈവിംഗിനിടയിലെ ശ്രദ്ധക്കുറവുമാണ് അപകടങ്ങളുടെ പ്രധാന കാരണങ്ങളായി അധികൃതർ ചൂണ്ടിക്കാട്ടുന്നത്.
അപകടങ്ങളിലേക്ക് നയിക്കുന്ന 160 ഓളം ഘടകങ്ങൾ മന്ത്രാലയം തിരിച്ചറിഞ്ഞിട്ടുണ്ട്. ഇതിൽ സുരക്ഷിതമായ അകലം പാലിക്കാതിരിക്കുക, അശ്രദ്ധ, സിഗ്നൽ ലംഘനം, അമിതവേഗത, ടയറുകൾ പൊട്ടിത്തെറിക്കുന്നത്, കാൽനടയാത്രക്കാർക്ക് മുൻഗണന നൽകാതിരിക്കുക എന്നിവയാണ് മുൻപന്തിയിൽ നിൽക്കുന്നത്. റോഡ് സുരക്ഷാ മാനദണ്ഡങ്ങൾ കർശനമായി പാലിക്കേണ്ടതിന്റെ ആവശ്യകതയിലേക്കാണ് ഈ കണക്കുകൾ വിരൽചൂണ്ടുന്നത്.
aa
