ഉത്തരവാദിത്തമുള്ള മാധ്യമപ്രവർത്തനം ജനാധിപത്യത്തിന്റെ നെടുംതൂണെന്ന് ബഹ്റൈൻ രാജാവ്

പ്രദീപ് പുറവങ്കര I ബഹ്റൈൻ

ലോക മാധ്യമസ്വാതന്ത്ര്യ ദിനത്തോടനുബന്ധിച്ച് ബഹ്‌റൈൻ ഭരണാധികാരി ഹിസ് മജസ്റ്റി കിംഗ് ഹമദ് ബിൻ ഈസ അൽ ഖലീഫ രാജ്യത്തെ മാധ്യമപ്രവർത്തകർക്കായി പ്രത്യേക സന്ദേശം നൽകി. ഉത്തരവാദിത്തമുള്ള മാധ്യമസ്വാതന്ത്ര്യവും അഭിപ്രായസ്വാതന്ത്ര്യവുമാണ് ഭരണഘടനാപരമായ ഭരണത്തിന്റെയും ജനാധിപത്യ വികാസത്തിന്റെയും അടിസ്ഥാനമെന്ന് അദ്ദേഹം വീണ്ടും ഉറപ്പിച്ചു പറഞ്ഞു.

മാധ്യമപ്രവർത്തകരുടെ സേവനങ്ങളെ അഭിനന്ദിച്ച രാജാവ്, ആധുനിക സമൂഹത്തിന്റെ ചൈതന്യവും മനസാക്ഷിയുമാണ് സ്വതന്ത്രമായ മാധ്യമപ്രവർത്തനമെന്ന് ഓർമ്മിപ്പിച്ചു. യുനെസ്കോയുടെ ഈ വർഷത്തെ പ്രമേയമായ "അവകാശങ്ങളുടെ ഭാവി രൂപപ്പെടുത്തുക" (Shaping a Future of Rights) എന്നതിനെ മുൻനിർത്തി, സമാധാനം പ്രോത്സാഹിപ്പിക്കുന്നതിലും സ്ഥിരത നിലനിർത്തുന്നതിലും വസ്തുനിഷ്ഠമായ മാധ്യമപ്രവർത്തനത്തിന് വലിയ പങ്കുണ്ടെന്ന് അദ്ദേഹം ചൂണ്ടിക്കാട്ടി.

ബഹ്‌റൈന്റെ ദേശീയ ഐക്യത്തെയും സാമൂഹിക കെട്ടുറപ്പിനെയും കുറിച്ച് പരാമർശിച്ച രാജാവ്, അയൽരാജ്യങ്ങളുമായുള്ള സഹകരണം, സന്തുലിതമായ നയതന്ത്രം എന്നിവയിൽ അധിഷ്ഠിതമായ രാജ്യത്തിന്റെ നിലപാട് ആവർത്തിച്ചു. പ്രാദേശികമായ വെല്ലുവിളികളുടെ പശ്ചാത്തലത്തിൽ ബഹ്‌റൈൻ സൈന്യത്തിന്റെയും സുരക്ഷാ സേനയുടെയും സന്നദ്ധതയെ അദ്ദേഹം പ്രശംസിച്ചു. രാജ്യത്തിന്റെ സുരക്ഷയ്ക്കും പരമാധികാരത്തിനും കാവൽനിൽക്കാൻ ജനങ്ങളുടെ ഐക്യത്തിന് സാധിക്കുമെന്ന് അദ്ദേഹം പറഞ്ഞു.

രാജാവിന്റെ സന്ദേശത്തെ ബഹ്‌റൈൻ ഡിഫൻസ് ഫോഴ്സ് കമാൻഡർ-ഇൻ-ചീഫ് സ്വാഗതം ചെയ്തു. ദേശീയ സുരക്ഷയും ഐക്യവും വിട്ടുവീഴ്ചയില്ലാത്ത മുൻഗണനകളാണെന്നും രാജ്യത്തെ തകർക്കാനുള്ള നീക്കങ്ങൾക്കെതിരെ ശക്തമായ പ്രതിരോധം ഉണ്ടാകുമെന്നും ഡിഫൻസ് ലീഡർഷിപ്പ് വ്യക്തമാക്കി. രാജാവിന്റെ മാർഗ്ഗനിർദ്ദേശങ്ങൾ രാജ്യത്തിന്റെ താൽപ്പര്യത്തിന് മുൻഗണന നൽകുന്ന ചരിത്രപരമായ തീരുമാനമാണെന്നും അവർ കൂട്ടിച്ചേർത്തു.