കെഎംസിസി ബഹ്‌റൈൻ ലേഡീസ് വിങ് പ്രവർത്തനങ്ങൾക്ക് തുടക്കമായി

പ്രദീപ് പുറവങ്കര I ബഹ്റൈൻ:

മനാമ: പ്രവാസി വനിതകളുടെ സാമൂഹികവും സാംസ്‌കാരികവുമായ ഉന്നമനം ലക്ഷ്യമിട്ട് കെഎംസിസി ബഹ്‌റൈൻ ലേഡീസ് വിങ് 2025–2026 പ്രവർത്തന വർഷത്തിന് തുടക്കം കുറിച്ചു. മനാമയിലെ സയ്യിദ് ഹൈദരലി ശിഹാബ് തങ്ങൾ ഓഡിറ്റോറിയത്തിൽ നടന്ന ചടങ്ങിൽ കുട്ടികളുടെ കലാപരിപാടികൾ മാറ്റുകൂട്ടി. ലേഡീസ് വിങ് പ്രസിഡന്റ് മാഹിറ ഷമീറിന്റെ അധ്യക്ഷതയിൽ നടന്ന സമ്മേളനം കെഎംസിസി ബഹ്‌റൈൻ സംസ്ഥാന പ്രസിഡന്റ് ഹബീബ് റഹ്മാൻ ഉദ്‌ഘാടനം ചെയ്തു. പ്രവാസി സമൂഹത്തിന്റെ എല്ലാ മേഖലകളിലും സ്ത്രീകളുടെ സജീവമായ സാന്നിധ്യം ഉറപ്പാക്കേണ്ടത് അത്യാവശ്യമാണെന്ന് അദ്ദേഹം തന്റെ പ്രസംഗത്തിൽ ഓർമ്മിപ്പിച്ചു.

ചടങ്ങിൽ മുഖ്യാതിഥിയായി പങ്കെടുത്ത മലപ്പുറം ജില്ലാ പഞ്ചായത്ത് വൈസ് പ്രസിഡന്റ് അഡ്വ. എ. പി. സ്മിജി സ്ത്രീകളുടെ നേതൃത്വപരമായ പങ്കാളിത്തത്തെ പ്രകീർത്തിച്ചു. വിദ്യാഭ്യാസ, ആരോഗ്യ രംഗങ്ങളിൽ പ്രവാസി വനിതാ സംഘടനകൾ നടത്തുന്ന ഇടപെടലുകൾ സമൂഹത്തിന് വലിയ മാതൃകയാണെന്ന് അവർ അഭിപ്രായപ്പെട്ടു. ചടങ്ങിന്റെ ഭാഗമായി ‘ഹരിത സ്പർശം’ എന്ന പേരിൽ തയ്യാറാക്കിയ പ്രത്യേക സപ്ലിമെന്റ് അഡ്വ. എ. പി. സ്മിജി സംസ്ഥാന വൈസ് പ്രസിഡന്റ് അബ്ദുൾ അസീസ് സാഹിബിന് നൽകി പ്രകാശനം ചെയ്തു. ലേഡീസ് വിങ്ങിന്റെ വിവിധ പ്രവർത്തന പദ്ധതികളെക്കുറിച്ച് ഓർഗനൈസിംഗ് സെക്രട്ടറി ജസ്‌ന കരിപ്പായി സദസ്സിന് വിശദീകരിച്ചു നൽകി.

കെഎംസിസി നേതാക്കളായ ശംസുദ്ധീൻ വെള്ളിക്കുളങ്ങര, കെ. പി. മുസ്തഫ, കുട്ടൂസ മുണ്ടേരി, ഡോ. നസീഹ എന്നിവർ ചടങ്ങിൽ ആശംസകൾ നേർന്നു. ലേഡീസ് വിങ് ഭാരവാഹികളായ സബിത അബ്ദുൾ ഖാദർ, റിസ്‌വി അബ്ദുൾ ലത്തീഫ്, ജസീല ഷഹീർ തുടങ്ങിയവരുടെ നേതൃത്വത്തിൽ പരിപാടികൾ ക്രമീകരിച്ചു. ജനറൽ സെക്രട്ടറി അഫ്ര തസ്‌നീം സ്വാഗതവും ട്രഷറർ നസീമ ഷുഹൈബ് നന്ദിയും രേഖപ്പെടുത്തിയതോടെ ചടങ്ങുകൾ സമാപിച്ചു. പ്രവാസി വനിതകളുടെ വലിയ തോതിലുള്ള പങ്കാളിത്തം കൊണ്ട് ഈ പ്രവർത്തനോദ്‌ഘാടനം ശ്രദ്ധേയമായി.