പാനൂരിലെ മുസ്‌ലിം ലീഗ് പ്രവർത്തകൻ മൻസൂറിന്‍റെ കൊലപാതകം ആസൂത്രിതമെന്ന് പി.കെ കുഞ്ഞാലിക്കുട്ടി
മലപ്പുറം: പാനൂരിലെ മുസ്‌ലിംലീഗ് പ്രവർത്തകൻ മൻസൂറിന്‍റെ കൊലപാതകം ആസൂത്രിതമെന്ന് മുസ്‌ലിംലീഗ് ദേശീയ ജനറൽ സെക്രട്ടറി പി.കെ കുഞ്ഞാലിക്കുട്ടി. നിലവിലെ അന്വേഷണത്തിൽ വിശ്വാസമില്ല. മൻസൂറിന്‍റെ കുടുംബത്തിന് നീതി ഉറപ്പാക്കാൻ നിയമപരമായി ഏതറ്റവും വരെയും പോകും എന്നും കുഞ്ഞാലിക്കുട്ടി പറഞ്ഞു. രാഷ്ട്രീയ സംഘട്ടനമല്ല കൊലപാതകങ്ങൾക്ക് കാരണം. അടുത്തിടെയുണ്ടായ കൊലപാതകങ്ങൾക്കെല്ലാം സാമ്യമുണ്ട്. കൊല്ലണമെന്ന് ഉറപ്പിച്ച് വെട്ടി നുറുക്കുകയാണ് ചെയ്തത്. പ്രതികൾക്ക് നിയമത്തെക്കുറിച്ച് യാതൊരു ആശങ്കയുമില്ല.
പോലീസിനെ സ്വന്തം ആവശ്യങ്ങൾക്ക് സർക്കാർ ദുരുപയോഗം ചെയ്യുന്നു. അന്വേഷണ സംഘത്തിന്‍റെ മേധാവി തന്നെ കേസ് അട്ടിമറിക്കാനുള്ള ഉദ്യോഗസ്ഥനാണ്. പഴയതുപോലെ കേസുകൾ തേച്ചു മായ്ച്ചു കളയാമെന്ന് സർക്കാർ കരുതേണ്ട എന്നും കുഞ്ഞാലിക്കുട്ടി പറഞ്ഞു.
