കേരളത്തിൽ അപൂർവയിനം മലമ്പനി
തിരുവനന്തപുരം : കേരളത്തെ ഭീതിയിലാഴ്ത്തി പുതിയതരം മലമ്പനി. പ്ലാസ്‌മോഡിയം ഒവേൽ ജനുസ്സിൽപ്പെട്ട മലമ്പനിയാണ് റിപ്പോർട്ട് ചെയ്യപ്പെട്ടിരിക്കുന്നത്. ആദ്യമായാണ് കേരളത്തിൽ ഇത്തരത്തിലൊരു മലമ്പനി റിപ്പോർട്ട് ചെയ്യപ്പെടുന്നതെന്ന് ആരോഗ്യവിദഗ്ദ്ധർ ചൂണ്ടിക്കാട്ടുന്നു.
കണ്ണൂർ ജില്ലാ ആശുപത്രിയിൽ ചികിത്സയിലായിരുന്ന സൈനികനിലാണ് രോഗബാധ കണ്ടെത്തിയത്. സുഡാനിൽ നിന്നും വന്ന സൈനികനിലാണ് മലമ്പനി രോഗലക്ഷണങ്ങൾ കണ്ടെത്തിയത്. ആരോഗ്യമന്ത്രി കെ കെ ഷൈലജയാണ് ഇക്കാര്യം ട്വിറ്ററിലൂടെ അറിയിച്ചത്. സൈനികനെ വിശദമായി പരിശോധിച്ചതിനു ശേഷമാണ് പ്ലാസ്‌മോഡിയം ഒവേൽ ജനുസ്സിൽപ്പെട്ട് മലമ്പനിയാണെന്ന് ആശുപത്രി അധികൃതർ സ്ഥിരീകരിച്ചത്. സുരക്ഷ മാനദണ്ഡങ്ങൾ പാലിച്ച് രോഗ വ്യാപനം തടയണമെന്നും പ്രതിരോധം ഊർജിതമാക്കണമെന്നും ആരോഗ്യമന്ത്രി ആവശ്യപ്പെട്ടു.
സാധാരണയായി ആഫ്രിക്കൻ രാജ്യങ്ങളിലാണ് ഈ രോഗം കൂടുതലായി കണ്ടുവരുന്നത്. സുഡാനിൽ നിന്നാകാം ജവാന് രോഗം ബാധിച്ചത് എന്നും സംശയിക്കുന്നു.
