ഇറാനിലെ ലക്ഷ്യങ്ങൾ ഏതാണ്ട് അവസാനിച്ചു; യുദ്ധം ഉടൻ അവസാനിക്കുമെന്ന് ഡോണൾഡ് ട്രംപ്
പ്രദീപ് പുറവങ്കര I ബഹ്റൈൻ
വാഷിംഗ്ടൺ: ഇറാനുമായുള്ള യുദ്ധം ഉടൻ അവസാനിക്കുമെന്ന് യുഎസ് പ്രസിഡന്റ് ഡോണൾഡ് ട്രംപ്. ഇറാനിൽ ഇനി ലക്ഷ്യമിടാൻ കാര്യമായി ഒന്നുമില്ലാത്തതിനാലാണ് യുദ്ധം അവസാന ഘട്ടത്തിലേക്ക് നീങ്ങുന്നതെന്ന് ട്രംപ് വ്യക്തമാക്കി. വാർത്താ വെബ്സൈറ്റായ 'ആക്സിയോസിനോട്' (Axios) അഞ്ച് മിനിറ്റ് നീണ്ട ഫോൺ സംഭാഷണത്തിലാണ് അദ്ദേഹം ഇക്കാര്യം വെളിപ്പെടുത്തിയത്.
"യുദ്ധം വളരെ കൃത്യമായി മുന്നോട്ട് പോകുന്നു. നിശ്ചയിച്ച സമയത്തേക്കാൾ മുൻപേ ഞങ്ങൾ ലക്ഷ്യങ്ങൾ പൂർത്തിയാക്കി. ആദ്യ ആറാഴ്ച കൊണ്ട് ഉദ്ദേശിച്ചതിനേക്കാൾ വലിയ നാശനഷ്ടങ്ങൾ ഇറാനുണ്ടാക്കാൻ ഞങ്ങൾക്ക് സാധിച്ചു," ട്രംപ് പറഞ്ഞു. പശ്ചിമേഷ്യ മുഴുവൻ കൈക്കലാക്കാൻ ഇറാൻ ആഗ്രഹിച്ചിരുന്നെന്നും കഴിഞ്ഞ 47 വർഷമായി അവർ വിതച്ച നാശത്തിന് ഇപ്പോൾ വില നൽകുകയാണെന്നും അദ്ദേഹം കൂട്ടിച്ചേർത്തു.
അമേരിക്കയുടെ സൈനിക നടപടി ലക്ഷ്യങ്ങൾ കൈവരിച്ചതായി ട്രംപ് പരസ്യമായി സൂചിപ്പിക്കുന്നുണ്ടെങ്കിലും, പോരാട്ടം എന്ന് അവസാനിപ്പിക്കണം എന്നതിനെക്കുറിച്ച് ഔദ്യോഗിക നിർദ്ദേശങ്ങളൊന്നും ഇതുവരെ നൽകിയിട്ടില്ലെന്ന് യുഎസ്, ഇസ്രായേൽ ഉദ്യോഗസ്ഥർ സ്ഥിരീകരിച്ചു. "ചില ലളിതമായ കാര്യങ്ങൾ കൂടി ബാക്കിയുണ്ട്, അവ എപ്പോൾ വേണമെന്ന് ഞാൻ തീരുമാനിക്കുന്നുവോ അപ്പോൾ അത് നടന്നിരിക്കും," എന്നായിരുന്നു ട്രംപിന്റെ പ്രതികരണം.
aa
