ചെറിയ പെരുന്നാൾ ആഘോഷത്തിൽ രാജ്യം ; ഭക്തിസാന്ദ്രമായി ഈദ് ഗാഹുകൾ
മനാമ : ഒരു മാസം നീണ്ടു നിന്ന ഭക്തിസാന്ദ്രമായ വ്രതകാലത്തിന് പരിസമാപ്തി കുറിച്ചുകൊണ്ട് കടന്ന് വന്ന പെരുന്നാൾ ആഘോഷമാക്കി വിശ്വാസികൾ. വ്യാഴാഴ്ച അൽപ്പം വൈകിയാണ് റമ്ദാൻ പിറ കണ്ടതായി അറിയിപ്പ് വന്നതെങ്കിലും അപ്പോൾ തന്നെ ആരാധനാലയങ്ങൾ പ്രാർത്ഥനകൾകൊണ്ട് മുഖരിതമായി. വിശ്വാസികൾ വീടിന് പുറത്തേയ്ക്ക് ഇറങ്ങിയതോടെ റോഡുകളിൽ വാഹനങ്ങളുടെ നിര തന്നെ പ്രത്യക്ഷപ്പെട്ട് തുടങ്ങി. കടകൾ രാത്രി ഏറെ വൈകുവോളം പ്രവർത്തിച്ചു. ഷോപ്പിംഗ് മാളുകളിലും സൂപ്പർ മാർക്കറ്റുകളിലും അഭൂതപൂർവ്വമായ തിരക്കാണ് പിന്നീട് അനുഭവപ്പെട്ടത്. പ്രധാനമായും വസ്ത്രവ്യാപാര സ്ഥാപനങ്ങളിൽ ഉപഭോക്താക്കളുടെ വലിയ തിരക്കാണ് അനുഭവപ്പെട്ടത്. വർഷത്തിലൊരിക്കൽ തുടർച്ചയായി ലഭിക്കുന്ന അവധി ആഘോഷിക്കാൻ വിവിധ ലേബർ ക്യാന്പുകളിൽ നിന്നുള്ളവരും നഗരങ്ങളിലേയ്ക്കിറങ്ങി. സുഹൃത്തുക്കളുടെ വീടുകൾ സന്ദർശിച്ചും അത്താഴവിരുന്നൊരുക്കിയും പലരും വീടുകളിൽ ഒത്തുചേർന്നു.
പെരുന്നാൾ ദിനത്തിൽ പുലർച്ചെ മുതൽ പുത്തൻ ഉടുപ്പുകളിട്ട വിശ്വാസികൾ പള്ളികളിലേയ്ക്ക് പ്രാർത്ഥകൾക്കായി എത്തിച്ചേർന്നിരുന്നു. സ്വദേശികൾ എന്നോ വിദേശികൾ എന്നോ വ്യത്യാസമില്ലാതെ ആയിരങ്ങളാണ് വിവിധ പ്രദേശങ്ങളിൽ നടന്ന ഈദ് ഗാഹുകളിൽ സംബന്ധിച്ചത്. ഔഖാഫിന്റെ ആഭിമുഖ്യത്തിലുള്ള ഈദ് ഗാഹുകളിൽ മലയാളി പ്രവാസി സംഘടനകളും ഈദ് ഗാഹുകൾ സംഘടിപ്പിച്ചിരുന്നു.
ബഹ്റൈൻ സുന്നി ഔഖാഫിന്റെ കീഴിൽ ‘തർബിയ ഇസ്ലാമിക് സൊസൈറ്റി’യുടെ ആഭിമുഖ്യത്തിൽ ഹൂറ ഉമ്മു അയ്മൻ ഗേൾസ് ഹൈ സ്കൂൾ, ഉമ്മുൽഹസം സ്പോർട്സ് ക്ലബ് ഗ്രൗണ്ട് എന്നിവിടങ്ങളിലായി നടന്ന ചെറിയ പെരുന്നാൾ നമസ്ക്കാരങ്ങളിൽ ആയിരക്കണക്കിന് വിശ്വാസികൾ സംബന്ധിച്ചു. സമീർ ഫാറൂഖി, യഹ്യ സി.ടി എന്നിവർ നേതൃത്വം നൽകി. വൈറസ് രോഗങ്ങളും പ്രകൃതി ദുരന്തങ്ങളും നമ്മെ വീണ്ടും വീണ്ടും ഓർമ്മിപ്പിക്കുന്നതും ഈ നിസ്സാരതയും നൈമിഷികതയും തന്നെയാണെന്നും അദ്ദേഹം കൂട്ടിച്ചേർത്തു. വ്രതാനുഷ്ഠാനം പോലുള്ള ആരാധനാ കർമ്മങ്ങൾ വഴി കൂടുതൽ വിനയാന്വതരായി നാം മാറണമെന്നും അദ്ദേഹം ആഹ്വാനം ചെയ്തു. അബ്ദുൽ അസീസ് ടി.പി, അബ്ദുൽ ഗഫൂർ പാടൂർ, യാക്കൂബ് ഈസാ, ലത്തീഫ് ചാലിയം, ഹംസ കെ. ഹമദ്, അഷ്റഫ് പാടൂർ, ഹംസ കൊയിലാണ്ടി തുടങ്ങിയവർ പരിപാടികൾക്ക് നേതൃത്വം നൽകി.
ഐ.സി.എഫ് ഉമ്മുൽഹസം സെൻട്രൽ കമ്മിറ്റി ഈദ് സംഗമം നടത്തി. പെരുന്നാൾ നിസ്കാരത്തിന് ശേഷം നടന്ന സംഗമത്തിൽ നിരവധിപേർ ഒത്തുകൂടി ഈദ് ആശംസകൾ അർപ്പിച്ചു. ഉമ്മുൽഹസം സുന്നി സെന്ററിൽ നടന്ന പരിപാടിയിൽ മർകസ് പി.ആർ.ഒ മർസൂഖ് സഅദി പാപ്പിനിശ്ശേരി ഈദ് സന്ദേശം നൽകി.
വിശുദ്ധ റമദാൻ മാസത്തിൽ നമ്മൾ കൈകൊണ്ട ആത്മവിശുദ്ധി കൈവിടാതെ ബന്ധങ്ങൾ കൂട്ടിയുറപ്പിക്കാൻ ശ്രമിക്കണമെന്നും, ബന്ധങ്ങൾ തമ്മിലുള്ള സ്നേഹം കൂടുന്പോഴാണ് നമ്മുടെ ജീവിതത്തിൽ അനുഗ്രഹം ഉണ്ടാവുക എന്നും അദ്ദേഹം ഈദ് സന്ദേശത്തിൽ അറിയിച്ചു. മൊഹിയുദ്ദീൻകുട്ടി ഹസനി അദ്ധ്യക്ഷനായിരുന്ന പരിപാടിയിൽ സയ്യിദ് ബാഫഖി തങ്ങൾ, സകറിയ സി.പി, നൗഷാദ് കാസർഗോഡ് എന്നിവർ എല്ലാവർക്കും ഈദ് ആശംസകൾ അർപ്പിച്ചു. മദ്രസ വിദ്യാർത്ഥി മുഹമ്മദ് സഈദ് കബീർ, സഫ്വാൻ സനദ് മാസ് എന്നിവർ ഈദ് ഇശൽ ആലപിച്ചു. പരിപാടിയിൽ മധുരപലഹാരവും പായസവും വിതരണം ചെയ്തു. മരണപ്പെട്ടവർക്ക് വേണ്ടി പ്രത്യേകം ദുആ മജ്ലിസംഘടിപ്പിച്ചു.
ചെറിയ പെരുന്നാളിന്റെ രണ്ടാം ദിവസമായ ഇന്ന് വിവിധ സംഘടനകളുടെ ആഭിമുഖ്യത്തിൽ വിവിധ കലാപരിപാടികളും സംഘടിപ്പിച്ചിട്ടുണ്ട്.
