ആലിയിലെ തെരുവ് കച്ചവടക്കാർക്കെതിരെ പ്രചരണം സംഘടിപ്പിച്ചു
മനാമ: ആലിയിൽ അനധികൃത തെരുവ് കച്ചവടം നടത്തുന്നതിനെതിരെ വടക്കൻ മേഖല മുനിസിപ്പാലിറ്റി പ്രചരണ പരിപാടികൾ സംഘടിപ്പിച്ചു. ആലിയിലെ ചരിത്രപ്രാധാന്യമുള്ള മൺപാത്ര ഫാക്ടറിയിൽ നിന്നും കുറച്ചു മീറ്ററുകൾ അകലെ വടക്കൻ ഗവർണറേറ്റിലുൾപ്പെടുന്ന സ്ഥലത്താണ് ഈ പ്രചരണം നടത്തിയത്. ഇവിടെ നിന്നുള്ള മുനിസിപ്പൽ കൗൺസിൽ പ്രതിനിധി അബ്ദുള്ള അഷൂർ, ലേബർ മാർക്കറ്റ് റെഗുലേറ്ററി അതോറിറ്റി (എൽ.എം.ആർ.എ) സുരക്ഷാ അധികൃതർ, അർബസെർ ക്ലീനിംഗ് കന്പനി എന്നിവരുമായി സഹകരിച്ചാണ് പ്രചരണം നടത്തിയതെന്ന് മുനിസിപ്പാലിറ്റി അറിയിച്ചു.
തെരുവ് കച്ചവടക്കാർ അനധികൃതമായി അനാരോഗ്യകരമായ ഉൽപ്പന്നങ്ങൾ വിൽക്കുന്നത് തടയുന്നതിനും, കച്ചവടക്കാരുടെ പെരുമാറ്റത്തിലുള്ള പ്രദേശവാസികളുടെ വർദ്ധിച്ചുവരുന്ന പരാതികൾ തീർക്കുന്നതിനും ലക്ഷ്യമിട്ടാണ് പ്രചരണം നടത്തുന്നതെന്ന് മുനിസിപ്പാലിറ്റി അധികൃതർ പറഞ്ഞു. ഭക്ഷണപദാർത്ഥങ്ങൾ, മാംസം, മത്സ്യം, നിരോധിത പുകയില ഉൽപ്പനങ്ങളുടെ വിൽപ്പന എന്നിവയ്ക്കൊപ്പം ഇവിടെ അനധികൃത ടാക്സി സേവനങ്ങളും വ്യാപകമാണെന്ന് ഇവർ വ്യക്തമാക്കി. ഇവിടെയുള്ള ഭൂരിഭാഗം കച്ചവടക്കാരും രാജ്യത്ത് താമസിക്കുന്നത് നിയമവിരുദ്ധമായാണെന്നും മിക്കവർക്കും യാതൊരു രേഖകളും ഇല്ലെന്നും ഇവർ അറിയിച്ചു.
