ബഹ്റൈനിൽ 131 സർക്കാർ സേവനങ്ങൾ ഡിജിറ്റലാക്കി
പ്രദീപ് പുറവങ്കര
മനാമ: സേവനങ്ങളുടെ ഗുണനിലവാരം ഉയർത്തുന്നതിനും നടപടിക്രമങ്ങൾ ലളിതമാക്കുന്നതിനുമുള്ള പദ്ധതികളുടെ ഭാഗമായി ബഹ്റൈനിൽ 131 സർക്കാർ സേവനങ്ങൾ പൂർണ്ണമായും ഡിജിറ്റൽ രൂപത്തിലേക്ക് മാറ്റി. 2026 ജനുവരി 15 മുതൽ ഓഗസ്റ്റ് 13 വരെയുള്ള കാലയളവിൽ 22 സർക്കാർ സ്ഥാപനങ്ങളിലായിട്ടാണ് ഈ നവീകരണം നടപ്പിലാക്കിയത്. രാസവസ്തുക്കൾ വാങ്ങുന്നതിനുള്ള അപേക്ഷകൾ ഡിജിറ്റലാക്കൽ, ട്രേഡ്മാർക്ക് രജിസ്ട്രേഷൻ ലളിതമാക്കൽ, സാമൂഹിക ക്ഷേമ പദ്ധതികളുടെ ഗുണഭോക്താക്കൾക്ക് വിവരങ്ങൾ ഓൺലൈനായി പുതുക്കാനുള്ള സൗകര്യം തുടങ്ങിയവയാണ് പ്രധാന മാറ്റങ്ങൾ. കൂടാതെ, മൂല്യവർദ്ധിത നികുതി (VAT) രജിസ്ട്രേഷനും വിവരങ്ങൾ പുതുക്കലും വേഗത്തിലാക്കുകയും, തൊഴിൽ അന്വേഷകർക്ക് നിശ്ചിത അഭിമുഖങ്ങൾ ഡിജിറ്റലായി മാറ്റിവെക്കാനുള്ള സൗകര്യം ഏർപ്പെടുത്തുകയും ചെയ്തിട്ടുണ്ട്. സേവനങ്ങൾ 100 ശതമാനവും ഡിജിറ്റലാക്കിയതിലൂടെ സർവീസ് ലെവൽ എഗ്രിമെന്റ് (SLA) സമയപരിധി കുറഞ്ഞത് 25 ശതമാനം വരെ കുറയ്ക്കാനായി. അപേക്ഷാ നടപടികൾ പരമാവധി നാല് ഘട്ടങ്ങളിലേക്ക് ചുരുക്കാനും ഈ പദ്ധതിയിലൂടെ സാധിച്ചതായി അധികൃതർ വ്യക്തമാക്കി.
ബഹ്റൈനിൽ 131 സർക്കാർ സേവനങ്ങൾ ഡിജിറ്റലാക്കിcdcxds
