ഭക്ഷ്യവസ്തുക്കളുടെ വിലവർധനവ് തിരിച്ചടിയായി: 2026-ന്റെ ആദ്യ പകുതിയിൽ ഉപഭോക്തൃ വിലസൂചിക ഉയർന്നു

ശാരിക

ഭക്ഷ്യവസ്തുക്കളുടെ കനത്ത വിലവർധനവിനെ തുടർന്ന് ജൂൺ മാസത്തിൽ രാജ്യത്തെ ഉപഭോക്തൃ വിലസൂചികയിൽ (Cost-of-living Index) 0.9 ശതമാനം വർധനവ് രേഖപ്പെടുത്തി. 2026-ന്റെ ആദ്യ പകുതിയിലെ ഏറ്റവും ഉയർന്ന പ്രതിമാസ വർധനവാണിത്. മുൻപ് ജനുവരി മാസത്തിലും സമാനമായ വർധനവ് രേഖപ്പെടുത്തിയിരുന്നു.

മേയ് മാസത്തെ അപേക്ഷിച്ച് ജൂണിൽ ഭക്ഷണത്തിന്റെയും മദ്യമേതര പാനീയങ്ങളുടെയും വിലയിൽ 6.5 ശതമാനത്തിന്റെ വൻ വർധനവാണ് ഉണ്ടായിട്ടുള്ളത്. ഇക്കാലയളവിൽ വിവിധ മേഖലകളിലുണ്ടായ വിലക്കയറ്റത്തിൽ ഏറ്റവും ഉയർന്ന നിരക്കാണിത്. ഉപഭോക്തൃ വിലസൂചിക ഉയരുന്നതിന് പ്രധാന കാരണമായതും ഭക്ഷ്യമേഖലയിലെ ഈ വിലവർധനവാണ്.

വിനോദം, സംസ്കാരം എന്നീ മേഖലകളിൽ 1.2 ശതമാനവും മദ്യം, പുകയില ഉൽപ്പന്നങ്ങൾ എന്നിവയിൽ 0.7 ശതമാനവും വില വർധിച്ചു. വീട്ടുവാടക, ജലം, വൈദ്യുതി, ഗ്യാസ് ഉൾപ്പെടെയുള്ള ഇന്ധനങ്ങൾ എന്നിവയുടെ ചെലവിൽ 0.5 ശതമാനം വർധനവുണ്ടായി. ഫർണിച്ചർ, വീട്ടുപകരണങ്ങൾ, അറ്റകുറ്റപ്പണികൾ എന്നിവയുടെ ചെലവ് 0.1 ശതമാനം ഉയർന്നു.

വർഷത്തിന്റെ ആദ്യ പകുതിയിലെ ആറു മാസങ്ങളിൽ നാലു മാസങ്ങളിലും വിലസൂചിക ഉയരുകയായിരുന്നു. ഫെബ്രുവരിയിൽ മാത്രമാണ് സൂചിക താഴേക്ക് പോയത്. ഏപ്രിൽ മാസത്തിൽ മാറ്റമില്ലാതെ തുടർന്നു.

മേയ് മാസത്തിൽ ഉപഭോക്തൃ വിലസൂചിക 0.4 ശതമാനം ഉയർന്നതിന് പിന്നാലെയാണ് ജൂണിലെ വർധനവ്. മേയിൽ റെസ്റ്റോറന്റുകൾ, ഹോട്ടലുകൾ എന്നിവയുടെ നിരക്കിലുണ്ടായ 1.1 ശതമാനം വർധനവാണ് പ്രധാന കാരണമായത്. ഫർണിച്ചർ, വീട്ടുപകരണങ്ങൾ (0.9%), ഭക്ഷണം, മദ്യമേതര പാനീയങ്ങൾ (0.7%), വസ്ത്രങ്ങൾ, പാദരക്ഷകൾ (0.3%), വീട്ടുവാടക, ഇന്ധനം (0.3%) എന്നിങ്ങനെയും മേയിൽ നിരക്കുകൾ ഉയർന്നു.

ഏപ്രിൽ മാസത്തിൽ പ്രധാന വിലസൂചികയിൽ മൊത്തത്തിൽ മാറ്റമൊന്നും രേഖപ്പെടുത്തിയില്ലെങ്കിലും ചില പ്രത്യേക മേഖലകളിൽ വൻ വിലക്കയറ്റം ദൃശ്യമായി. വിനോദം, സംസ്കാരം എന്നീ മേഖലകളിൽ ഏപ്രിലിൽ 22.5 ശതമാനത്തിന്റെ വൻ കുതിച്ചുചാട്ടമുണ്ടായി. ആദ്യ ആറുമാസത്തിനിടെ ഒരു മേഖലയിലുണ്ടാകുന്ന ഏറ്റവും ഉയർന്ന പ്രതിമാസ വർധനവാണിത്. കൂടാതെ റെസ്റ്റോറന്റ്-ഹോട്ടൽ നിരക്കുകൾ 1.5 ശതമാനവും ഗതാഗത ചെലവ് 0.9 ശതമാനവും വർധിച്ചു. മാർച്ചിൽ സൂചിക 0.4 ശതമാനം ഉയർന്നപ്പോൾ ഭക്ഷ്യവസ്തുക്കളുടെ വിലയിൽ 4.8 ശതമാനം വർധനവ് രേഖപ്പെടുത്തിയിരുന്നു. ഗതാഗത ചെലവ് 1.3 ശതമാനവും വാർത്താവിനിമയ ചെലവ് 0.2 ശതമാനവും മാർച്ചിൽ ഉയർന്നു.

വർഷത്തിലെ ആദ്യ ആറുമാസത്തിൽ വിലസൂചിക കുറഞ്ഞ ഒരേയൊരു മാസം ഫെബ്രുവരിയാണ്. എങ്കിലും വസ്ത്രങ്ങൾ, പാദരക്ഷകൾ (1.5%), മദ്യം, പുകയില (0.5%), വീട്ടുവാടക, വാർത്താവിനിമയം (0.3%) എന്നിവയുടെ നിരക്കുകൾ ഫെബ്രുവരിയിലും ഉയർന്നുതന്നെ നിന്നു.

2025 ഡിസംബറിനെ അപേക്ഷിച്ച് 0.9 ശതമാനം വർധനവോടെയാണ് 2026 ജനുവരി ആരംഭിച്ചത്. ജനുവരിയിൽ വിനോദ മേഖലയിൽ 5.9 ശതമാനവും ഗതാഗത മേഖലയിൽ 3.5 ശതമാനവും റെസ്റ്റോറന്റ്-ഹോട്ടൽ മേഖലയിൽ 1.3 ശതമാനവും വർധനവുണ്ടായി.
മൊത്തത്തിൽ പരിശോധിക്കുമ്പോൾ 2026-ന്റെ ആദ്യ പകുതിയിൽ ഭക്ഷണം, മദ്യമേതര പാനീയങ്ങൾ, വിനോദം, ഗതാഗതം, ഹോട്ടൽ-റെസ്റ്റോറന്റ്, ഗാർഹിക ഉപകരണങ്ങൾ എന്നിവയുടെ വിലയിലാണ് ഏറ്റവും വലിയ വർധനവ് രേഖപ്പെടുത്തിയത്.