ഭിന്നശേഷിക്കാർക്ക് കൈത്താങ്ങായി ബഹ്‌റൈൻ; സർക്കാർ സർവീസിലെ 72 തസ്തികകളിൽ മുൻഗണന

പ്രദീപ് പുറവങ്കര I ബഹ്റൈൻ

മനാമ: രാജ്യത്തെ ഭിന്നശേഷിക്കാരായ ഉദ്യോഗാർത്ഥികളെ തൊഴിൽ വിപണിയുടെ മുഖ്യധാരയിലേക്ക് കൊണ്ടുവരുന്നതിനായി സുപ്രധാന നീക്കങ്ങളുമായി ബഹ്‌റൈൻ സർക്കാർ. സിവിൽ സർവീസ് കമ്മീഷനുമായി സഹകരിച്ച് സർക്കാർ സർവീസിലെ 72 വിവിധ തസ്തികകളിൽ ഭിന്നശേഷിക്കാർക്ക് മുൻഗണന നൽകാൻ തൊഴിൽ മന്ത്രാലയം തീരുമാനിച്ചു. പാർലമെന്റിൽ എം.പി. മുഹമ്മദ് അൽ മാരിഫിയുടെ ചോദ്യത്തിന് മറുപടിയായി തൊഴിൽ, നിയമകാര്യ മന്ത്രി യൂസിഫ് ഖലാഫ് ആണ് ഈ വിവരം അറിയിച്ചത്.

സാമ്പത്തിക കാര്യങ്ങൾ, അഡ്മിനിസ്ട്രേഷൻ, സാങ്കേതിക മേഖലകൾ എന്നിവയുമായി ബന്ധപ്പെട്ട അക്കൗണ്ടിംഗ്, കമ്പ്യൂട്ടിംഗ്, ഓഡിറ്റിംഗ്, ഡാറ്റ അനാലിസിസ്, കോൾ സെന്റർ തുടങ്ങിയ തസ്തികകളിലാണ് ഇവർക്ക് പ്രധാനമായും അവസരം ലഭിക്കുക. 2006-ലെ 74-ാം നമ്പർ നിയമപ്രകാരം ഭിന്നശേഷിക്കാർക്ക് അനുയോജ്യമായ ജോലികൾ ഉറപ്പാക്കാൻ മന്ത്രാലയത്തിന് അധികാരമുണ്ട്. എന്നാൽ ഓരോ വ്യക്തിയുടെയും ശാരീരിക അവസ്ഥകൾ വ്യത്യസ്തമായതിനാൽ, ഒരു പൊതു പട്ടിക തയ്യാറാക്കുന്നതിനേക്കാൾ ഓരോരുത്തരുടെയും പ്രത്യേക കഴിവുകൾ പരിശോധിച്ച് നിയമനം നടത്തുന്നതാണ് കൂടുതൽ പ്രായോഗികമെന്ന് മന്ത്രി വിശദീകരിച്ചു.

സ്വകാര്യ മേഖലയിൽ ഭിന്നശേഷിക്കാരായ ഉദ്യോഗാർത്ഥികളെ നിയമിക്കുന്നത് പ്രോത്സാഹിപ്പിക്കുന്നതിനായി 'തംകീനുമായി' (Tamkeen) ചേർന്ന് ആകർഷകമായ വേതന പിന്തുണ പദ്ധതിയും സർക്കാർ നടപ്പിലാക്കുന്നുണ്ട്. ഈ പദ്ധതി പ്രകാരം നിയമിക്കപ്പെടുന്ന ഭിന്നശേഷിക്കാരായ ജീവനക്കാരുടെ ശമ്പളത്തിന്റെ 80 ശതമാനം ആദ്യ വർഷവും, 60 ശതമാനം രണ്ടാം വർഷവും, 40 ശതമാനം മൂന്നാം വർഷവും സർക്കാർ വഹിക്കും. സാധാരണ ഉദ്യോഗാർത്ഥികൾക്ക് ലഭിക്കുന്നതിനേക്കാൾ ഉയർന്ന നിരക്കിലുള്ള പിന്തുണയാണിത്. കൂടാതെ, സ്വകാര്യ സ്ഥാപനങ്ങളിൽ ഭിന്നശേഷിക്കാരനായ ഒരു ജീവനക്കാരനെ നിയമിക്കുന്നത് 'ബഹ്‌റൈനൈസേഷൻ' തോത് കണക്കാക്കുമ്പോൾ രണ്ട് സ്വദേശികളെ നിയമിച്ചതിന് തുല്യമായി പരിഗണിക്കും എന്നതും വലിയൊരു ആനുകൂല്യമാണ്.

നിലവിലെ കണക്കുകൾ പ്രകാരം 2025 ഒക്ടോബർ വരെ 288 ഭിന്നശേഷിക്കാർ ജോലിക്ക് അപേക്ഷിച്ചിട്ടുണ്ട്. എന്നാൽ ഇവർക്കായി 1,589 ഒഴിവുകൾ നിലവിൽ ലഭ്യമാണ്. 50-ലധികം ജീവനക്കാരുള്ള കമ്പനികളിൽ കുറഞ്ഞത് രണ്ട് ശതമാനം പേരെങ്കിലും ഭിന്നശേഷിക്കാരായിരിക്കണം എന്നാണ് നിയമം അനുശാസിക്കുന്നത്. നിലവിൽ 1,302 ഭിന്നശേഷിക്കാർ സ്വകാര്യ മേഖലയിൽ ജോലി ചെയ്യുന്നുണ്ട്. നിയമം പാലിക്കാത്ത കമ്പനികൾക്കെതിരെ കർശന നടപടി സ്വീകരിക്കുന്നതിനൊപ്പം തന്നെ, തൊഴിലിടങ്ങളിൽ ഇവർക്കാവശ്യമായ സൗകര്യങ്ങൾ ഒരുക്കാനുള്ള മാർഗ്ഗനിർദ്ദേശങ്ങൾ നൽകാനും മന്ത്രാലയം പ്രത്യേക ശ്രദ്ധ നൽകുന്നുണ്ടെന്ന് മന്ത്രി വ്യക്തമാക്കി. ബഹ്‌റൈൻ പൗരന്മാർക്ക് മുൻഗണന നൽകുന്നതിനൊപ്പം ശാരീരിക വെല്ലുവിളികൾ നേരിടുന്നവർക്ക് അന്തസ്സുള്ള തൊഴിൽ ഉറപ്പാക്കുകയാണ് ഈ പദ്ധതിയിലൂടെ ലക്ഷ്യമിടുന്നത്.