വാർത്തകളിൽ ‘ദളിത് ’ വേണ്ടെന്ന് കേന്ദ്രത്തോട് ഹൈക്കോടതി
മുംബൈ : വാർത്താ റിപ്പോർട്ടിംഗിൽ ദളിത് എന്ന പ്രയോഗം ഒഴിവാക്കാൻ നിർദ്ദേശം. ഇത് സംബന്ധിച്ച് മാധ്യമങ്ങൾക്ക് നിർദ്ദേശം നൽകണമെന്ന് വാർത്താ വിതരണ പ്രക്ഷേപണ മന്ത്രാലയത്തോടും പ്രസ് കൗൺസിലിനോടും മുംബൈ ഹൈക്കോടതിയുടെ നാഗ്പുർ ബെഞ്ച് ആവശ്യപ്പെട്ടു. സർക്കാർ രേഖകളിൽനിന്ന് ദളിത് എന്ന വാക്ക് ഒഴിവാക്കണമെന്ന് ആവശ്യം ഉന്നയിച്ച് പങ്കജ് മെശ്രാം എന്നയാൾ നൽകിയ പൊതുതാൽപ്പര്യ ഹർജിയിലാണ് കോടതിയുടെ നിർദ്ദേശം.
ദളിത് പ്രയോഗത്തിന് പകരം പട്ടികജാതി, പട്ടികവർഗ്ഗം എന്ന് ഉപയോഗിക്കണമെന്ന് നിർദ്ദേശിച്ച് മാർച്ച് 15ന് കേന്ദ്ര സാമൂഹികനീതി വകുപ്പ് പുറത്തിറക്കിയ ഉത്തരവ് പ്രാബല്യത്തിലാക്കാനും കേന്ദ്ര - സംസ്ഥാന സർക്കാരുകളോട് കോടതി നിർദ്ദേശിച്ചു. ഇതിനായുള്ള നടപടികൾ പുരോഗമിക്കുകയാണെന്ന് മഹാരാഷ്ട്ര സർക്കാർ കോടതിയെ അറിയിച്ചു.
