ബിൽക്കിസ് ബാനു കേസ്: രണ്ട് പ്രതികളുടെ ശിക്ഷ മരവിപ്പിച്ച് സുപ്രീം കോടതി ജാമ്യം അനുവദിച്ചു
ഷീബ വിജയൻ
ന്യൂഡൽഹി: 2002-ലെ ബിൽക്കിസ് ബാനു കൂട്ടബലാത്സംഗക്കേസിൽ ജീവപര്യന്തം തടവിന് ശിക്ഷിക്കപ്പെട്ട രണ്ട് പ്രതികളുടെ ശിക്ഷാവിധി സുപ്രീം കോടതി മരവിപ്പിച്ചു. ഇവർക്ക് കോടതി ജാമ്യം അനുവദിച്ചു. ജസ്റ്റിസുമാരായ എം.എം. സുന്ദരേഷ്, പ്രസന്ന ബി. വരാലെ എന്നിവരടങ്ങിയ ബെഞ്ചാണ് നിർണായക ഉത്തരവ് പുറപ്പെടുവിച്ചത്. 17 വർഷത്തിലേറെയായി തടവുകാരായി കഴിയുന്ന ഇരുവരുടെയും ആരോഗ്യസ്ഥിതിയും ശാരീരിക വൈകല്യങ്ങളും പരിഗണിച്ചാണ് കോടതി നടപടി. നേരത്തെ 2017-ൽ ബോംബെ ഹൈക്കോടതി ഇവരുടെ ജീവപര്യന്തം തടവുശിക്ഷ ശരിവെച്ചിരുന്നു. ഈ വിധിക്ക് എതിരെ പ്രതികൾ സമർപ്പിച്ച അപ്പീലുകൾ പരിഗണിക്കുന്നതിനിടയിലാണ് കോടതിയുടെ ഉത്തരവ്.
കേസിൽ നേരത്തെ ശിക്ഷിക്കപ്പെട്ട 11 പ്രതികളെ 2022-ൽ ഗുജറാത്ത് സർക്കാർ വിട്ടയച്ചിരുന്നുവെങ്കിലും, പിന്നീട് 2024-ൽ സുപ്രീം കോടതി ആ നടപടി പൂർണ്ണമായി റദ്ദാക്കിയിരുന്നു. പ്രതികൾക്കായി ഹാജരായ മുതിർന്ന അഭിഭാഷകൻ സിദ്ധാർത്ഥ് ലൂത്ര, ഇവർ 17 വർഷത്തിലധികമായി ജയിൽവാസം അനുഭവിക്കുന്നുണ്ടെന്നും, പ്രതികളിൽ ഒരാളുടെ പേര് യഥാർത്ഥ എഫ്.ഐ.ആറിൽ ഉണ്ടായിരുന്നില്ലെന്നും മൂന്ന് വർഷത്തിന് ശേഷമാണ് പ്രതിചേർത്തതെന്നും കോടതിയെ അറിയിച്ചു. കൂടാതെ മറ്റൊരു പ്രതിയുടെ ശാരീരിക ബുദ്ധിമുട്ടുകളും ചൂണ്ടിക്കാണിച്ചു. എന്നാൽ, കുറ്റകൃത്യത്തിന്റെ ഗൗരവം കണക്കിലെടുത്ത് ജാമ്യാപേക്ഷയെ കേന്ദ്രസർക്കാരിനുവേണ്ടി ഹാജരായ അഡീഷണൽ സോളിസിറ്റർ ജനറൽ രാജാ താക്കറെ ശക്തമായി എതിർത്തു. എങ്കിലും, എല്ലാ വശങ്ങളും പരിശോധിച്ചാണ് ജാമ്യം അനുവദിക്കുന്നതെന്ന് വ്യക്തമാക്കിയ ബെഞ്ച്, ജാമ്യത്തിനുള്ള കർശന വ്യവസ്ഥകൾ ബന്ധപ്പെട്ട വിചാരണക്കോടതിക്ക് തീരുമാനിക്കാമെന്നും ഉത്തരവിട്ടു.
adsassadads


