'ഈ വർഷം തന്നെ ബംഗ്ലാദേശിലേക്ക് മടങ്ങും': പ്രഖ്യാപനവുമായി ഷെയ്ഖ് ഹസീന
ഷീബ വിജയൻ
ഈ വർഷം തന്നെ സ്വന്തം രാജ്യത്തേക്ക് മടങ്ങുമെന്ന് ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീന വ്യക്തമാക്കി. എൻ.ഡി.ടി.വിക്ക് നൽകിയ പ്രത്യേക അഭിമുഖത്തിലാണ് അവർ ഈ ഉറച്ച തീരുമാനം പങ്കുവെച്ചത്. രാജ്യത്തെ ജനങ്ങളുമായുള്ള ബന്ധം അവസാനിച്ചിട്ടില്ലെന്നും ബംഗ്ലാദേശിന്റെ ഭാവിയിൽ തനിക്ക് ഇപ്പോഴും ഉത്തരവാദിത്വമുണ്ടെന്നും പറഞ്ഞ അവർ, ന്യൂനപക്ഷങ്ങൾക്ക് നേരെയുള്ള ആക്രമണം രാജ്യത്തിന്റെ സ്വാതന്ത്ര്യ മൂല്യങ്ങൾക്കെതിരായ ആക്രമണമാണെന്ന് ഓർമ്മിപ്പിച്ചു. വിദ്യാർത്ഥി പ്രക്ഷോഭവുമായി ബന്ധപ്പെട്ടുണ്ടായ അക്രമങ്ങളിൽ ഹസീന കുറ്റക്കാരിയാണെന്ന് ബംഗ്ലാദേശ് കോടതി വിധിക്കുകയും വധശിക്ഷ ഉൾപ്പെടെ പ്രഖ്യാപിക്കുകയും ചെയ്തിട്ടുണ്ടെങ്കിലും, ഇതൊന്നും തന്നെ നാട്ടിലേക്ക് മടങ്ങുന്നതിൽ നിന്ന് പിന്തിരിപ്പിക്കില്ലെന്ന് അവർ വ്യക്തമാക്കി. തോൽവി ഭയന്നാണ് എതിരാളികൾ അവാമി ലീഗിനെ തെരഞ്ഞെടുപ്പിൽ മത്സരിക്കാൻ അനുവദിക്കാതിരുന്നതെന്നും അവാമി ലീഗിന്റെ രാഷ്ട്രീയ അവകാശങ്ങൾക്കായി പോരാട്ടം തുടരുമെന്നും അവർ കൂട്ടിച്ചേർത്തു. ഹസീനയുടെ മടങ്ങിവരവ് പ്രഖ്യാപനം ബംഗ്ലാദേശിലെ നിലവിലെ ഭരണകൂടത്തിന് പുതിയ വെല്ലുവിളികൾ സൃഷ്ടിക്കുമെന്നും അവാമി ലീഗിന്റെ ഉയിർത്തെഴുന്നേൽപ്പിന് കാരണമായേക്കുമെന്നുമാണ് രാഷ്ട്രീയ നിരീക്ഷകരുടെ വിലയിരുത്തൽ.
aswswddassa
