ട്രെയിനുകളിൽ രാത്രി 11 മുതൽ രാവിലെ 5 വരെ മൊബൈൽ ചാർജിംഗ് പോയിന്റുകൾ ഓഫ് ചെയ്യാൻ നിർദേശം; സുരക്ഷ മുൻനിർത്തി റെയിൽവേയുടെ കർശന നടപടി

ശാരിക

ന്യൂഡൽഹി: റെയിൽവേ ബോർഡിന്റെ നിർദേശപ്രകാരം ട്രെയിൻ കോച്ചുകളിലെ മൊബൈൽ ചാർജിംഗ് പോയിന്റുകൾ രാത്രി 11 മണി മുതൽ രാവിലെ 5 മണി വരെ നിർബന്ധമായും ഓഫ് ചെയ്യാൻ ഇന്ത്യൻ റെയിൽവേ എല്ലാ സോണൽ റെയിൽവേകൾക്കും നിർദേശം നൽകി. ഈ കാര്യത്തിൽ യാതൊരുവിധ ഇളവുകളും നൽകില്ലെന്ന് റെയിൽവേ വ്യക്തമായി അറിയിച്ചിട്ടുണ്ട്. യാത്രക്കാരുടെ സുരക്ഷ മുൻനിർത്തി ഒക്ടോബർ 26-നാണ് ഈ ഉത്തരവ് കർശനമായി പാലിക്കാൻ ആവശ്യപ്പെട്ടുകൊണ്ട് കത്ത് അയച്ചത്.

ട്രെയിനിൽ ചാർജ് ചെയ്യുന്നതിനിടെ യാത്രക്കാരന്റെ പവർ ബാങ്ക് പൊട്ടിത്തെറിച്ച സംഭവത്തെ തുടർന്നാണ് സുരക്ഷാ നടപടികൾ വീണ്ടും ശക്തമാക്കിയത്. മുംബൈ-ഹൗറ മെയിൻ (ട്രെയിൻ നമ്പർ 12809 ഡൗൺ) ബി-3 എസി കോച്ചിൽ ചാർജ് ചെയ്യുന്നതിനിടെ പവർ ബാങ്ക് പൊട്ടിത്തെറിക്കുകയും, തുടർന്ന് ഫയർ അലാറം മുഴങ്ങി കോച്ചിൽ പുക നിറയുകയും ചെയ്യുകയായിരുന്നു. ഒക്ടോബർ 24-25 തീയതികളിൽ പുലർച്ചെ 3.38-ഓടെ ഒഡീഷയിലെ ചക്രധർപൂർ റെയിൽവേ ഡിവിഷനിലെ ബന്ദമുണ്ട സ്റ്റേഷന് സമീപത്തുവെച്ചാണ് ഈ അപകടമുണ്ടായത്. ചാർജിംഗ് പോയിന്റുകൾ കൃത്യസമയത്ത് ഓഫ് ചെയ്യുന്നതിൽ ഓൺ-ബോർഡ് ജീവനക്കാർ വീഴ്ച വരുത്തിയതായി സൗത്ത് ഈസ്റ്റേൺ റെയിൽവേ റിപ്പോർട്ട് ചെയ്തിരുന്നു. റെയിൽവേ ബോർഡ് എല്ലാ സോണൽ റെയിൽവേകളുടെയും പ്രിൻസിപ്പൽ ചീഫ് മെക്കാനിക്കൽ എൻജിനീയർമാർക്ക് അയച്ച ഈ ആഭ്യന്തര കത്ത് ഇതുവരെ പൊതു മന്ത്രാലയ പോർട്ടലുകളിൽ അപ്‌ലോഡ് ചെയ്തിട്ടില്ല.

ഇലക്ട്രോണിക് ഉപകരണങ്ങൾ അമിതമായി ചൂടാകുന്നതും ചാർജിംഗ് ഉപകരണങ്ങളുടെ തകരാറുകളും വൈദ്യുതി തടസ്സങ്ങളും വലിയ തീപിടിത്ത സാധ്യത ഉയർത്തുന്നതിനാലാണ് റെയിൽവേ ഇത്തരമൊരു മുൻകരുതൽ സ്വീകരിച്ചത്. രാത്രിയിൽ യാത്ര ചെയ്യുന്നവർ യാത്ര ആരംഭിക്കുന്നതിന് മുൻപുതന്നെ മൊബൈൽ ഫോണുകളും മറ്റ് ഉപകരണങ്ങളും ചാർജ് ചെയ്ത് സൂക്ഷിക്കേണ്ടതും രാത്രി 11 മണിക്ക് ശേഷം ചാർജിംഗ് പോയിന്റുകളെ ആശ്രയിക്കാതിരിക്കാനും ശ്രദ്ധിക്കേണ്ടതുണ്ട്.