വിരമിക്കൽ പ്രഖ്യാപനത്തിന് പിന്നാലെ വൻ തിരിച്ചുവരവ്; ആവാരപ്പൻ 2-വിൽ അരിജിത് സിങ്
ഷീബ വിജയൻ
ബോളിവുഡിലെ ഏറ്റവും പ്രതീക്ഷയോടെ കാത്തിരിക്കുന്ന ചിത്രങ്ങളിലൊന്നായ 'ആവാരപ്പൻ 2'ന്റെ സംഗീത ലോകത്ത് നിന്ന് വലിയൊരു സർപ്രൈസ് വാർത്ത പുറത്തുവരുന്നു. സിനിമയിലെ പുതിയ ഗാനമായ 'ye aavarapan' ആലപിക്കാൻ പ്രശസ്ത ഗായകൻ അരിജിത് സിങ് വീണ്ടും മൈക്രോഫോണിന് മുന്നിലെത്തുന്നതായാണ് റിപ്പോർട്ടുകൾ. സംഗീതത്തിൽ നിന്ന് വിരമിക്കുമെന്ന് അടുത്തിടെ പ്രഖ്യാപിച്ച അരിജിത്തിന്റെ ഈ പെട്ടെന്നുള്ള തിരിച്ചുവരവ് ആരാധകരിൽ വലിയ ആവേശമാണ് സൃഷ്ടിച്ചിരിക്കുന്നത്.
ചിത്രത്തിന്റെ നിർമ്മാതാവായ വിശേഷ് ഭട്ടുമായി അരിജിത്തിന് വർഷങ്ങളായുള്ള ആത്മബന്ധമാണുള്ളത്. 'മർഡർ 2'ലെ ഫിർ മൊഹബ്ബത് മുതൽ 'ആഷിഖി 2'ലെ തും ഹി ഹോ, ഹമാരി അധൂരി കഹാനി, ഖാമോഷിയാൻ, ജലേബിയിലെ പൽ തുടങ്ങി നിരവധി ഹിറ്റ് ഗാനങ്ങൾ ഈ കൂട്ടുകെട്ടിൽ നിന്നാണ് പിറന്നത്. ഇപ്പോൾ അതേ മനോഹരമായ സംഗീത ബന്ധം വീണ്ടും ആവാരപ്പൻ 2-ലൂടെ തുടരുകയാണ്.
അമാൽ മാലിക് സംഗീതം നൽകിയിരിക്കുന്ന ഈ പുതിയ ഗാനത്തിന് വരികൾ എഴുതിയിരിക്കുന്നത് രശ്മി വിരാഗ് ആണ്. ഈ വരുന്ന ജൂലൈ 21 മുതൽ എല്ലാ പ്രധാന മ്യൂസിക് സ്ട്രീമിംഗ് പ്ലാറ്റ്ഫോമുകളിലും ഗാനം ലഭ്യമാകും. ഇതിന് മുമ്പ് ചിത്രത്തിലെ ആദ്യഗാനമായ 'Ve Junoon' പുറത്തിറങ്ങി വലിയ ശ്രദ്ധ നേടിയിരുന്നു. ഇമ്രാൻ ഹാഷ്മി, ദിഷാ പടാനി, ഷബാന ആസ്മി, സുവിന്ദർ വികി എന്നിവർ പ്രധാന കഥാപാത്രങ്ങളാകുന്ന 'ആവാരപ്പൻ 2' സംവിധാനം ചെയ്യുന്നത് നിതിൻ കക്കർ ആണ്. വിശേഷ് ഫിലിംസിന്റെ ബാനറിൽ ഒരുങ്ങുന്ന ചിത്രം ഓഗസ്റ്റ് 14, 2026-ന് ലോകമെമ്പാടും തിയേറ്ററുകളിലെത്തും.
asadsas
