പരിസ്ഥിതി സംരക്ഷണ സന്ദേശവുമായി ഇന്ത്യൻ സ്കൂൾ ജൂനിയർ കാമ്പസിൽ ഭൗമദിനം ആഘോഷിച്ചു
പ്രദീപ് പുറവങ്കര I ബഹ്റൈൻ
മനാമ: പരിസ്ഥിതി അവബോധം വളർത്തുന്നതിനായി ഇന്ത്യൻ സ്കൂൾ ജൂനിയർ കാമ്പസിലെ കെ.ജി, പ്രൈമറി വിഭാഗങ്ങൾ സംയുക്തമായി ഭൗമദിനം ആഘോഷിച്ചു. ഭൂമിയെ സംരക്ഷിക്കേണ്ടതിന്റെയും പ്രകൃതിയെ പരിപാലിക്കേണ്ടതിന്റെയും പ്രാധാന്യം വിളിച്ചോതുന്ന വൈവിധ്യമാർന്ന പ്രവർത്തനങ്ങളാണ് ആഘോഷത്തിന്റെ ഭാഗമായി നടന്നത്. ഓൺലൈൻ സെഷനുകളിലൂടെ വിദ്യാർത്ഥികൾ തങ്ങളുടെ വീടുകളിൽ ഇരുന്നാണ് പരിപാടികളിൽ സജീവമായി പങ്കെടുത്തത്.
വിത്തുകൾ മുളപ്പിക്കുന്ന പ്രവർത്തനമായിരുന്നു ആഘോഷത്തിലെ പ്രധാന ആകർഷണം. കുട്ടികൾ സ്വന്തമായി വിത്തുകൾ നട്ടുപിടിപ്പിക്കുകയും അവയുടെ വളർച്ച ഓൺലൈൻ ക്ലാസുകളിൽ പ്രദർശിപ്പിക്കുകയും ചെയ്തു. സസ്യവളർച്ചയുടെ ഘട്ടങ്ങൾ നേരിട്ട് മനസ്സിലാക്കാൻ ഈ പ്രായോഗിക പഠനം കുട്ടികളെ സഹായിച്ചു.
ഭൗമദിനത്തിന്റെ പ്രാധാന്യം വിവരിക്കുന്ന പ്രസംഗങ്ങൾ, പ്രകൃതി സംരക്ഷണ സന്ദേശങ്ങൾ ഉൾക്കൊള്ളുന്ന പോസ്റ്റർ നിർമ്മാണം എന്നിവയും പരിപാടിയുടെ ഭാഗമായി നടന്നു. ഭൂമിയെയും പ്രകൃതിയെയും പ്രതീകപ്പെടുത്തുന്ന നീല വസ്ത്രങ്ങൾ ധരിച്ചാണ് വിദ്യാർത്ഥികളും അധ്യാപകരും ചടങ്ങിൽ സംബന്ധിച്ചത്.
സുസ്ഥിരമായ ശീലങ്ങൾ വളർത്തിയെടുക്കുന്നതിന്റെ ഭാഗമായി, വിദ്യാർത്ഥികൾ അവരുടെ ഓരോ ജന്മദിനത്തിലും ഓരോ മരം നടണമെന്ന പുതിയ നിർദ്ദേശം സ്കൂൾ മുന്നോട്ടുവെച്ചു. കുട്ടികളുടെ ആവേശകരമായ പങ്കാളിത്തത്തെ ഇന്ത്യൻ സ്കൂൾ ചെയർമാൻ അഡ്വ. ബിനു മണ്ണിൽ വറുഗീസ്, സെക്രട്ടറി വി. രാജപാണ്ഡ്യൻ, പ്രിൻസിപ്പൽ പമേല സേവ്യർ, വൈസ് പ്രിൻസിപ്പൽ പ്രിയ ലാജി എന്നിവർ അഭിനന്ദിച്ചു.
്േി്േി
