സംസ്ഥാനത്ത് കോവിഡ് പരിശോധന നിരക്ക് കുറച്ചു; ആര്.ടി.പി.സി.ആറിന് 1500 രൂപ
തിരുവനന്തപുരം: സംസ്ഥാനത്തെ ലാബുകളിലെ കൊവിഡ്-19 പരിശോധനകള്ക്കുള്ള നിരക്ക് കുറച്ചതായി ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര് അറിയിച്ചു. ഇതനുസരിച്ച് ആര്.ടി.പി.സി.ആര് (ഓപ്പണ്) ടെസ്റ്റിന് 1500 രൂപ, എക്സ്പേര്ട്ട് നാറ്റ് ടെസ്റ്റിന് 2500 രൂപ, ട്രൂ നാറ്റ് ടെസ്റ്റിന് 1500 രൂപ, ആര്ടി-ലാന്പിന് 1150 രൂപ, റാപ്പിഡ് ആന്റിജന് ടെസ്റ്റിന് 300 രൂപ എന്നിങ്ങനെയാണ് പുതുക്കിയ നിരക്ക്.
എല്ലാ വ്യക്തി സുരക്ഷാ ഉപകരണങ്ങളും സ്വാബിംഗ് ചാര്ജുകളും ടെസ്റ്റുമായി ബന്ധപ്പെട്ട മറ്റെല്ലാം ചാര്ജുകളും ഉള്പ്പടെയുള്ളതാണ് ഈ നിരക്ക്. ഈ നിരക്കുകള് പ്രകാരം മാത്രമേ ഐസിഎംആര്/സംസ്ഥാന അംഗീകൃത ലബോറട്ടറികള്ക്കും, ആശുപത്രികള്ക്കും കൊവിഡ് പരിശോധന നടത്താന് കഴിയുകയുള്ളൂ. ഈ നിരക്കില് കൂടുതല് ആരും ഈടാക്കരുതെന്നും മന്ത്രി വ്യക്തമാക്കി. സംസ്ഥാനത്ത് ഇത് രണ്ടാം തവണയാണ് കൊവിഡ്-19 പരിശോധനയ്ക്കുള്ള നിരക്ക് കുറയ്ക്കുന്നത്.
