കെപിസിസി അധ്യക്ഷൻ ആരാകും? രാഹുലിനെയും പ്രിയങ്കയെയും നേരിട്ടുകണ്ട് രമേശ് ചെന്നിത്തല
ഷീബ വിജയൻ
ന്യൂഡൽഹി: ആഭ്യന്തരമന്ത്രി രമേശ് ചെന്നിത്തല കോൺഗ്രസ് നേതാക്കളായ രാഹുൽ ഗാന്ധി, പ്രിയങ്ക ഗാന്ധി എന്നിവരുമായി കൂടിക്കാഴ്ച നടത്തി. കെപിസിസി അധ്യക്ഷ നിയമനവുമായി ബന്ധപ്പെട്ടായിരുന്നു കൂടിക്കാഴ്ച. എത്രയും വേഗം കെപിസിസി അധ്യക്ഷനെ തീരുമാനിക്കണമെന്ന് കോൺഗ്രസ് നേതൃത്വത്തോട് ആവശ്യപ്പെട്ടതായി ചർച്ചയ്ക്ക് ശേഷം മന്ത്രി രമേശ് ചെന്നിത്തല മാധ്യമങ്ങളോട് പറഞ്ഞു.
സംസ്ഥാന കോൺഗ്രസ് നേതൃത്വത്തിന് ഒരു മുഴുവൻ സമയ അധ്യക്ഷൻ വേണമെന്നാണ് പ്രവർത്തകരുടെ പൊതു വികാരം. അത് താൻ പ്രിയങ്കാ ഗാന്ധിയെയും അറിയിച്ചു. മുഴുവൻ സമയ കെപിസിസി പ്രസിഡന്റിനെ അധികം വൈകാതെ തീരുമാനിക്കണമെന്ന് കോൺഗ്രസ് നേതൃത്വത്തോട് അഭ്യർത്ഥിച്ചു. എന്നാൽ പ്രത്യേകമായി പേരുകൾ ചർച്ച ചെയ്തില്ലെന്നും രമേശ് ചെന്നിത്തല വ്യക്തമാക്കി.
പ്രവർത്തക സമിതി യോഗത്തിൽ പങ്കെടുക്കാനായാണ് ആഭ്യന്തരമന്ത്രി രമേശ് ചെന്നിത്തല ഡൽഹിയിലെത്തിയത്. കോൺഗ്രസ് ദേശീയ അധ്യക്ഷൻ മല്ലികാർജുൻ ഖാർഗെയെയും രമേശ് ചെന്നിത്തല കാണുന്നുണ്ട്. ഓണം കഴിഞ്ഞ് സെപ്റ്റംബർ ആദ്യവാരത്തിൽ കെപിസിസി അധ്യക്ഷ നിയമന ചർച്ചകൾ ഹൈക്കമാൻഡ് ഊർജ്ജിതമാക്കിയേക്കും.
അതേസമയം ഏതു സമയവും കെപിസിസി പ്രസിഡന്റിനെ തെരഞ്ഞെടുത്തേക്കാമെന്ന് മന്ത്രി സണ്ണി ജോസഫ് പറഞ്ഞു. കോൺഗ്രസ് ജനാധിപത്യ പാർട്ടിയാണെന്നും ചർച്ചകൾ ഇനിയും ഉണ്ടായേക്കാമെന്നും അദ്ദേഹം കൂട്ടിച്ചേർത്തു. ഒരാൾക്ക് ഒരു പദവി എന്നുള്ള നിബന്ധനയൊന്നും കോൺഗ്രസ് ഭരണഘടനയിലില്ലെന്നും സണ്ണി ജോസഫ് വ്യക്തമാക്കി. കെപിസിസി അധ്യക്ഷനിയമനവുമായി ബന്ധപ്പെട്ട് കഴിഞ്ഞ ദിവസം മുഖ്യമന്ത്രി വി.ഡി. സതീശൻ എഐസിസി ജനറൽ സെക്രട്ടറി കെ.സി. വേണുഗോപാലുമായി കൂടിക്കാഴ്ച നടത്തിയിരുന്നു.
vdffdsdf
