സാമ്പത്തിക വളർച്ചയും നിക്ഷേപങ്ങളും ലക്ഷ്യമാക്കി ബഹ്റൈനിൽ ഇഡിബി ബോർഡ് യോഗം ചേർന്നു
പ്രദീപ് പുറവങ്കര
മനാമ: കിരീടാവകാശിയും പ്രധാനമന്ത്രിയും ബഹ്റൈൻ എക്കണോമിക് ഡെവലപ്‌മെന്റ് ബോർഡ് (ഇഡിബി) ചെയർമാനുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫയുടെ അധ്യക്ഷതയിൽ ഇഡിബി ബോർഡ് ഓഫ് ഡയറക്ടേഴ്സ് യോഗം ചേർന്നു. ബഹ്റൈൻ ബേയിൽ വെച്ചായിരുന്നു യോഗം.
രാജ്യത്ത് നൂതന സാമ്പത്തിക മേഖലകൾക്ക് പിന്തുണ നൽകേണ്ടതിന്റെയും, സാമ്പത്തിക വളർച്ച ത്വരിതപ്പെടുത്തുന്നതിനും പൗരന്മാർക്ക് തൊഴിലവസരങ്ങൾ സൃഷ്ടിക്കുന്നതിനും നിക്ഷേപ പദ്ധതികൾ ശക്തിപ്പെടുത്തേണ്ടതിന്റെയും പ്രാധാന്യം കിരീടാവകാശി ഊന്നിപ്പറഞ്ഞു. ഹിസ് മജസ്റ്റി കിങ് ഹമദ് ബിൻ ഈസ അൽ ഖലീഫയുടെ നേതൃത്വത്തിലുള്ള രാജ്യത്തിന്റെ സമഗ്ര വികസനത്തിന് ഇത് കൂടുതൽ കരുത്തുപകരുമെന്നും അദ്ദേഹം വ്യക്തമാക്കി.
2026-ലെ ഇഡിബി ലക്ഷ്യങ്ങളും മുൻഗണനാ മേഖലകളിലേക്ക് നിക്ഷേപങ്ങൾ ആകർഷിക്കുന്നതിലെ പുരോഗതിയും യോഗം അവലോകനം ചെയ്തു. ടെലികോം, സാങ്കേതിക വിദ്യ, ടൂറിസം, വ്യാവസായിക മേഖലകളിലാണ് ഈ വർഷം കൂടുതൽ നിക്ഷേപങ്ങൾ എത്തിയിട്ടുള്ളതെന്ന് യോഗത്തിൽ അവതരിപ്പിച്ച റിപ്പോർട്ടിൽ വ്യക്തമാക്കുന്നു.
ഈ വർഷം മലേഷ്യയിൽ നടന്ന 22-ാമത് ഫോർമുല വൺ ഗൾഫ് എയർ ബഹ്റൈൻ ഗ്രാൻഡ് പ്രിക്സ്, മേഡ് ഇൻ ജിസിസി ഫോറം, ഫിൻടെക് ഫോർവേഡ് 2026 തുടങ്ങിയ വൻകിട പരിപാടികൾ വിജയകരമായി സംഘടിപ്പിച്ച ദേശീയ തൊഴിൽ സേനയുടെ മികവിനെ കിരീടാവകാശി പ്രശംസിച്ചു. ഇത് രാജ്യത്തിന്റെ അന്താരാഷ്ട്ര പ്രതിച്ഛായ വർദ്ധിപ്പിച്ചതായും അദ്ദേഹം കൂട്ടിച്ചേർത്തു.
സുസ്ഥിര വികസന മന്ത്രിയും ഇഡിബി സി.ഇ.ഒയുമായ നൂർ അൽ ഖുലൈഫ് 2026-ലെ പ്രവർത്തന ഫലങ്ങൾ യോഗത്തിൽ അവതരിപ്പിച്ചു. ശൈഖ് നാസർ ബിൻ ഹമദ് അൽ ഖലീഫ ഉൾപ്പെടെയുള്ള പ്രമുഖരും ബോർഡ് അംഗങ്ങളും യോഗത്തിൽ സംബന്ധിച്ചു.
dfgffg
