കേരള മുഖ്യമന്ത്രിയായി മമ്മൂട്ടി വേഷമിടുന്നു
കേരളത്തിന്റെ മുഖ്യമന്ത്രിയായി വേഷമിടാൻ ഒരുങ്ങി മമ്മൂട്ടി. ബോബി സഞ്ജയ് തിരക്കഥ എഴുതുന്ന സന്തോഷ് വിശ്വനാഥ് ചിത്രത്തിലാണ് മമ്മൂട്ടി മുഖ്യമന്ത്രിയുടെ വേഷത്തിൽ എത്തുന്നത്. ഒരു തമിഴ് ചിത്രത്തിൽ മുഖ്യമന്ത്രിയുടെ വേഷം കൈകാര്യം ചെയ്തിട്ടുണ്ടെങ്കിലും മലയാളത്തിൽ ഇതാദ്യമാണ്. മമ്മൂട്ടി മുഖ്യമന്ത്രിയുടെ വേഷം ചെയ്യാൻ തയ്യാറല്ലായിരുന്നുവെങ്കിൽ ഈ പ്രോജക്ട് ഉപേക്ഷിച്ചേനെ എന്ന് സംവിധായകൻ സന്തോഷ് വിശ്വനാഥ് പറയുന്നു.
‘സമകാലീന കേരള രാഷ്ട്രീയത്തിൽ ഒരു മുഖ്യമന്ത്രി എങ്ങനെ ആകണമെന്ന് ഉള്ളതിന്റെ ഉദാഹരണമാണ് ഈ കഥാപാത്രം എന്നതിനാൽ മമ്മൂട്ടിയെ പോലെ അഭിനയപാടവമുള്ള ഒരാൾ‍ക്ക് മാത്രമെ ഇത് ചെയ്യാനാകൂ. ഒരു കൊടിയുടെ കീഴിലോ പാർ‍ട്ടിയുടെ തണലിലോ അല്ല ഞങ്ങൾ ഈ കഥാപാത്രത്തെ അവതരിപ്പിക്കുന്നത്. പൊതുജനത്തിന്റെ നേതാവ് എന്ന നിലയിലാണ് ഈ കഥാപാത്രത്തെ അവതരിപ്പിക്കുന്നത്.’ സന്തോഷ് പറഞ്ഞു. മമ്മൂട്ടിയെ കൂടാതെ വിഷ്ണു ഉണ്ണികൃഷ്ണൻ, ശ്രീനിവാസൻ എന്നിവരും ഈ ചിത്രത്തിൽ അഭിനയിക്കുന്നുണ്ട്. സീരിയസ്സായ ഒരു വിഷയത്തിനൊപ്പം തന്നെ ഹ്യൂമറും കൈകാര്യം ചെയ്താണ് ബോബി സഞ്ജയ് തിരക്കഥ ഒരുക്കിയിരിക്കുന്നതെന്നും സന്തോഷ് പറഞ്ഞു. ഈ വർഷം അവസാനം ചിത്രത്തിന്റെ ഷൂട്ടിംഗ് ആരംഭിക്കാനാണ് പദ്ധതി.
