ലോകനാടക വാർത്തകൾ നൃത്തോത്സവം ഡിസംബർ 4ന് ആരംഭിക്കും
മനാമ:
നാടക പ്രവർത്തകരുടെ അന്താരാഷ്ട്ര ഓൺലൈൻ കൂട്ടായ്മയായ ലോക നാടക വാർത്തകൾ എൽ.എൻ.വി ബഹ്റൈൻ കേരളീയ സമാജം ചിൽഡ്രൻസ് വിങ്ങിന്റെ സഹകരണത്തോടെ സംഘടിപ്പിക്കുന്ന ഓൺലൈൻ സ്കൂൾ യുവജനോത്സവം നാലാം ഘട്ടത്തിന് ഡിസംബർ 4 ന് തിരി തെളിയും.
ഒക്ടോബർ പതിനെട്ടിന് റസൂൽ പൂക്കുട്ടി ഉദ്ഘാടനം ചെയ്ത യുവജനോത്സവത്തിലെ സർഗ്ഗോത്സവം, നാട്യോത്സവം, സംഗീതോത്സവം എന്നീ വിഭാഗങ്ങൾക്ക് ശേഷമാണ് നൃത്തോത്സവം നടക്കുന്നത്. ആദ്യ മൂന്ന് മത്സര വിഭാഗങ്ങളിലായി മുപ്പതോളം മത്സര ഇനങ്ങളിൽ ആയിരത്തോളം കുട്ടികൾ പങ്കെടുത്തു. സർഗ്ഗോത്സവം പ്രശസ്ത കവി വീരാൻ കുട്ടിയായിരുന്നു ഉദ്ഘാടനം ചെയ്തത്.
വിപുലമായ ഗ്രാന്റ് ഫിനാലെ ഡിസംബറിൽ നടക്കുമെന്ന് ബഹ്റൈൻ കേരളീയ സമാജം അംഗവും സംഘാടക സമിതി ചെയർമാനുമായ പി. എൻ. മോഹൻ രാജ് അറിയിച്ചു.
