പകൽ മുഴുവനും നാടകമൊരുക്കി ബികെഎസ് മൈക്രോ ഡ്രാമാ ഫെസ്റ്റ്
മനാമ: അവധി ദിനത്തിലെ പകൽ മുഴുവനും പത്തോളം ചെറു നാടകമൊരുക്കി ബഹ്റൈനിലെ നാടക പ്രേമികൾക്ക് ഒരു കലാദിനം കൂടി ഒരുക്കുകയാണ് ബഹ്റൈൻ കേരളീയ സമാജം സ്കൂൾ ഓഫ് ഡ്രാമാ വിഭാഗം. ഇന്ന് രാവിലെ 10.30 മുതൽ വൈകീട്ട് 4 മണിവരെയുള്ള സമയത്താണ് ബഹ്റൈനിലെ വിവിധ കൂട്ടായ്മകളും സംഘടനകളും ഒരുക്കുന്ന പത്ത് മൈക്രോ നാടകങ്ങൾ വേദിയിൽ എത്തുക. ഭാഷാ ദേശാന്തര വ്യത്യാസങ്ങളില്ലാതെ നടക്കുന്ന ഈ നാടക ദിനത്തിൽ സ്വദേശികൾ ഉൾപ്പെടെയുള്ളവരുടെ നാടകങ്ങളും അവതരിപ്പിക്കപ്പെടുന്നു എന്നുള്ളതാണ് ഏറ്റവും വലിയ പ്രത്യേകത. ഓരോ നാടകങ്ങളുടെയും ഇടവേളകളിൽ നാടകത്തെപ്പറ്റിയുള്ള അവലോകനവും നടക്കും. പ്രമുഖ നാടക സിനിമാ പ്രവർത്തകരായ അലിയാർ, മുരളി മേനോൻ എന്നിവർ ചർച്ചയിൽ സംബന്ധിക്കും.
രാവിലെ 10 മണിക്ക് ടീം സൈട്രസ് ഒരുക്കുന്ന ദി ഹാർട്ട് ബ്രോക്കൻ റൈറ്റർ എന്ന നാടകം വേദിയിലെത്തും. 11 മണിക്ക് സ്വയം കലാ നികേതൻ അവതരിപ്പിക്കുന്ന സ്ക്രീം ഓഫ് സൈലന്റ്സ്, 11.30 ന് ടീം പീസിന്റെ ഡൊമസ്റ്റിക് വയലൻസ്, 12 മണിക്ക് ജോസ് ആന്റണിയൻ സംഘവും അവതരിപ്പിക്കുന്ന ബാലി, 12.30ന് ടീം അൽ ഖദീർ അവതരിപ്പിക്കുന്ന വി ആർ ഹ്യൂമൻ, 1 മണിക്ക് ദിനേശ് കുറ്റിയിലിന്റെ ജോക്കർ, ഉച്ചയ്ക്ക് 2 മണിക്ക് ബഹ്റൈൻ പ്രതിഭയുടെ ‘ഉം’, 2.30ന് ക്വബ്ഗാ അവതരിപ്പിക്കുന്ന ഓൾ എബൗട്ട് അസ്, 3 മണിക്ക് വിശ്വകലാ സാംസകാരിക വേദിയുടെ ചുമടുതാങ്ങി അഥവാ അത്താണി 3.30 ന് ഹരീഷ് മേനോനും സംഘവും അവതരിപ്പിക്കുന്ന വാട്ട് വി മേ ബി എന്ന നാടകവും അരങ്ങിലെത്തും.


