ബഹ്‌റൈനിൽ പ്രവാസികളുടെ ഡ്രൈവിംഗ് ലൈസൻസിന് നിയന്ത്രണം വരാൻ സാധ്യത; നിയമഭേദഗതി പാർലമെന്റ് ചർച്ച ചെയ്യും

പ്രദീപ് പുറവങ്കര I ബഹ്റൈൻ

മനാമ: ബഹ്‌റൈനിലെ പ്രവാസികൾക്ക് ഡ്രൈവിംഗ് ലൈസൻസ് അനുവദിക്കുന്നതിൽ പുതിയ നിയന്ത്രണങ്ങൾ ഏർപ്പെടുത്താനുള്ള സുപ്രധാനമായ രണ്ട് നിയമഭേദഗതികൾ പാർലമെന്റ് ചർച്ച ചെയ്യും. പ്രവാസികളുടെ ലൈസൻസ് കാലാവധി അവരുടെ താമസമനുമതിയുടെ (റെസിഡൻസി പെർമിറ്റ്) കാലാവധിയുമായി ബന്ധിപ്പിക്കുക, അപേക്ഷകന്റെ ജോലി സംബന്ധമായ ആവശ്യകതകൾ കൂടി പരിഗണിച്ച് മാത്രം ലൈസൻസ് അനുവദിക്കുക എന്നിവയാണ് പാർലമെന്റ് പരിഗണിക്കുന്ന പ്രധാന നിർദ്ദേശങ്ങൾ.

രാജ്യത്തെ വർദ്ധിച്ചുവരുന്ന ഗതാഗതക്കുരുക്ക് നിയന്ത്രിക്കുക എന്ന ലക്ഷ്യത്തോടെയാണ് വിദേശകാര്യ, പ്രതിരോധ, ദേശീയ സുരക്ഷാ സമിതി ഈ മാറ്റങ്ങൾക്കായി വാദിക്കുന്നത്. രാജ്യത്തെ ജനസംഖ്യയിൽ സ്വദേശികളേക്കാൾ കൂടുതൽ പ്രവാസികളുള്ള സാഹചര്യത്തിൽ വാഹനങ്ങളുടെ എണ്ണത്തിലുണ്ടായ വർദ്ധനവ് റോഡുകളുടെ ശേഷിയേക്കാൾ അധികമാണെന്ന് സമിതി അധ്യക്ഷൻ ഹസൻ ബുഖമ്മാസ് ചൂണ്ടിക്കാട്ടി. ലൈസൻസ് കാലാവധി റെസിഡൻസി പെർമിറ്റുമായി ബന്ധിപ്പിക്കുന്നതിന് സാങ്കേതികമായി തടസ്സങ്ങളില്ലെന്നും നിലവിലെ സംവിധാനത്തിൽ ഇതിനാവശ്യമായ മാറ്റങ്ങൾ വരുത്താമെന്നുമാണ് സമിതിയുടെ നിലപാട്.

എന്നാൽ, ഈ നീക്കത്തിനെതിരെ ശക്തമായ വിയോജിപ്പുമായി സർക്കാർ രംഗത്തെത്തിയിട്ടുണ്ട്. ഈ നിർദ്ദേശങ്ങൾ നടപ്പിലാക്കുന്നത് ഭരണഘടന ഉറപ്പുനൽകുന്ന സഞ്ചാര സ്വാതന്ത്ര്യത്തിന്റെ ലംഘനമാകുമെന്ന് സർക്കാർ മുന്നറിയിപ്പ് നൽകി. നിലവിലെ ട്രാഫിക് നിയമത്തിൽ തന്നെ ആവശ്യമായ നിയന്ത്രണങ്ങൾ ഏർപ്പെടുത്താൻ സർക്കാരിന് അധികാരമുണ്ടെന്നും പുതിയ ഭേദഗതികൾ അനാവശ്യമാണെന്നും സർക്കാർ ഔദ്യോഗിക കുറിപ്പിൽ വ്യക്തമാക്കി. ഓരോ പ്രവാസിയുടെയും താമസമനുമതിയുടെ കാലാവധി വ്യത്യസ്തമായതിനാൽ ലൈസൻസ് അതുമായി ബന്ധിപ്പിക്കുന്നത് ഫീസ് ഘടനയിലും പുതുക്കുന്ന പ്രക്രിയയിലും വലിയ സങ്കീർണ്ണതകൾ സൃഷ്ടിക്കുമെന്ന് ആഭ്യന്തര മന്ത്രാലയവും ചൂണ്ടിക്കാട്ടി.

നീതിന്യായ മന്ത്രാലയവും ദേശീയ മനുഷ്യാവകാശ സ്ഥാപനവും ഈ നിയമഭേദഗതിയിൽ ആശങ്ക പ്രകടിപ്പിച്ചിട്ടുണ്ട്. അന്താരാഷ്ട്ര ഉടമ്പടികൾ പ്രകാരം ഉറപ്പുനൽകുന്ന സഞ്ചാര സ്വാതന്ത്ര്യത്തെ ഇത്തരം നിയന്ത്രണങ്ങൾ ബാധിക്കുമെന്നും ലൈസൻസ് കാലാവധി ചുരുക്കുന്നത് ട്രാഫിക് ഡയറക്ടറേറ്റിന്റെ ജോലിഭാരം വർദ്ധിപ്പിക്കുമെന്നും അവർ മുന്നറിയിപ്പ് നൽകി. വിവിധ മന്ത്രാലയങ്ങളുടെയും മനുഷ്യാവകാശ സംഘടനകളുടെയും എതിർപ്പുകൾ നിലനിൽക്കുന്നുണ്ടെങ്കിലും, ബില്ലിലെ പ്രധാന വ്യവസ്ഥകളിൽ മാറ്റം വരുത്താൻ പാർലമെന്ററി സമിതി തയ്യാറായിട്ടില്ല. ഭരണഘടനാപരമായ അവകാശങ്ങളും ഗതാഗത നിയന്ത്രണത്തിനുള്ള ആവശ്യകതയും തമ്മിലുള്ള സങ്കീർണ്ണമായ തർക്കം പാർലമെന്റിൽ ചൂടേറിയ ചർച്ചകൾക്ക് വഴിവെക്കും.