ബഹ്റൈനിൽ വസന്തകാല അലർജി പടരുന്നു; തുമ്മലും ശ്വാസതടസ്സവും വർധിക്കുന്നു
പ്രദീപ് പുറവങ്കര I ബഹ്റൈൻ
മനാമ: ബഹ്റൈനിൽ കാലാവസ്ഥാ മാറ്റത്തോടൊപ്പം വസന്തകാല അലർജി ലക്ഷണങ്ങൾ റിപ്പോർട്ട് ചെയ്യുന്നവരുടെ എണ്ണത്തിൽ വലിയ വർധനവ്. തുമ്മൽ, കണ്ണുകളിൽ നിന്നുള്ള വെള്ളമൊലിപ്പ്, എക്സിമ, ശ്വാസകോശ സംബന്ധമായ അസ്വസ്ഥതകൾ എന്നിവയുമായാണ് പലരും ചികിത്സ തേടുന്നത്. ശൈത്യകാലത്ത് നിന്ന് ചൂടിലേക്ക് മാറുന്ന ഈ സമയത്ത് അന്തരീക്ഷത്തിലെ പൂമ്പൊടികളും പൊടിപടലങ്ങളും വർധിക്കുന്നതാണ് ഇതിന് പ്രധാന കാരണം.
അലർജി ലക്ഷണങ്ങളെ വെറും നിസ്സാരമായി കാണരുതെന്നും ഇത് ഉറക്കത്തെയും ദൈനംദിന പ്രവർത്തനങ്ങളെയും കാര്യമായി ബാധിക്കുമെന്നും ഫാമിലി ഫിസിഷ്യൻ ഡോ. ഈമാൻ അൽ-അസൂമി പറഞ്ഞു. ഈന്തപ്പനകളിൽ നിന്നുള്ള പൂമ്പൊടികൾ പുറത്തുവരുന്നതും ഇടയ്ക്കിടെയുള്ള പൊടിക്കാറ്റും അലർജിക്ക് ആക്കം കൂട്ടുന്നു. വരും ആഴ്ചകളിൽ ഇത് കൂടുതൽ തീവ്രമാകാൻ സാധ്യതയുണ്ടെന്നും അവർ മുന്നറിയിപ്പ് നൽകി.
പലപ്പോഴും സാധാരണ ജലദോഷമാണെന്ന് കരുതി അലർജിക്ക് ചികിത്സ തേടാൻ രോഗികൾ മടിക്കാറുണ്ട്. പനിയില്ലാതെ നീണ്ടുനിൽക്കുന്ന തുമ്മലും ചുമയും അലർജിയുടെ ലക്ഷണമാകാം. ഇത് കൃത്യസമയത്ത് ചികിത്സിച്ചില്ലെങ്കിൽ സൈനസൈറ്റിസ് പോലുള്ള സങ്കീർണ്ണമായ പ്രശ്നങ്ങളിലേക്ക് നയിച്ചേക്കാം. ഇൻഡോർ ജീവിതശൈലി കാരണം പൊടിപടലങ്ങളിൽ നിന്നുള്ള അലർജിയാണ് ബഹ്റൈനിൽ കൂടുതലായി കണ്ടുവരുന്നത്.
അലർജി ലക്ഷണങ്ങളുള്ളവർക്ക് ചില ഭക്ഷണങ്ങളോടും ഈ സമയത്ത് അമിതമായ പ്രതികരണം ഉണ്ടായേക്കാമെന്ന് കൺസൾട്ടന്റ് ഡോ. ജലാൽ അബ്ദുള്ള കലാം നിരീക്ഷിച്ചു. കടൽ വിഭവങ്ങൾ, നട്സ് എന്നിവയോട് ശരീരം പെട്ടെന്ന് പ്രതികരിക്കാൻ സാധ്യതയുണ്ട്. ഡെലിവറി തൊഴിലാളികൾ ഉൾപ്പെടെ കൂടുതൽ സമയം പുറത്ത് ജോലി ചെയ്യുന്നവർക്കാണ് ഇതിന്റെ ആഘാതം കൂടുതൽ.
കുട്ടികൾ, ആസ്ത്മ രോഗികൾ, പ്രായമായവർ, ഹൃദ്രോഗമുള്ളവർ എന്നിവർ ഈ കാലാവസ്ഥാ മാറ്റത്തിൽ പ്രത്യേക ജാഗ്രത പാലിക്കണമെന്ന് ഡോക്ടർമാർ നിർദ്ദേശിക്കുന്നു.
dsfdef
