ദസറ ആഘോഷത്തിൽ വേറിട്ട കാഴ്ച; ഡൽഹി രാംലീലയിൽ രാവണനൊപ്പം 30 അടി ഉയരമുള്ള 'പാറ്റയുടെ' കോലവും കത്തിക്കുന്നു

ശാരിക

ന്യൂഡൽഹി: രാജ്യമെമ്പാടും വിജയദശമി, ദസറ ആഘോഷങ്ങൾക്കായി ഒരുങ്ങവെ, ഡൽഹിയിൽ നിന്ന് വേറിട്ടതും കൗതുകകരവുമായ ഒരു വാർത്ത പുറത്തുവരുന്നു. ഡൽഹി പീതാംപുരയിൽ നടക്കുന്ന പ്രശസ്തമായ രാംലീല ആഘോഷങ്ങളുടെ ഭാഗമായി, രാവണൻ, കുംഭകർണൻ, മേഘനാഥൻ എന്നിവരുടെ ഭീമാകാരമായ കോലങ്ങൾക്കൊപ്പം 30 അടി ഉയരമുള്ള ഒരു 'പാറ്റയുടെ' കോലം കൂടി ദഹിപ്പിക്കാൻ ശ്രീ കേശവ് റാം ലീല കമ്മിറ്റി തീരുമാനിച്ചു. തിന്മയുടെ പ്രതീകമായ രാവണനൊപ്പം പാറ്റയെക്കൂടി കരിക്കുന്നതിന് പിന്നിൽ രാഷ്ട്രീയ ലക്ഷ്യങ്ങളൊന്നുമില്ലെന്നും പൊതുജനങ്ങൾക്ക് ശുചിത്വ സന്ദേശം നൽകാനാണ് ഈ നടപടിയെന്നുമാണ് സംഘാടകരുടെ വിശദീകരണം.

ബി.ജെ.പി എം.എൽ.എയും രാംലീല കമ്മിറ്റി പ്രസിഡന്റുമായ അശോക് ഗോയൽ വ്യക്തമാക്കുന്നതനുസരിച്ച്, സമൂഹത്തിൽ വർദ്ധിച്ചുവരുന്ന അഴുക്കിനെയും മാലിന്യത്തെയുമാണ് പാറ്റ പ്രതീകവൽക്കരിക്കുന്നത്. 'സ്വച്ഛ് ഭാരത്', 'സ്വച്ഛ് ഡൽഹി' പ്രചാരണങ്ങളുടെ ഭാഗമായി ജനങ്ങളിൽ ശുചിത്വ ബോധവൽക്കരണം സൃഷ്ടിക്കുകയാണ് ഇതിന്റെ പ്രധാന ലക്ഷ്യം. രാംലീല നാടകവേദിയിൽ രാവണന്റെ സൈന്യത്തിലെ ഒരു അസുരന്റെ രൂപത്തിലാണ് പാറ്റയെ അവതരിപ്പിക്കുക എന്നും അദ്ദേഹം കൂട്ടിച്ചേർത്തു.

അതേസമയം, ഈ തീരുമാനത്തിന് പിന്നിൽ ശക്തമായ രാഷ്ട്രീയ പശ്ചാത്തലമുണ്ടെന്ന ചർച്ചകളും തലസ്ഥാനത്ത് സജീവമാണ്. ഡൽഹിയിൽ ഇപ്പോൾ പ്രക്ഷോഭങ്ങൾ നടത്തുന്ന 'കോക്രോച്ച് ജനതാ പാർട്ടി' (സി.ജെ.പി) എന്ന സംഘടനയുമായി ബന്ധപ്പെടുത്തിയാണ് രാഷ്ട്രീയ നിരീക്ഷകർ ഇതിനെ കാണുന്നത്. തൊഴിൽരഹിതരായ യുവാക്കളെ പാറ്റകളോട് ഉപമിച്ച ചില മുൻ പരാമർശങ്ങളിൽ നിന്നാണ് സി.ജെ.പി രൂപംകൊണ്ടത്. തുടർന്ന് കേന്ദ്രമന്ത്രിമാരുടെ രാജിയാവശ്യപ്പെട്ട് ജന്തർമന്ദറിൽ ഇവർ നടത്തിയ ശക്തമായ സമരങ്ങൾ വലിയ രാഷ്ട്രീയ ചലനങ്ങൾ സൃഷ്ടിച്ചിരുന്നു.

നിലവിൽ മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജിയാവശ്യപ്പെട്ടാണ് സി.ജെ.പി പ്രതിഷേധിക്കുന്നത്. ഒക്ടോബർ 10-ന് ജന്തർമന്ദറിലേക്ക് ഇവർ നടത്തിയ മാർച്ച് വലിയ സംഘർഷത്തിൽ കലാശിച്ചിരുന്നു. കാൽ ലക്ഷത്തോളം പോലീസുകാരെയും കേന്ദ്രസേനെയുമാണ് സമരം നേരിടാൻ ഭരണകൂടം വിന്യസിച്ചത്. സംഘടനയുടെ സ്ഥാപകൻ അഭിജിത് ദീപ്‌കെ കസ്റ്റഡിയിലാവുകയും, ദേശീയ പതാക വീശി പ്രതിഷേധിച്ച നേതാക്കളായ സൗരവ് ദാസ്, അശുതോഷ് റാങ്ക എന്നിവർ അറസ്റ്റിലായി തിഹാർ ജയിലിലാവുകയും ചെയ്തു. ഇതിൽ പ്രതിഷേധിച്ച് കൊണാട്ട് പ്ലേസിൽ 'തിരംഗ സമരം' നടത്താനും സംഘടന ആഹ്വാനം ചെയ്തിട്ടുണ്ട്.

ഇത്തരം രാഷ്ട്രീയ അന്തരീക്ഷം ചൂടുപിടിച്ചിരിക്കെയാണ് ഡൽഹിയിൽ പാറ്റയുടെ കോലം കത്തിക്കാൻ രാംലീല കമ്മിറ്റി തീരുമാനിച്ചിരിക്കുന്നത്. എങ്കിലും, ഇതിൽ രാഷ്ട്രീയമില്ലെന്നും പരിപൂർണ്ണമായും ശുചിത്വ സന്ദേശം മാത്രമാണ് ലക്ഷ്യമെന്നും സംഘാടകർ ആവർത്തിക്കുന്നു.