മനാമ സൂഖ് നവീകരണം ആരംഭിച്ചു; ആദ്യഘട്ടത്തിനായി 6.8 ലക്ഷം ദിനാർ, പൈതൃകം നിലനിർത്താൻ ബഹ്റൈൻ
പ്രദീപ് പുറവങ്കര I ബഹ്റൈൻ
മനാമ: ബഹ്റൈന്റെ സാംസ്കാരിക അടയാളമായ മനാമ സൂഖിന്റെ പുനർവികസന പ്രവർത്തനങ്ങൾക്ക് ഔദ്യോഗികമായി തുടക്കമായി. പാർലിമെന്റ് എം.പി അഹമ്മദ് അൽ സല്ലൂമിന് ടൂറിസം മന്ത്രാലയം നൽകിയ രേഖാമൂലമുള്ള മറുപടിയിലാണ് പദ്ധതിയുടെ പുരോഗതിയെക്കുറിച്ചുള്ള വിശദാംശങ്ങൾ വ്യക്തമാക്കിയത്. രാജ്യത്തിന്റെ പൈതൃകം സംരക്ഷിക്കുന്നതിനൊപ്പം ആധുനിക സൗകര്യങ്ങൾ ഒരുക്കുകയുമാണ് ഈ ബൃഹദ് പദ്ധതിയുടെ ലക്ഷ്യം.
ഏകദേശം 6.8 ലക്ഷം ബഹ്റൈനി ദിനാർ (BD 680,000) ചെലവിലാണ് ഒന്നാം ഘട്ട നിർമ്മാണ പ്രവർത്തനങ്ങൾ നടക്കുന്നത്. മുസഖാഫ് പ്രവേശന കവാടം, കാനൂ മ്യൂസിയത്തിലേക്കുള്ള നടപ്പാത, ബാബ് അൽ ബഹ്റൈൻ കൊമേഴ്സ്യൽ കോംപ്ലക്സ് എന്നിവിടങ്ങളിലെ നവീകരണത്തിനാണ് ഈ ഘട്ടത്തിൽ മുൻഗണന നൽകുന്നത്. 2026-ന്റെ അവസാന പാദത്തോടെ ഒന്നാം ഘട്ട ജോലികൾ പൂർത്തിയാക്കാൻ സാധിക്കുമെന്നാണ് മന്ത്രാലയം പ്രതീക്ഷിക്കുന്നത്.
മനാമയുടെ ചരിത്രപരമായ തനിമ നിലനിർത്തിക്കൊണ്ട് തന്നെ അടിസ്ഥാന സൗകര്യങ്ങൾ വികസിപ്പിക്കാനാണ് ബഹ്റൈൻ ലക്ഷ്യമിടുന്നത്. ഇതിനായി ടൂറിസം ആൻഡ് എക്സിബിഷൻ അതോറിറ്റി, കൾച്ചർ ആൻഡ് ആന്റിക്വിറ്റീസ് അതോറിറ്റി തുടങ്ങിയ സർക്കാർ വകുപ്പുകൾ ഉൾപ്പെട്ട സംയുക്ത സമിതിയുടെ മേൽനോട്ടത്തിലാണ് പ്രവർത്തനങ്ങൾ നടക്കുന്നത്. സൂഖിന്റെ വാസ്തുവിദ്യാ ശൈലിയിൽ മാറ്റം വരുത്താതെ സന്ദർശകർക്ക് കൂടുതൽ സൗകര്യങ്ങൾ ഒരുക്കുന്ന ഏകീകൃത രൂപരേഖയാണ് പദ്ധതിക്കായി തയ്യാറാക്കിയിരിക്കുന്നത്.
നിർമ്മാണ പ്രവർത്തനങ്ങൾക്കിടയിൽ സൂഖിലെ വ്യാപാരികളുടെ ആശങ്കകൾ പരിഹരിക്കാൻ മന്ത്രാലയം പ്രത്യേക ശ്രദ്ധ നൽകുന്നുണ്ട്. പദ്ധതിയുടെ ഓരോ ഘട്ടത്തെക്കുറിച്ചും വ്യാപാരികളെ ബോധ്യപ്പെടുത്തുകയും അവരുടെ നിർദ്ദേശങ്ങൾ പരിഗണിക്കുകയും ചെയ്തിട്ടുണ്ട്. ആധുനികവൽക്കരണവും പൈതൃക സംരക്ഷണവും തമ്മിലുള്ള തുലനാവസ്ഥ നിലനിർത്തിക്കൊണ്ട് മനാമ സൂഖിനെ ബഹ്റൈനിലെ പ്രധാന സാംസ്കാരിക കേന്ദ്രമായി നിലനിർത്തുമെന്ന് സർക്കാർ വ്യക്തമാക്കി.
asadsadqsads
