പാക്കധീന കശ്മീരിൽ പ്രതിഷേധക്കാർക്ക് നേരെ വെടിവെപ്പ്; 30ലേറെ മരണം, 200ലധികം പേർക്ക് പരിക്ക്
ഷീബ വിജയൻ
മുസഫറാബാദ്: പാക്കധീന കശ്മീരിൽ സുരക്ഷാസേന പ്രതിഷേധക്കാർക്ക് നേരെ വെടിയുതിർത്തതിനെ തുടർന്ന് വൻ ദുരന്തം. വെടിവെപ്പിൽ 30ലേറെ പേർ കൊല്ലപ്പെടുകയും 200ലധികം പേർക്ക് പരിക്കേൽക്കുകയും ചെയ്തതായി റിപ്പോർട്ടുകൾ വ്യക്തമാക്കുന്നു. പ്രദേശത്ത് അടിസ്ഥാന അവകാശങ്ങൾ നിഷേധിക്കപ്പെടുന്നതും സാമ്പത്തിക, രാഷ്ട്രീയ പ്രശ്നങ്ങളും ഉയർത്തിക്കാട്ടിയാണ് കഴിഞ്ഞ ഏതാനും ദിവസങ്ങളായി ശക്തമായ ജനകീയ പ്രതിഷേധങ്ങൾ നടക്കുന്നത്. സുരക്ഷാസേനയും പ്രതിഷേധക്കാരും തമ്മിലുണ്ടായ കനത്ത ഏറ്റുമുട്ടലുകളാണ് വ്യാപക രക്തച്ചൊരിച്ചിലിലേക്ക് നയിച്ചത്.
പ്രതിഷേധങ്ങൾക്ക് നേതൃത്വം നൽകുന്ന സംഘടനകളും പ്രാദേശിക പൗരാവകാശ പ്രവർത്തകരും പാക് സർക്കാരിനെതിരെ കടുത്ത വിമർശനമാണ് ഉന്നയിക്കുന്നത്. പൗരാവകാശ സംഘടനയായ ജോയിന്റ് അവാമി ആക്ഷൻ കമ്മിറ്റിക്ക് (ജെഎഎസി) അധികൃതർ നിരോധനമേർപ്പെടുത്തിയതാണ് നിലവിലെ സംഘർഷം രൂക്ഷമാക്കിയത്. നിലവിൽ മേഖലയിലെ കടകളും വ്യാപാര സ്ഥാപനങ്ങളും പൂർണ്ണമായി അടഞ്ഞുകിടക്കുകയാണ്. പ്രതിഷേധക്കാരെ പിരിച്ചുവിടുന്നതിനായി സുരക്ഷാസേന കടുത്ത നടപടികളിലേക്ക് കടന്നതോടെയാണ് സ്ഥിതി വഷളായത്. പ്രതിഷേധക്കാരുടെ ആക്രമണത്തിൽ സുരക്ഷാസേനാംഗങ്ങളും കൊല്ലപ്പെട്ടതായി അധികൃതർ വ്യക്തമാക്കി. മേഖലയിലെ നിയമസഭയിലേക്ക് നടക്കാനിരിക്കുന്ന തെരഞ്ഞെടുപ്പിൽ 12 സീറ്റുകൾ അഭയാർത്ഥികൾക്കായി സംവരണം ചെയ്യുന്നതിനെതിരെ പ്രതിഷേധിക്കാൻ ജെഎഎസി ആഹ്വാനം ചെയ്തതിന് തൊട്ടുമുമ്പാണ് ഈ അക്രമസംഭവങ്ങൾ അരങ്ങേറിയത്.
ttrdeferwqwq
