പ്രചരിക്കുന്ന വാർത്തകൾ തെറ്റ്; കീരിക്കാടൻ ജോസിനെ ആശുപത്രിയില്‍ സന്ദര്‍ശിച്ച് ദിനേശ് പണിക്കര്‍
കൊച്ചി: നടന്‍ കീരിക്കാടന്‍ ജോസ് ഗുരുതര രോഗത്തെ തുടര്‍ന്ന് ചികിത്സയിലാണെന്നും വലിയ സാമ്പത്തിക പ്രതിസന്ധിയിലുമാണെന്ന തരത്തില്‍ അടുത്തിടെ സോഷ്യല്‍ മീഡിയയില്‍ വാര്‍ത്ത പ്രചരിച്ചിരുന്നു. എന്നാല്‍ ഈ വാര്‍ത്ത വ്യാജമാണെന്നും അദ്ദേഹം വെരിക്കോസുമായി ബന്ധപ്പട്ട ചികിത്സയിലാണെന്നും ചൂണ്ടിക്കാട്ടി അദ്ദേഹത്തിന്റെ വീട്ടുകാര്‍ രംഗത്ത് വന്നിരുന്നു. ഇപ്പോഴിതാ അദ്ദേഹത്തിന്റ അവസ്ഥയെകുറിച്ച് കൂടുതല്‍ വിവരങ്ങളുമായി രംഗത്ത് വന്നിരിക്കുകയാണ് നടനും നിര്‍മ്മാതാവുമായ ദിനേശ് പണിക്കര്‍. കീരിക്കാടനെ ആശുപത്രിയില്‍ സന്ദര്‍ശിച്ച ശേഷം ഫേസ്ബുക്കിൽ പങ്കുവെച്ച കുറിപ്പിലാണ് അദ്ദേഹം ഇത് പറയുന്നത്.
‘ഞാന്‍ അദ്ദേഹത്തെ തിരുവനന്തപുരം ജനറല്‍ ആശുപത്രിയില്‍ എത്തി കണ്ടിരുന്നു. വെരിക്കോസ് വെയിന് ചികിത്സയിലാണ് അദ്ദേഹം. കീരിക്കാടന്‍ ജോസിന് സാമ്പത്തിക ബുദ്ധിമുട്ടില്ല. അതിനാല്‍ അദ്ദേഹത്തിന് ആരില്‍ നിന്നും സാമ്പത്തിക സഹായം ആവശ്യമില്ല. അദ്ദേഹം ഉടന്‍ രോഗം ഭേദമായി സിനിമയില്‍ സജീവമാകട്ടെ എന്നു പ്രാര്‍ത്ഥിക്കുന്നു.’ കീരിക്കാടന്‍ ജോസ് എന്ന മോഹന്‍ രാജിനൊപ്പമുള്ള ചിത്രം സഹിതം പങ്കുവെച്ച് ദിനേശ് പണിക്കര്‍ ഫെയ്‌സ്ബുക്കില്‍ കുറിച്ചു.
വെരിക്കോസ് വെയിന് ദീര്‍ഘനാളായി ചികില്‍സയിലാണ് മോഹന്‍ രാജ്. ചെന്നൈയിലെ ഒരു പ്രമുഖ സ്വകാര്യ ആശുപത്രിയിലായിരുന്നു ചികിത്സ. തിരുവനന്തപുരം ജനറല്‍ ആശുപത്രിയില്‍ ഡോക്ടറായ ബന്ധുവിന്റെ ചികിത്സയിലുള്ള വിശ്വാസം കൊണ്ടാണ് ജനറല്‍ ആശുപത്രിയിലേക്കെത്തിയതെന്നാണ് മോഹന്‍ രാജിന്റെ കുടുംബാംഗങ്ങള്‍ പറയുന്നത്.
