വിജയത്തുടർച്ചയോടെ പി.വിയുടെ മഞ്ഞപ്പട
മനാമ : ബഹ്റൈനിലെ പ്രവാസി മലയാളികൾ ഏറെ ആകാംക്ഷയോടെ കാത്തിരുന്ന ബഹ്റൈൻ കേരളീയ സമാജത്തിന്റെ ഈ വർ‍ഷത്തെ ഭരണസമിതി തിരെഞ്ഞെടുപ്പിൽ രണ്ടു കാലഘട്ടങ്ങളിലായി ആറ് തവണ പ്രസിഡണ്ട് സ്ഥാനം അലങ്കരിച്ച പിവി രാധാകൃഷ്ണപിള്ളയുടെ നേതൃത്വത്തിലുള്ള മുന്നണി ഏഴാമത് ഊഴത്തിലേയ്ക്ക് പ്രവേശിച്ചു. ഇന്നലെ നടന്ന വാശിയേറിയ തിരെഞ്ഞെടുപ്പിൽ നിലവിലെ ഭരണസമിതി പ്രസിഡണ്ട് പിവി രാധാകൃഷ്ണ പിള്ളയും, എംപി രഘുവും നയിച്ച യുണൈറ്റഡ് പാനലിലെ എല്ലാ സ്ഥാനാർഥികളും മികച്ച വിജയം നേടിയതോടെയാണ് സമാജത്തിന്റെ ചരിത്രത്തിൽ തന്നെ എഴുതപ്പെടുന്ന തരത്തിലുള്ള വിജയമായി ഇത്തവണത്തേത് മാറിയത്.
എതിർ‍പക്ഷമായ പ്രൊഗ്രസീവ് പാനലിന്റെ എല്ലാ സ്ഥാനാർ‍ത്ഥിക്കളും പരാജയപ്പെട്ടു. ആകെയുള്ള 1675 അംഗങ്ങളിൽ 1373 അംഗങ്ങളാണ് അവരുടെ സമ്മതിദാന അവകാശം വിനിയോഗിച്ചത്. നാട്ടിലെ തിരഞ്ഞെടുപ്പുകളെ അനുസ്മരിപ്പിക്കുന്ന വിധത്തിൽ അത്യന്തം വാശി നിറഞ്ഞ പ്രചരണ പരിപാടികളാണ് ഇരു പാനലുകളും നടത്തിയിരുന്നത്. ഓൺ‍ലൈനിലും അല്ലാതെയും പരസ്പരം സമാജംഅംഗങ്ങൾ കൊന്പ് കോർ‍ക്കുന്ന കാഴ്ച്ചയാണ് സാധാരണ ബഹ്റൈൻ പ്രവാസികൾ ഈ കാലയളവിൽ കണ്ടിരുന്നത്.
എല്ലാവർ‍ക്കും എല്ലായ്പ്പോഴും സമാജം : രാധാകൃഷ്ണപിള്ള
ബഹ്റൈനിലെ എല്ലാ മലയാളികൾക്കും എല്ലായ്പ്പോഴും സമാജം എന്ന സന്ദേശത്തിലൂന്നിയുള്ള പ്രവർത്തനത്തിനായിരിക്കും പുതിയ ഭരണസമിതി മുൻ‌തൂക്കം നൽകുകയെന്നും ജാതിയുടെയും മതത്തിന്റെയും രാഷ്ട്രീയത്തിന്റെയും വേലിക്കെട്ടുകളില്ലാതെ പ്രവർത്തിക്കാൻ തയാറാകുന്ന ആർക്കും കടന്നുവരാവുന്ന വേദിയായിട്ടാണ് സമാജത്തെ പൊതുസമൂഹം നോക്കി കാണുന്നതെന്നും അത് ഇനിയും തുടരുമെന്നും പ്രസിഡന്റ് പി വി രാധാകൃഷ്ണപിള്ള പറഞ്ഞു. മതേതരത്വ മൂല്യങ്ങൾ ഉയർത്തിപ്പിടിച്ചുകൊണ്ടുള്ള ഭരണത്തിന് സമാജം അംഗങ്ങൾ നൽകിയ അംഗീകാരമായി തെരെഞ്ഞെടുപ്പ് വിജയത്തെ വിലയിരിത്തുന്നുവെന്നും പ്രവാസി ഭാരതീയ സമ്മാന്‍ ജേതാവ് കൂടിയായ പി വി രാധാകൃഷ്ണപിള്ള പറഞ്ഞു.
