ഡിജിറ്റൽ മാധ്യമ രംഗത്തെ നേതൃത്വവും ജാഗ്രതയും: യൂത്ത് സിറ്റി 2030-ൽ ചർച്ച സംഘടിപ്പിച്ചു
പ്രദീപ് പുറവങ്കര
മനാമ: ഡിജിറ്റൽ മാധ്യമങ്ങളുടെ യുഗത്തിൽ യുവജനങ്ങളിൽ ബോധവൽക്കരണവും വിവര വിശകലന ശേഷിയും വർദ്ധിപ്പിക്കേണ്ടത് അത്യന്താപേക്ഷിതമാണെന്ന് ബഹ്റൈൻ ഇൻസ്റ്റിറ്റ്യൂട്ട് ഫോർ പൊളിറ്റിക്കൽ ഡെവലപ്മെന്റ് (BIPD) ബോർഡ് ഓഫ് ട്രസ്റ്റി ചെയർമാൻ ഡോ. അലി ബിൻ മുഹമ്മദ് അൽ റുമൈഹി പ്രസ്താവിച്ചു. അന്താരാഷ്ട്ര യുവജന ദിനത്തോടനുബന്ധിച്ച് യൂത്ത് സിറ്റി 2030-ൽ സംഘടിപ്പിച്ച പ്രത്യേക ചർച്ചാ സെഷനിൽ സംസാരിക്കുകയായിരുന്നു അദ്ദേഹം. യൂത്ത് അഫയേഴ്സ് മന്ത്രാലയവും സ്ട്രാറ്റജിക് പാർട്ണറായ ലേബർ ഫണ്ടും (താംകീൻ) സംയുക്തമായാണ് പരിപാടി സംഘടിപ്പിച്ചത്.
വ്യാജ വാർത്തകൾ, അഭ്യൂഹങ്ങൾ, വ്യാജ അക്കൗണ്ടുകൾ, അൽഗോരിതം കൃത്രിമത്വങ്ങൾ എന്നിവ നിറഞ്ഞുനിൽക്കുന്ന ഡിജിറ്റൽ യുഗത്തിൽ ശരിയായ വിവരങ്ങളും തെറ്റിദ്ധരിപ്പിക്കുന്ന ഉള്ളടക്കങ്ങളും തിരിച്ചറിയാൻ യുവാക്കൾക്ക് സാധിക്കണം. ദേശീയ സ്വത്വം സംരക്ഷിക്കുന്നതിനും രാജ്യത്തോടുള്ള പ്രതിബദ്ധത നിലനിർത്തുന്നതിനും ഇത് അത്യാവശ്യമാണ്. ഉത്തരവാദിത്തബോധമുള്ള യുവതലമുറയ്ക്ക് സമൂഹത്തിൽ സമാധാനവും ദേശീയ സ്ഥാപനങ്ങളിലുള്ള വിശ്വാസ്യതയും നിലനിർത്താൻ വലിയ പങ്ക് വഹിക്കാൻ കഴിയുമെന്നും അദ്ദേഹം കൂട്ടിച്ചേർത്തു.
സോഷ്യൽ മീഡിയയിൽ പ്രചരിക്കുന്ന വിവരങ്ങളുടെ സത്യവസ്ഥ പരിശോധിക്കാനും അപഗ്രഥിക്കാനും യുവാക്കൾ കഴിവ് വളർത്തിയെടുക്കണം. വികാരങ്ങൾക്കും താൽപ്പര്യങ്ങൾക്കും അധീനപ്പെടാതെയുള്ള രാഷ്ട്രീയ ബോധവും ദേശീയ ഉത്തരവാദിത്തവും തമ്മിലുള്ള വ്യത്യാസം മനസ്സിലാക്കേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി. ജനങ്ങളും ഭരണസംവിധാനങ്ങളും തമ്മിലുള്ള ബന്ധം കൂടുതൽ ശക്തമാക്കാൻ അറിവും ദേശീയബോധവും അത്യാവശ്യമാണെന്ന് സെഷൻ വിലയിരുത്തി.
asasdsdsdsa
