യൂത്ത് സിറ്റി 2030 സന്ദർശിച്ച് ബഹ്‌റൈൻ രാജാവ് ഹമദ് ബിൻ ഈസ അൽ ഖലീഫ; യുവജനശേഷി വികസനത്തിന് പൂർണ്ണ പിന്തുണ

പ്രദീപ് പുറവങ്കര

മനാമ: ബഹ്‌റൈൻ യുവജനങ്ങളുടെ കഴിവും ശേഷിയും വികസിപ്പിക്കുന്നതിനും രാജ്യത്തിന്റെ ദേശീയ വികസനത്തിൽ പങ്കാളികളാക്കുന്നതിനുമായി സംഘടിപ്പിച്ച 'യൂത്ത് സിറ്റി 2030' ബഹ്‌റൈൻ രാജാവ് ഹിസ് മജസ്റ്റി ഹമദ് ബിൻ ഈസ അൽ ഖലീഫ സന്ദർശിച്ചു.

യൂത്ത് സിറ്റിയുടെ 15-ാമത് പതിപ്പിൽ 324-ലധികം പരിശീലന പരിപാടികളും 10,000-ത്തിലധികം പരിശീലന അവസരങ്ങളുമാണ് ഒരുക്കിയിരിക്കുന്നത്. 9,635 യുവതീയുവാക്കൾ ഇതിനോടകം ഈ സംരംഭത്തിൽ പങ്കാളികളായി. കൂടാതെ, പങ്കാളികൾക്ക് വൈവിധ്യമാർന്ന അനുഭവം നൽകുന്നതിനായി 204 പ്രാദേശിക, അന്തർദേശീയ പങ്കാളിത്തങ്ങളും പദ്ധതിക്ക് കീഴിൽ ഉറപ്പാക്കിയിട്ടുണ്ട്.

സയൻസ് ആൻഡ് ടെക്നോളജി സെന്റർ, ആർട്സ് ആൻഡ് കൾച്ചർ സെന്റർ, ഔദ്യോഗിക-നേതൃത്വ വികസന സെന്റർ, മീഡിയ ആൻഡ് ഡിജിറ്റൽ ഇന്നൊവേഷൻ സെന്റർ, സമ്മർ സ്പോർട്സ് സിറ്റി തുടങ്ങി കേന്ദ്രത്തിന്റെ പ്രധാന വിഭാഗങ്ങളിൽ രാജാവ് പര്യടനം നടത്തി. യുവാക്കളുടെ സർഗ്ഗാത്മകത പ്രോത്സാഹിപ്പിക്കുന്നതിനായി ഒരുക്കിയ പ്രായോഗിക പ്രവർത്തനങ്ങളും അദ്ദേഹം നേരിട്ട് വിലയിരുത്തി.

ദേശീയതയും പൗരബോധവും വളർത്തുന്ന 'ബഹ്‌റൈനൂന' പ്ലാറ്റ്‌ഫോം സന്ദർശിച്ച രാജാവ്, 'യങ് ട്രേഡർ' ഉദ്യമത്തിന് കീഴിൽ യുവസംരംഭകർ വികസിപ്പിച്ചെടുത്ത പദ്ധതികളെക്കുറിച്ചും ആശയങ്ങളെക്കുറിച്ചും ചോദിച്ചറിഞ്ഞു. തുടർന്ന് യൂത്ത് സിറ്റിയിലെ പ്രതിഭകൾ അവതരിപ്പിച്ച കലാപരിപാടികൾ വീക്ഷിച്ച അദ്ദേഹം യുവനേതാക്കളുമായും പങ്കാളികളുമായും ആശയവിനിമയം നടത്തി.

ബഹ്‌റൈന്റെ ഭാവിയാണ് യുവാക്കളെന്നും മുൻതലമുറകളുടെ സേവന പാരമ്പര്യം തുടരാൻ അവർ പ്രാപ്തരാണെന്നും ഹമദ് രാജാവ് പറഞ്ഞു. യുവാക്കളുടെ കഴിവുകളിലും പ്രതിഭയിലും രാജ്യം പൂർണ്ണ വിശ്വാസം അർപ്പിക്കുന്നു. യൂത്ത് സിറ്റി 2030-ന്റെ വിജയത്തെയും നൂതന പരിപാടികളെയും പ്രശംസിച്ച അദ്ദേഹം, യുവജനങ്ങളെ ശാക്തീകരിക്കേണ്ടതിന്റെയും അവരുടെ ക്രിയാത്മകത വളർത്തേണ്ടതിന്റെയും പ്രാധാന്യം എടുത്തുപറഞ്ഞു.