പണം വെളുപ്പിക്കൽ കേസ്: തട്ടിപ്പ് നടത്തിയ നഴ്സ് വീണ്ടും വിചാരണയിൽ

പ്രദീപ് പുറവങ്കര

മനാമ: ഭിന്നശേഷിക്കാരനായ ഒരു വൃദ്ധനിൽ നിന്ന് 25,700 ബഹ്റൈൻ ദിനാർ തട്ടിയെടുത്തതിന് 10 വർഷത്തെ തടവുശിക്ഷയ്ക്ക് വിധിക്കപ്പെട്ട ഒരു സ്വകാര്യ നഴ്സ്, താൻ മോഷ്ടിച്ച പണം വെളുപ്പിച്ചതുമായി ബന്ധപ്പെട്ട കേസിൽ ഇപ്പോൾ വീണ്ടും വിചാരണ നേരിടുകയാണ്.

കഴിഞ്ഞ മാർച്ചിൽ, ഇന്ത്യയിലെ തന്റെ കടങ്ങൾ വീട്ടുന്നതിനായി 79 വയസ്സുള്ള ഒരു രോഗിയുടെ ഓൺലൈൻ ബാങ്കിംഗ് ആപ്പ് ഉപയോഗിച്ച് പണം കൈമാറിയ കേസിൽ 30 വയസ്സുകാരിയായ ഇന്ത്യൻ സ്വദേശിനിയായ ഈ നഴ്സ് കുറ്റക്കാരിയാണെന്ന് കണ്ടെത്തിയിരുന്നു. മോഷ്ടിച്ച തുകയിൽ 3,500 ദിനാർ ഇവർ തിരികെ നൽകിയെങ്കിലും, പണം വെളുപ്പിക്കൽ കുറ്റത്തിന് ഇപ്പോൾ വീണ്ടും ഹൈ ക്രിമിനൽ കോടതിയിൽ ഹാജരാക്കേണ്ടി വന്നിരിക്കുകയാണ്.

പ്രതി ഈ തുകയിൽ 22,051 ദിനാർ ഇന്ത്യയിലുള്ള തന്റെ ഭർത്താവിന്റെ ബാങ്ക് അക്കൗണ്ടിലേക്ക് നാല് വിദേശ പണമിടപാടുകളിലൂടെ മാറ്റിയതായി പ്രോസിക്യൂഷൻ വ്യക്തമാക്കി. ബാക്കി തുക ഇവർ ഭക്ഷണത്തിനും ആഭരണങ്ങൾക്കും വേണ്ടിയും ഫിനാൻഷ്യൽ ട്രേഡിംഗ് പ്ലാറ്റ്‌ഫോമുകളിലും ചിലവഴിച്ചതായാണ് റിപ്പോർട്ട്. മറ്റൊരു കുറ്റകൃത്യത്തിലൂടെ സമ്പാദിച്ച പണം വെളുപ്പിച്ചു എന്ന കുറ്റമാണ് ഇവർക്കെതിരെ ചുമത്തിയിരിക്കുന്നത്.

ആദ്യ വിചാരണയിൽ തന്നെ ഇവർ കുറ്റസമ്മതം നടത്തിയിരുന്നു. നാഷണൽ സെന്റർ ഫോർ ഫിനാൻഷ്യൽ ഇൻവെസ്റ്റിഗേഷൻസ് ഇവരുടെ ഇടപാടുകൾ പരിശോധിക്കുകയും പണം എങ്ങോട്ടാണ് പോയതെന്ന് വ്യക്തമാക്കുന്ന രണ്ട് റിപ്പോർട്ടുകൾ തയ്യാറാക്കുകയും ചെയ്തു.

ഈ കേസ് അന്വേഷിച്ച ഉദ്യോഗസ്ഥൻ സമർപ്പിച്ച റിപ്പോർട്ടിൽ, പ്രതി പണം വെളുപ്പിക്കൽ കുറ്റം ചെയ്തതായും തട്ടിപ്പ് നടത്തിയതായും സ്ഥിരീകരിച്ചിട്ടുണ്ട്. ഇതിനെ തുടർന്ന് ഇവരുടെ അക്കൗണ്ടുകൾ മരവിപ്പിക്കുകയും ബാങ്ക് അക്കൗണ്ടിൽ നിന്ന് 750 ദിനാർ കണ്ടുകെട്ടുകയും ചെയ്തു. ആദ്യ വിചാരണയിൽ, സ്വന്തം നേട്ടത്തിനായി ഇരയുടെ ഫോണിലെ വൺ-ടൈം പാസ്‌വേഡ് (OTP) അനധികൃതമായി കൈക്കലാക്കി ബാങ്കിംഗ് ആപ്പിൽ പ്രവേശിച്ച് പണം മോഷ്ടിച്ചതായി കണ്ടെത്തിയിരുന്നു.
പത്ത് വർഷത്തെ തടവുശിക്ഷയ്ക്ക് പുറമേ ഇവർക്ക് 5,000 ദിനാർ പിഴയും വിധിച്ചിട്ടുണ്ട്, ശിക്ഷാ കാലാവധി കഴിഞ്ഞാൽ ഇവരെ നാടുകടത്താനും ഉത്തരവായിട്ടുണ്ട്. ക്രിമിനൽ അപ്പീൽ കോടതിയുടെ വിധിക്ക് എതിരെ ഇവർ സുപ്രീം കോടതിയെ സമീപിച്ചെങ്കിലും കോടതി അപ്പീൽ തള്ളുകയായിരുന്നു. രോഗിയുടെ അവശത മുതലെടുത്ത്, ശാരീരികമായി ചലനശേഷിയില്ലാത്ത അവസ്ഥയിൽ നടത്തിയ മോഷണമാണിതെന്ന് പ്രോസിക്യൂട്ടർമാർ ചൂണ്ടിക്കാണിച്ചു.

രോഗിയുടെ 49 വയസ്സുള്ള മകൻ തന്റെ പിതാവിന്റെ അക്കൗണ്ടിൽ നിന്ന് വലിയ തുകകൾ നഷ്ടപ്പെട്ടതായി കണ്ടെത്തിയതോടെയാണ് ഈ തട്ടിപ്പ് പുറത്തറിയുന്നത്. 2025 സെപ്റ്റംബർ, ഒക്ടോബർ മാസങ്ങളിലാണ് പണം പിൻവലിക്കപ്പെട്ടത്.
പണം എങ്ങോട്ടാണ് പോയതെന്ന് പരിശോധിച്ച മകൻ, ഈ തുക മുഴുവൻ തന്റെ പിതാവിനെ പരിചരിച്ചിരുന്ന നഴ്സിന്റെ അക്കൗണ്ടിലേക്കാണ് പോയതെന്ന് കണ്ടെത്തുകയായിരുന്നു. അസുഖബാധിതനായ പിതാവിന് ശ്വസന സഹായിയായി തൊണ്ടയിൽ ട്യൂബ് ഇട്ടിരിക്കുന്ന അവസ്ഥയിലായിരുന്നു. ഈ വൃദ്ധനെ പരിചരിക്കുന്നതിനായി നഴ്സിന് പ്രതിമാസം 300 ദിനാർ ശമ്പളവും നൽകിയിരുന്നു. പ്രതി നഷ്ടപരിഹാരം നൽകാൻ തയ്യാറാകാത്തതിനെ തുടർന്ന് മകൻ ഈ വിഷയം അധികാരികളുടെ ശ്രദ്ധയിൽപ്പെടുത്തുകയായിരുന്നു. പണം വീണ്ടെടുക്കുന്നതിനായി ഇന്ത്യൻ അധികൃതരുടെ സഹായം തേടാൻ പ്രോസിക്യൂഷൻ കോടതിയോട് ആവശ്യപ്പെട്ടിട്ടുണ്ട്. ഈ കേസിൽ ജൂലൈ 28-ന് കോടതി അന്തിമ വിധി പ്രസ്താവിക്കും.