കാലാവസ്ഥ വില്ലനായി; ഹിമാചലില്‍ ആപ്പിള്‍ ഉല്‍പ്പാദനം പകുതിയോളം കുറയും

ഷീബ വിജയൻ

ഷിംല: കാലാവസ്ഥാ വ്യതിയാനത്തെ തുടർന്ന് ഹിമാചൽ പ്രദേശിലെ ആപ്പിൾ തോട്ടങ്ങൾ കടുത്ത പ്രതിസന്ധി നേരിടുന്നതായി റിപ്പോർട്ടുകൾ. കാലംതെറ്റി പെയ്ത മഴയും കനത്ത ആലിപ്പഴ വീഴ്ചയും കാരണം ഇത്തവണ ആപ്പിൾ ഉൽപ്പാദനത്തിൽ 40 ശതമാനത്തോളം കുറവുണ്ടാകുമെന്നാണ് കണക്കുകൾ വ്യക്തമാക്കുന്നത്. ഏകദേശം 5,000 കോടി രൂപയുടെ ബിസിനസ്സ് നടക്കുന്ന ഈ മേഖലയിൽ കർഷകർ വലിയ ആശങ്കയിലാണ് കഴിയുന്നത്. സംസ്ഥാനത്തെ എട്ട് ജില്ലകളിലായി 2.5 ലക്ഷത്തോളം കുടുംബങ്ങളാണ് ഇവിടെ ആപ്പിൾ കൃഷിയെ ആശ്രയിച്ചു ജീവിക്കുന്നത്.

കഴിഞ്ഞ വർഷം 6.99 ലക്ഷം മെട്രിക് ടൺ ആപ്പിൾ ലഭിച്ച സ്ഥാനത്ത്, ഈ വർഷം അത് 4.36 ലക്ഷം മെട്രിക് ടണ്ണായി (ഏകദേശം 2.15 കോടി ബോക്സുകൾ) ചുരുങ്ങുമെന്നാണ് ഹോർട്ടിക്കൾച്ചർ വകുപ്പ് വ്യക്തമാക്കുന്നത്. ശൈത്യകാലത്ത് ആവശ്യത്തിന് മഞ്ഞ് പെയ്യാത്തതും വസന്തകാലത്ത് അപ്രതീക്ഷിതമായി പെയ്ത മഴയും ആലിപ്പഴ വർഷവും ആപ്പിൾ കൃഷിക്ക് കനത്ത തിരിച്ചടിയായി മാറി. ആഗോളതാപനം കാരണം ഹിമാലയൻ താഴ്വരകളിലെ താപനില 1 മുതൽ 1.5 ഡിഗ്രി വരെ വർദ്ധിച്ചു. ആപ്പിൾ നന്നായി വളരാൻ ആവശ്യമായ തണുപ്പ് (ചില്ലിങ് അവേഴ്സ്) ഇപ്പോൾ ലഭിക്കുന്നില്ല. ഇതിനൊപ്പം വളം, കീടനാശിനികൾ, യന്ത്രങ്ങൾ എന്നിവയുടെ വില വർദ്ധിച്ചതും കർഷകർക്ക് ഇരട്ടി പ്രഹരമായി.

ആവശ്യത്തിന് ജലസേചന സൗകര്യങ്ങളില്ലാത്തതിനാൽ ഭൂരിഭാഗം പേരും ഇപ്പോഴും മഴയെയും കാലാവസ്ഥയെയും ആശ്രയിച്ചാണ് കൃഷി മുന്നോട്ട് കൊണ്ടുപോകുന്നത്. ആപ്രിക്കോട്ട്, ചെറി, പ്ലം തുടങ്ങിയ മറ്റ് പഴങ്ങളുടെ ഉൽപ്പാദനത്തെയും ഈ കാലാവസ്ഥാ വ്യതിയാനം ദോഷകരമായി ബാധിച്ചിട്ടുണ്ട്. എല്ലാ കൃഷിയിടങ്ങളിലും ജലസേചന സൗകര്യം എത്തിക്കണമെന്നും വിള ഇൻഷുറൻസ് പദ്ധതികളെക്കുറിച്ച് കൃത്യമായ ബോധവൽക്കരണം നൽകണമെന്നുമാണ് ഇപ്പോൾ കർഷകർ സർക്കാരിനോട് ആവശ്യപ്പെടുന്നത്.

ഹിമാചലിൽ ആപ്പിൾ ഉൽപ്പാദനം കുറയുന്നത് രാജ്യത്തെയാകെ ബാധിക്കുമെന്നതാണ് മറ്റൊരു യാഥാർഥ്യം. കേരളം ഉൾപ്പെടെയുള്ള ദക്ഷിണേന്ത്യൻ സംസ്ഥാനങ്ങളിലേക്ക് ഹിമാചലിൽ നിന്നാണ് പ്രധാനമായും ആപ്പിൾ എത്തുന്നത്. ലഭ്യതക്കുറവുണ്ടായാൽ വിദേശത്തുനിന്നുള്ള ഇറക്കുമതിയെ ആശ്രയിക്കേണ്ടി വരും, ഇത് ആപ്പിളിന്റെ ആവശ്യകതയും വിലയും ഗണ്യമായി വർദ്ധിക്കാൻ കാരണമാകും.