തിരഞ്ഞെടുപ്പ് പ്രചാരണത്തിന് പുതിയ മാതൃക; ഡിജിറ്റൽ ബോർഡുകൾക്ക് അനുമതി നൽകാൻ ബഹ്റൈൻ
പ്രദീപ് പുറവങ്കര I ബഹ്റൈൻ
മനാമ: ബഹ്റൈനിൽ വരാനിരിക്കുന്ന തിരഞ്ഞെടുപ്പുകളിൽ സ്ഥാനാർത്ഥികൾക്ക് തങ്ങളുടെ പ്രചാരണത്തിനായി ഡിജിറ്റൽ ബോർഡുകളും ഇലക്ട്രോണിക് സ്ക്രീനുകളും ഉപയോഗിക്കാൻ അനുമതി നൽകുന്നു. എന്നാൽ, പുതിയ ഡിജിറ്റൽ ഡിസ്പ്ലേകൾ സ്ഥാപിക്കുന്നത് ഒഴിവാക്കി, നിലവിലുള്ള ലൈസൻസുള്ള റോഡ്സൈഡ് ബിൽബോർഡുകളും സ്ക്രീനുകളും പ്രയോജനപ്പെടുത്താനാണ് സർക്കാർ ലക്ഷ്യമിടുന്നത്. മുനിസിപ്പാലിറ്റി കാര്യ-കാർഷിക മന്ത്രാലയമാണ് ഇക്കാര്യം സ്ഥിരീകരിച്ചത്.
അതേസമയം തിരഞ്ഞെടുപ്പ് പരസ്യങ്ങൾക്കായി പുതിയ ഇലക്ട്രോണിക് സ്ക്രീനുകൾ സ്ഥാപിക്കണമെന്ന നിർദ്ദേശം മന്ത്രാലയം തള്ളിക്കളഞ്ഞു. നിലവിൽ രാജ്യത്തുടനീളമുള്ള സ്ക്രീനുകൾ തന്നെ സ്ഥാനാർത്ഥികളുടെ ആവശ്യങ്ങൾ നിറവേറ്റാൻ പര്യാപ്തമാണെന്നാണ് വിലയിരുത്തൽ. സതേൺ മുനിസിപ്പൽ കൗൺസിലിന് നൽകിയ മറുപടിയിൽ, സർക്കാർ കമ്മിറ്റി വിഷയം വിശദമായി പരിശോധിച്ചതായും നിലവിലുള്ള സ്ക്രീനുകൾ നിശ്ചിത നിബന്ധനകൾക്ക് വിധേയമായി ഉപയോഗിക്കാമെന്നും മന്ത്രാലയം വ്യക്തമാക്കി.
വർഷങ്ങളായി ബഹ്റൈനിലെ തെരുവുകളിൽ കണ്ടുവരുന്ന വലിയ ബാനറുകളിൽ നിന്നും പോസ്റ്ററുകളിൽ നിന്നും മാറിയുള്ള ഒരു പ്രചാരണ രീതിയാണിത്. വോട്ടിംഗ് ദിവസം കഴിയുന്നതോടെ നീക്കം ചെയ്യേണ്ടി വരുന്ന താൽക്കാലിക സംവിധാനങ്ങൾക്ക് പകരം, നിലവിലുള്ള ആധുനിക അടിസ്ഥാന സൗകര്യങ്ങൾ ഉപയോഗിക്കുന്നത് കൂടുതൽ കാര്യക്ഷമമാണെന്ന് അധികൃതർ ചൂണ്ടിക്കാട്ടുന്നു. ഇത് അമിതമായ സാമ്പത്തിക ഭാരം കുറയ്ക്കാനും ഗതാഗത തടസ്സങ്ങൾ ഒഴിവാക്കി നഗരഭംഗി നിലനിർത്താനും സഹായിക്കും.
പരമ്പരാഗത ശൈലിയിൽ നിന്ന് മാറി കൂടുതൽ സംഘടിതവും തന്ത്രപരവുമായ ഒരു ഡിജിറ്റൽ പ്രചാരണ രീതിയിലേക്ക് സ്ഥാനാർത്ഥികൾ മാറേണ്ടി വരുമെന്നാണ് ഈ തീരുമാനം നൽകുന്ന സൂചന. ഓരോ കാമ്പെയ്നുകളുടെയും സ്വഭാവമനുസരിച്ച് മറ്റ് പരസ്യ രീതികളും ലഭ്യമായിരിക്കുമെന്നും മന്ത്രാലയം കൂട്ടിച്ചേർത്തു. പൊതുസ്ഥലങ്ങൾ വികൃതമാക്കാതെ തന്നെ ആധുനിക സാങ്കേതികവിദ്യയുടെ സഹായത്തോടെ വോട്ടർമാരിലേക്ക് എത്താനുള്ള ഒരു പുതിയ പരീക്ഷണത്തിനാണ് ബഹ്റൈൻ ഒരുങ്ങുന്നത്.
sfdsg
