സോഷ്യൽ മീഡിയയിൽ വ്യാജവിവരങ്ങളും ചിത്രങ്ങളും പ്രചരിപ്പിക്കരുതെന്ന് അമിത് ഷാ
ന്യൂഡൽഹി : വ്യാജ വിവരങ്ങളും ചിത്രങ്ങളും സോഷ്യൽ മീഡിയയിൽ ഇനി പോസ്റ്റ് ചെയ്യരുതെന്ന് പാർട്ടി പ്രവർത്തകരോട് ബി.ജെ.പി അധ്യക്ഷൻ അമിത് ഷാ ആവശ്യപ്പെട്ടു. ബി.ജെ.പിയുടെ സോഷ്യൽ മീഡിയ പ്രവർത്തകരുടെ യോഗത്തിലാണ് അമിത് ഷാ ഇക്കാര്യം നിർദേശിച്ചത്.
വ്യാജ ചിത്രങ്ങൾ, വിവരങ്ങൾ, സന്ദേശങ്ങൾ എന്നിവയൊന്നും ട്വിറ്ററിലും ഫേസ് ബുക്കിലും പോസ്റ്റ് ചെയ്യരുതെന്നാണ് അമിത് ഷാ പ്രവർത്തകരോട് പറഞ്ഞിരിക്കുന്നത്. വ്യാജ പോസ്റ്റുകൾ പാർട്ടിയുടെ വിശ്വാസ്യത തകർക്കുമെന്നും അമിത് ഷാ യോഗത്തിൽ പറഞ്ഞു. ഡൽഹിയിലെ എൻ.ഡി.എം.സി കൺവെൻഷൻ സെന്ററിൽ നടന്ന യോഗത്തിൽ 300 പാർട്ടി പ്രവർത്തകരും സോഷ്യൽ മീഡിയയിൽ ബി.ജെ.പിക്കായി പ്രവർത്തിക്കുന്ന 10,000ത്തിലധികം പേരും പങ്കെടുത്തിരുന്നു.
മോദി സർക്കാരിന്റെ നേട്ടങ്ങളാണ് സോഷ്യൽ മീഡിയയിൽ പ്രധാനമായും പ്രചരിപ്പിക്കേണ്ടതെന്നും അമിത് ഷാ നിർദേശിച്ചിട്ടുണ്ട്. കോൺഗ്രസ് സർക്കാരുകളെയും മോദി സർക്കാരിനെയും താരതമ്യം ചെയ്ത് വിവരങ്ങൾ പ്രചരിപ്പിക്കണം.
സോഷ്യൽ മീഡിയയിൽ പാർട്ടിയെ പിന്തുടരുന്നവരുടെ എണ്ണം വർദ്ധിപ്പിക്കണമെന്നും അമിത് ഷാ പാർട്ടി പ്രവർത്തകരോട് ആവശ്യപ്പെട്ടു
