പശ്ചിമേഷ്യൻ സംഘർഷം: ഇന്ത്യൻ വാണിജ്യ മേഖലയിൽ കനത്ത ആശങ്ക; ഇന്ധനവിലയും കയറ്റുമതിയും പ്രതിസന്ധിയിൽ

ഷീബ വിജയൻ

പശ്ചിമേഷ്യയിൽ നീണ്ടുനിൽക്കുന്ന യുദ്ധാന്തരീക്ഷം ഇന്ത്യയുടെ വിവിധ വാണിജ്യ മേഖലകളിൽ കടുത്ത പ്രതിസന്ധി സൃഷ്ടിക്കുമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു. ഗൾഫ് രാജ്യങ്ങളുൾപ്പെടെയുള്ള പശ്ചിമേഷ്യൻ മേഖലയുമായി അടുത്ത വ്യാപാര ബന്ധം പുലർത്തുന്ന ബസുമതി അരി കയറ്റുമതി, വളം ഉൽപാദനം, ഡയമണ്ട് പോളിഷിങ്, വിമാനക്കമ്പനികൾ, ട്രാവൽ ഓപ്പറേറ്റർമാർ എന്നീ മേഖലകളെയാകും ഈ സാഹചര്യം ഏറ്റവും കൂടുതൽ ബാധിക്കുക. ഇറക്കുമതി ചെയ്യുന്ന ദ്രവീകൃത പ്രകൃതി വാതകത്തെ (എൽ.എൻ.ജി) വൻതോതിൽ ആശ്രയിക്കുന്ന സെറാമിക്സ്, വളം വ്യവസായം എന്നിവയ്ക്ക് ഹ്രസ്വകാലത്തേക്ക് ഉൽപാദന തടസ്സങ്ങൾ നേരിടേണ്ടി വന്നേക്കാം. കൂടാതെ, അസംസ്കൃത എണ്ണ ഉൽ‌പന്നങ്ങളെ അടിസ്ഥാനമാക്കി പ്രവർത്തിക്കുന്ന എണ്ണ ശുദ്ധീകരണം, ടയറുകൾ, പെയിന്റുകൾ, സ്പെഷ്യാലിറ്റി കെമിക്കലുകൾ, സിന്തറ്റിക് തുണിത്തരങ്ങൾ തുടങ്ങിയ മേഖലകൾക്ക് ആഗോള ഊർജ വില വർധിക്കുന്നത് മൂലം വലിയ സാമ്പത്തിക ബാധ്യതയുണ്ടാകും.

ലോകത്തിലെ അസംസ്കൃത എണ്ണ ഉൽ‌പാദനത്തിന്റെ 30 ശതമാനവും എൽ.എൻ.ജി ഉൽ‌പാദനത്തിന്റെ 20 ശതമാനവും പശ്ചമിമേഷ്യയിൽ നിന്നാണ് വരുന്നത്. ഇതിന്റെ വലിയൊരു ഭാഗവും കടന്നുപോകുന്നത് ഹുർമുസ് കടലിടുക്ക് വഴിയാണ്. ഇന്ത്യക്കാവശ്യമായ അസംസ്കൃത എണ്ണയുടെ 85 ശതമാനവും എൽ.എൻ.ജിയുടെ പകുതിയും ഇറക്കുമതി ചെയ്യുന്നതിനാൽ, ഈ വിതരണ ശൃംഖലയിലുണ്ടാകുന്ന ഏത് തടസ്സവും രാജ്യത്തെ നേരിട്ട് ബാധിക്കും. നിലവിൽ സുരക്ഷാ കാരണങ്ങളാൽ മാർച്ച് 1 മുതൽ മിക്ക കപ്പലുകളും ഹുർമുസ് കടലിടുക്കിലൂടെയുള്ള ഗതാഗതം നിർത്തിവച്ചിരിക്കുകയാണ്. ഇത് ഇന്ധനങ്ങളുടെ ലഭ്യതയെയും വിലയെയും ദോഷകരമായി ബാധിക്കും.

ഇന്ത്യയുടെ ബസുമതി അരി കയറ്റുമതിയുടെ 70 ശതമാനത്തിലധികവും പശ്ചിമേഷ്യൻ രാജ്യങ്ങളിലേക്കാണ് നടക്കുന്നത്. സംഘർഷം തുടരുന്നത് കയറ്റുമതിയിലും പേയ്‌മെന്റുകളിലും വലിയ കാലതാമസമുണ്ടാക്കാനും കയറ്റുമതിക്കാരുടെ പ്രവർത്തന മൂലധനം പ്രതിസന്ധിയിലാക്കാനും കാരണമാകും. സമാനമായ വെല്ലുവിളിയാണ് വളം മേഖലയും നേരിടുന്നത്. ഇന്ത്യക്കാവശ്യമായ വളത്തിന്റെ 30 ശതമാനവും ഇറക്കുമതിയാണ്, ഇതിൽ 40 ശതമാനവും പശ്ചിമേഷ്യയിൽ നിന്നാണ് വരുന്നത്. വജ്ര വ്യാപാരത്തിന്റെ പ്രധാന കേന്ദ്രങ്ങളായ ഇസ്രായേൽ, യു.എ.ഇ എന്നിവിടങ്ങളിലേക്കുള്ള ഇന്ത്യയുടെ 18 ശതമാനം കയറ്റുമതിയെയും യുദ്ധം ബാധിക്കും. വ്യോമയാന മേഖലയിലും പ്രതിസന്ധി രൂക്ഷമാണ്. ഇന്ത്യൻ വിമാനങ്ങളുടെ 10 ശതമാനത്തോളം മിഡിൽ ഈസ്റ്റ് വഴിയാണ് സഞ്ചരിക്കുന്നത്. ദുബൈ ഉൾപ്പെടെയുള്ള പ്രധാന വ്യോമമേഖലകളിലെ നിയന്ത്രണങ്ങൾ കാരണം വിമാനങ്ങൾ വഴിതിരിച്ചുവിടേണ്ടി വരുന്നത് ഇന്ധനച്ചെലവ് കുത്തനെ ഉയരാൻ ഇടയാക്കും.