എംബാപ്പെയ്ക്കെതിരായ വംശീയ അധിക്ഷേപം: പരാഗ്വേ സെനറ്റര്‍ക്കെതിരെ നിയമനടപടിക്കൊരുങ്ങി ഫ്രാന്‍സ്

ഷീബ വിജയൻ

ലോകകപ്പ് ഫുട്ബോളിൽ പരാഗ്വെയെ ഫ്രാൻസ് പരാജയപ്പെടുത്തിയതിന് തൊട്ടുപിന്നാലെ, ഫ്രഞ്ച് ടീം ക്യാപ്റ്റൻ കിലിയൻ എംബാപ്പെയ്ക്കെതിരെ വംശീയ അധിക്ഷേപം ഉണ്ടായ സംഭവത്തിൽ ആഗോളതലത്തിൽ വലിയ പ്രതിഷേധം ഉയരുന്നു. മത്സരത്തിന് ശേഷം പരാഗ്വേയിലെ സെനറ്ററായ സെലെസ്റ്റെ അമറില്ല സോഷ്യൽ മീഡിയയിലൂടെ നടത്തിയ അധിക്ഷേപകരമായ പരാമർശമാണ് പുതിയ വിവാദങ്ങൾക്ക് തിരികൊളുത്തിയത്. ഈ സംഭവത്തിൽ അതീവ ശക്തമായ ഭാഷയിലാണ് എംബാപ്പേ പ്രതികരിച്ചത്.

സെലെസ്റ്റെ അമറില്ലയുടേത് അങ്ങേയറ്റം മോശം പെരുമാറ്റമാണെന്നും അവർ ഇരിക്കുന്ന ഉയർന്ന പദവിക്ക് ഇത് ഒട്ടും അനുയോജ്യമല്ലെന്നും എംബാപ്പേ പറഞ്ഞു. ലോകകപ്പിൽ മികച്ച പ്രകടനം കാഴ്ചവെച്ച പരാഗ്വേ ടീമിനെയല്ല അവർ പ്രതിനിധീകരിക്കുന്നത്. അവരുടെ ഇത്തരം വംശീയ ചിന്താഗതികൾ സ്വന്തം രാജ്യത്തിന്റെ അന്തസ്സ് കെടുത്തുകയേ ഉള്ളൂവെന്നും, വംശീയതയും വെറുപ്പും പ്രചരിപ്പിക്കാൻ ആരെയും അനുവദിക്കരുതെന്നും എംബാപ്പേ വ്യക്തമാക്കി. ഈ വാക്കുകൾ പരാഗ്വേയിലെ സഹകളിക്കാരെക്കൂടി അപമാനിക്കുന്നതിന് തുല്യമാണെന്നും അദ്ദേഹം കൂട്ടിച്ചേർത്തു.

ഈ വിഷയത്തെ ഫ്രഞ്ച് ഫുട്ബോൾ ഫെഡറേഷൻ അതീവ ഗൗരവത്തോടെയാണ് സമീപിക്കുന്നത്. സെനറ്ററുടെ ഭാഗത്തുനിന്നുണ്ടായ വാക്കുകൾ വലിയ കുറ്റകൃത്യമാണെന്നും ഇതിനെതിരെ ശക്തമായ നിയമനടപടികളുമായി മുന്നോട്ട് പോകുമെന്നും ഫെഡറേഷൻ ഔദ്യോഗികമായി അറിയിച്ചു. ഫ്രഞ്ച് ക്യാപ്റ്റനെ അപമാനിക്കുന്നത് രാജ്യത്തെ മുഴുവൻ അപമാനിക്കുന്നതിന് തുല്യമാണെന്നാണ് ഫെഡറേഷന്റെ നിലപാട്. ഫ്രാൻസിന്റെ അസിസ്റ്റന്റ് കോച്ചും ഈ വംശീയ അധിക്ഷേപത്തെ ശക്തമായി അപലപിച്ചു രംഗത്തെത്തിയിട്ടുണ്ട്.

വിവാദം ആഗോളതലത്തിൽ കടുത്തതോടെ പരാഗ്വേ സർക്കാരും നാഷണൽ കോൺഗ്രസ് പ്രസിഡന്റും സെനറ്ററെ പൂർണ്ണമായി തള്ളിപ്പറഞ്ഞു. സെനറ്ററുടെ പ്രസ്താവന അവരുടെ തികച്ചും വ്യക്തിപരമായ അഭിപ്രായം മാത്രമാണെന്നും, അതിന് പരാഗ്വേ രാജ്യവുമായി യാതൊരു ബന്ധവുമില്ലെന്നും സർക്കാർ ഔദ്യോഗികമായി വ്യക്തമാക്കി. കായികരംഗത്തെയും രാഷ്ട്രീയത്തെയും രണ്ട് വേറിട്ട ദിശകളിൽ കാണണമെന്നും വംശീയതയെ രാജ്യം ഒരിക്കലും പിന്തുണയ്ക്കുന്നില്ലെന്നും പരാഗ്വേ ഭരണകൂടം അറിയിച്ചിട്ടുണ്ട്.