പി.എസ്.സി നിയമനങ്ങളിൽ വീണ്ടും കോടികളുടെ ക്രമക്കേട് ആരോപണം; ഇടതു ഭരണസമിതി പ്രതിക്കൂട്ടിൽ

ഷീബ വിജയൻ

ഇടതുപക്ഷ ഭരണകാലത്ത് പി.എസ്.സി വഴി നടന്ന വിവിധ പരീക്ഷകളെയും നിയമനങ്ങളെയും സംശയത്തിന്റെ നിഴലിലാക്കിക്കൊണ്ട് പുതിയ ക്രമക്കേട് ആരോപണങ്ങൾ പുറത്തുവന്നു. ലക്ഷങ്ങൾ ശമ്പളമുള്ള ഉയർന്ന സർക്കാർ തസ്തികകളിലേക്ക് നടന്ന പരീക്ഷയിൽ, നൂറിൽ 58 മാർക്കിനുള്ള ഉത്തരങ്ങൾ മൂല്യനിർണയം നടത്താതെ പൂർണ്ണമായി ഒഴിവാക്കിയതാണ് പുതിയ വിവാദങ്ങൾക്ക് വഴിവെച്ചത്. ഡിജിറ്റൽ സംവിധാനത്തിലുണ്ടായ സാങ്കേതിക തകരാറാണ് ഇതിന് കാരണമെന്ന പി.എസ്.സിയുടെ വിശദീകരണം ഉദ്യോഗാർത്ഥികളും പ്രതിപക്ഷ പാർട്ടികളും ഒരുപോലെ തള്ളിക്കളഞ്ഞു. സംഭവം വലിയ രീതിയിലുള്ള പ്രതിഷേധങ്ങൾക്ക് കാരണമായിട്ടുണ്ട്.

നിലവിലെ പി.എസ്.സി ചെയർമാനും അംഗങ്ങളും കഴിഞ്ഞ എൽ.ഡി.എഫ് സർക്കാരിന്റെ കാലത്താണ് നിയമിതരായത്. ഇവരുടെ നേതൃത്വത്തിൽ നടന്ന പല നിയമനങ്ങളും കൃത്യമായ രാഷ്ട്രീയ താൽപ്പര്യം മുൻനിർത്തിയുള്ളതാണെന്നും സി.പി.എമ്മുമായി അടുത്ത ബന്ധമുള്ളവർക്ക് ഇതിലൂടെ അനധികൃതമായി മുൻഗണന ലഭിച്ചുവെന്നുമാണ് പ്രതിപക്ഷത്തിന്റെ പ്രധാന ആരോപണം.

2023 ജൂലൈയിൽ നടന്ന പ്ലാനിങ് ബോർഡ് പരീക്ഷയിൽ പങ്കെടുത്ത 228 ഉദ്യോഗാർത്ഥികളുടെ ഉത്തരക്കടലാസുകളിലെ 58 മാർക്കിന്റെ ഉത്തരങ്ങളാണ് ഇത്തരത്തിൽ മൂല്യനിർണയം നടത്താതെ പോയത്. ഈ സംഭവം ഇപ്പോൾ വിജിലൻസ് അന്വേഷണത്തിലേക്കും സംസ്ഥാന വിവരാവകാശ കമീഷന്റെ കടുത്ത ഇടപെടലുകളിലേക്കും വഴിമാറിയിരിക്കുകയാണ്. സംസ്ഥാനം കടുത്ത സാമ്പത്തിക പ്രതിസന്ധിയിലൂടെ കടന്നുപോകുമ്പോഴും പി.എസ്.സി ചെയർമാന്റെയും അംഗങ്ങളുടെയും ശമ്പളം വൻതോതിൽ വർധിപ്പിച്ചതും അവർക്ക് ആജീവനാന്ത പെൻഷൻ ആനുകൂല്യങ്ങൾ അനുവദിച്ചതും ഉദ്യോഗാർത്ഥികൾക്കിടയിൽ വലിയ അമർഷത്തിന് കാരണമായിട്ടുണ്ട്. മുൻകാല നിയമനങ്ങൾക്കെതിരെ ഉയർന്നിട്ടുള്ള ഈ ഗുരുതരമായ ആരോപണങ്ങൾ നിലവിൽ കേരള അഡ്മിനിസ്ട്രേറ്റീവ് ട്രൈബ്യൂണലിന്റെ (കെ.എ.റ്റി) സജീവ പരിശോധനയിലാണ്. യുവാക്കളുടെ ശക്തമായ പ്രതിഷേധത്തിന് കാരണമായ ഈ വിഷയം, പി.എസ്.സിയുടെ പ്രവർത്തനങ്ങളിൽ സമഗ്രമായ ഒരു അഴിച്ചുപണി അനിവാര്യമാണെന്ന ആവശ്യത്തിലേക്ക് കാര്യങ്ങളെ എത്തിച്ചിരിക്കുകയാണ്.