നിയമസഭയിലെ കയ്യാങ്കളി സാഹചര്യം ഒഴിവാക്കേണ്ടതെന്ന് സ്‌പീക്കർ എ.എൻ ഷംസീർ

നിയമസഭയിലെ കയ്യാങ്കളി സാഹചര്യം ഒഴിവാക്കേണ്ടതെന്ന് സ്‌പീക്കർ എഎൻ ഷംസീർ. കയ്യാങ്കളി നടന്ന ദിവസത്തേത് സവിശേഷ സാഹചര്യമെന്ന് എഎൻ ഷംസീർ പറഞ്ഞു. സഭ പാസാക്കിയ ബില്ലുകൾ ഗവർണർ ഒപ്പിടുമെന്നാണ് പ്രതീക്ഷ. ബില്ലുകളിൽ ഒപ്പിടുക എന്നത് ഗവർണറുടെ ഭണഘടനാ ബാധ്യതയെന്ന് സ്പീക്കർ ചൂണ്ടിക്കാട്ടി. കാലതാമസം വരുത്താം എന്നതിന് അപ്പുറം ഗവർണർക്ക് ഒപ്പിടാതിരിക്കാനാകില്ലെന്നും സ്‌പീക്കർ വ്യക്തമാക്കി. അതേസമയം, കേരള നിയമസഭ സ്പീക്കറായി തിരഞ്ഞെടുക്കപ്പെട്ട ശേഷം നിയമസഭ സെക്രട്ടേറിയറ്റിലെ തന്റെ സഹപ്രവർ‍ത്തകരായ കുടുംബാംഗങ്ങളോട് സംസാരിക്കുമ്പോഴും ‘Yes We Can’ എന്ന വാചകം തന്നെയാണ് പറയുവാനുള്ളതെന്ന് സ്പീക്കർ‍ എ എന്‍ ഷംസീർ‍ ഫേസ്ബുക്കിൽ കുറിച്ചു. നിയമസഭ സമ്മേളനങ്ങൾ‍ ചേരുന്ന കാര്യത്തിലായാലും നിയമ നിർ‍മാണങ്ങൾ‍ നടപ്പിലാക്കുന്ന കാര്യത്തിലായാലും കേരള നിയമസഭ ബഹുദൂരം മുന്നിലാണ്. പാർ‍ലിമെന്റിന് തന്നെ മാതൃകയായി നിയമസഭ കമ്മിറ്റികൾ‍, സബ്ജക്റ്റ് കമ്മിറ്റികൾ‍ തുടങ്ങിയവ രൂപീകരിച്ച നിയമസഭയാണ് നമ്മുടേതെന്നും എ എന്‍ ഷംസീർ‍ ഫേസ്ബുക്കിൽ‍ കുറിച്ചു.

ഫേസ്ബുക്ക് കുറിപ്പിന്റെ പൂർ‍ണ രൂപം:−

ഇതെന്റെ പുതിയ കുടുംബം.

‘Yes We Can’

അമേരിക്കൻ പ്രസിഡന്റ് ആയി ചുമതലയേറ്റെടുക്കുമ്പോൾ‍ ബരാക് ഒബാമ തന്റെ പ്രസംഗം ആരംഭിച്ചത് ‘Yes We Can’ എന്ന പ്രയോഗത്തോട് കൂടിയാണ്.

കേരള നിയമസഭ സ്പീക്കറായി തിരഞ്ഞെടുക്കപ്പെട്ട ശേഷം നിയമസഭ സെക്രട്ടേറിയറ്റിലെ എന്റെ സഹപ്രവർ‍ത്തകരായ കുടുംബാംഗങ്ങളോട് സംസാരിക്കുമ്പോഴും Yes We Can എന്ന വാചകം തന്നെയാണ് എനിക്ക് പറയുവാനുള്ളത്.

രാജ്യത്തിനു തന്നെ മാതൃകയായി നിൽ‍ക്കുന്ന നിയമസഭയാണ് നമ്മുടേത്. നിയമസഭ സമ്മേളനങ്ങൾ‍ ചേരുന്ന കാര്യത്തിലായാലും നിയമ നിർ‍മാണങ്ങൾ‍ നടപ്പിലാക്കുന്ന കാര്യത്തിലായാലും നാം ബഹുദൂരം മുന്നിലാണ്. പാർ‍ലിമെന്റിന് തന്നെ മാതൃകയായി നിയമസഭ കമ്മിറ്റികൾ‍, സബ്ജക്റ്റ് കമ്മിറ്റികൾ‍ തുടങ്ങിയവ രൂപീകരിച്ച നിയമസഭയാണ് നമ്മുടേത്. ഈ നേട്ടങ്ങളിൽ‍ നിന്നും ഇനിയുമേറെ ഉയരങ്ങളിലേക്ക് നമുക്ക് നമ്മുടെ സഭയെ നയിക്കേണ്ടതുണ്ട്. ഒട്ടേറെ മാറ്റങ്ങൾ‍ ഇവിടെ കൊണ്ടുവരാൻ‍ സാധിക്കണം.

1921ൽ‍ ആരംഭിച്ച് നൂറുവർ‍ഷം പിന്നിട്ട് നിൽ‍ക്കുന്ന ലൈബ്രറിയാണ് നമ്മുടെ നിയമസഭ ലൈബ്രറി. അതിന്റെ പ്രവർ‍ത്തനം കൂടുതൽ‍ ജനകീയമായി തീർ‍ക്കുവാന്‍ സാധിക്കണം. ഒരു ലക്ഷത്തിലേറെ പുസ്തകങ്ങളുള്ള ലൈബ്രറി കുട്ടികൾ‍, അധ്യാപകർ‍ തുടങ്ങി ആർ‍ക്കും വന്ന് റെഫർ‍ ചെയ്യാൻ സാധിക്കുന്ന, ജനങ്ങൾ‍ക്ക് കൂടുതൽ‍ ഗുണകരമായി മാറുന്ന രീതിയിലേക്ക് കൊണ്ടുവരാൻ സാധിക്കണം. അറിവ് തേടി വരുന്ന ഒരാൾ‍ക്ക് അറിവ് പകർ‍ന്നു കൊടുക്കാൻ നമ്മുടെ ലൈബ്രറി സംവിധാനം ഒരുക്കണം.

ശ്രീ എം.ബി രാജേഷ് സ്പീക്കർ‍ ആയിരിക്കുമ്പോൾ‍ തുടങ്ങിവെച്ച ഇന്റർ‍നാഷണൽ‍ ബുക്ക് ഫെസ്റ്റിവൽ‍ സമയബന്ധിതമായി തന്നെ നമുക്ക് സംഘടിപ്പിക്കണം. ഇവിടെ ലഭ്യമായ സ്ഥലപരിമിതിയിൽ‍ നിന്ന് കൊണ്ട് നിയമസഭ കോംപ്ലക്‌സിന്റെ ചുറ്റുവട്ടത്ത് കൃഷി നല്ല രീതിയിൽ‍ വ്യാപിപ്പിക്കുവാൻ സാധിക്കേണ്ടതുണ്ട്. അസംബ്ലി ചുറ്റുപാടിൽ‍ ഒരു സ്ഥലവും ഉപയോഗശൂന്യമായി കിടക്കുന്നില്ല എന്നത് ഉറപ്പുവരുത്തണം. നിയമസഭ റിസപ്ഷന്‍ മന്ദിരം, നിയമസഭ മന്ദിരത്തിന്റെ ചുറ്റുപാടുകൾ‍, നിയമസഭ ഹോസ്റ്റൽ‍, ഗാർ‍ഡൻ തുടങ്ങിയവയെല്ലാം കൂടുതൽ‍ മനോഹരമാക്കി തീർ‍ക്കാൻ നമുക്കാകണം. ഇത്തരത്തിൽ‍ ഈ നിയമസഭ സെക്രട്ടേറിയറ്റുമായി ബന്ധപ്പെട്ട് എന്തെങ്കിലും മാറ്റം നടക്കണമെങ്കിൽ‍ നമ്മളെല്ലാവരും ഒറ്റക്കെട്ടായി പ്രവർ‍ത്തിക്കേണ്ടതുണ്ട്. നമുക്കെല്ലാവർ‍ക്കുമൊന്നായി ഈ നിയമസഭയിലെ വിഷയങ്ങളിൽ‍ ആത്മാർ‍ത്ഥമായി പരിശ്രമിക്കാം, ഒത്തൊരുമിച്ച് പ്രവർ‍ത്തിക്കാം.