ഗവർണർ ബി.ജെ.പി സംസ്ഥാന അധ്യക്ഷൻ കളിക്കുന്നു; വിമർശനവുമായി സി.പി.എം
തിരുവനന്തപുരം: പൗരത്വ നിയമത്തിനെതിരെ കേരള നിയമസഭ പാസാക്കിയ പ്രമേയത്തെ എതിർത്ത ഗവർണർക്കെതിരെ രൂക്ഷ വിമർശനവുമായി സി.പി.എം. പ്രമേയം നിയമ വിരുദ്ധമെന്ന ഗവർണ്ണറുടെ പരസ്യ വിമർശനമാണ് സി.പി.എമ്മിനെ പ്രകോപിച്ചിരിക്കുന്നത്. ഗവർണർ ബിജെപി സംസ്ഥാന അധ്യക്ഷൻ കളിക്കുകയാണെന്നാണ് സിപിഎമ്മിന്‍റെ വിമർശനം. ഗവർണർ സകല പരിധികളും ലംഘിച്ചു. ഗവർണറുടെ രാഷ്ട്രീയക്കളി കേരളത്തിൽ ചെലവാകില്ലെന്നും കോടിയേരി ബാലകൃഷ്ണൻ പുറത്തിറക്കിയ പ്രസ്താവനയിൽ വ്യക്തമാക്കുന്നു.
ഭരണഘടനയുടെ അന്തഃസത്തയ്‌ക്ക് നിരക്കാത്ത ജൽ‍പ്പനങ്ങളാണ്‌ സംസ്ഥാന ഗവർണർ നടത്തിക്കൊണ്ടിരിക്കുന്നത്. ഏത് നിയമത്തിന്‍റെ ലംഘനമാണ്‌ നിയമസഭ നടത്തിയതെന്ന്‌ ചൂണ്ടിക്കാണിക്കണം. ഏത് നിയമത്തിന്‍റെ പിൻബലത്തിലാണ്‌ അദ്ദേഹം നിയമസഭാ നടപടിയെ വിമർ‍ശിക്കുന്നതെന്നും വ്യക്തമാക്കണം. ഭരണഘടനയും നിയമസംഹിതകളും സുപ്രീംകോടതി വിധികളുമൊന്നും മനസ്സിലാക്കാതെയുള്ള ഗവർണ്ണറുടെ സംസ്ഥാന ബിജെപി അദ്ധ്യക്ഷൻ കളി സകല സീമകളും ലംഘിച്ചിരിക്കുകയാണെന്നും കോടിയേരി പ്രസ്താവനയിൽ പറഞ്ഞു.
